ខេត្តព្រះសីហនុ៖ ប្រជាពលរដ្ឋរងគ្រោះដីធ្លីនៅសហគមន៍អូរខ្សាច់ ស្ថិតក្នុងភូមិ៤ ឃុំអូរត្រេះ ស្រុកស្ទឹងហាវ បានឲ្យដឹងថា កាលពីថ្ងៃទី២៣ ខែឧសភា ឆ្នាំ២០១៨រដ្ឋបាលខេត្តព្រះសីហនុ បានបញ្ជូនគណៈកម្មការចម្រុះមួយក្រុម ឲ្យចុះវាស់វែងដីធ្លីនៅលើទីតាំងដីកំពុងមានទំនាស់ ទៅតាមការស្នើ របស់លោកស្រី ជា សុខឡេង ដែលអះអាងថា ជាភាគីម្ចាស់ដី នៅចំណុចលើទីតាំងដីកំពុងមានទំនាស់ ជាមួយពលរដ្ឋនៅសហគមន៍អូរខ្សាច់។
ក្រុមការងារចម្រុះខាងលើនេះ បានបង្កើតឡើងនៅថ្ងៃទី២១ ខែឧសភា ឆ្នាំ២០១៨ ដោយលិខិតបង្កាប់ការ មានចុះហត្ថលេខា និងបោះត្រា ដោយ ឯកឧត្តម យន្ត មីន អភិបាលខេត្តព្រះសីហនុ។ ក្រុមការងារនេះ តម្រូវឲ្យចុះវាស់ដី នៅលើទីតាំងដី ដែលកំពុងមានទំនាស់ បន្ទាប់ពីប្រធានសហគមន៍អូរខ្សាច់ គឺលោកស្រី ឡុច ទូច និង ពលរដ្ឋរងគ្រោះដីធ្លី ៣នាក់ទៀត រស់នៅក្នុងសហគមន៍នេះ ត្រូវសាលាដំបូងខេត្តព្រះសីហនុ ចាប់ដាក់គុក កាលពីថ្ងៃទី៨ ខែឧសភា ឆ្នាំ២០១៨ ទៅតាមបណ្តឹង របស់លោកឧកញ៉ា តាន់ តាត់ និងលោក ឡុញ វណ្ណៈ អ្នកមានទ្រព្យដ៏ល្បីរស់នៅខេត្តព្រះសីហនុ។
យោងតាមលិខិតបង្គាប់ការចុះថ្ងៃទី២១ ខែឧសភា ឆ្នាំ២០១៨ ចុះហត្ថលេខាដោយ ឯកឧត្តម យន្ត មីន អភិបាលខេត្តព្រះសីហនុ បានបង្កើតគណៈកម្មការចម្រុះមានសមាសភាពចំនួន១០នាក់ ឲ្យចុះវាស់ដីជូន លោកស្រី ជា សុខឡេង ក្រោយពេលតុលាការចាប់ពលរដ្ឋរស់នៅលើដីជាក់ស្តែង ៤នាក់ដាក់គុករួចមក។
មន្ត្រីទាំង ១០នាក់នោះរួមមាន៖
១.លោក អ៊ី ធារិន ប្រធាន ក្រុមការងារ
២.លោក ស៊ុន ពិសី អភិបាលរងស្រុកស្ទឹងហាវ ជាអនុប្រធានក្រុមការងារ
៣. លោកស្រី កែវ សុត្ថារី ប្រធានការិយាល័យកិច្ចការច្បាប់ និង សុវត្ថិភាពសាធារណៈ ជាអនុប្រធានក្រុមការងារ
៤.លោក សំ គល់ អនុប្រធានមន្ទីរបរិស្ថានខេត្តព្រះសីហនុ ជាសមាជិក
៥. លោក ឌី សុភី នាយរងខណ្ឌរដ្ឋបាលព្រៃឈើ ជាសមាជិក
៦. លោក កែ សារឿន ប្រធានការិយាល័យបច្ចេកទេស នៃមន្ទីរដនសសខេត្តព្រះសីហនុ
៧. លោក សំរិទ្ធ កុសល ប្រធានការិយាល័យ ដ.ន.ស.ក.ស្រុកស្ទឹងហាវ ជាសមាជិក
៨. លោក ហាក់ ម៉េង មេឃុំអូរត្រេះ ជាសមាជិក
៩. លោកមេភូមិ៤ ឃុំអូរត្រេះ ជាសមាជិក
១០. លោកនាយប៉ុស្តិ៍នគរបាលឃុំអូរត្រេះ
កាលពីថ្ងៃទី៦ ខែឧសភា ឆ្នាំ២០១៨ លោក ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ បានបញ្ជាកម្លាំងចំនួន២រថយន្ត ចុះចាប់ពលរដ្ឋចំនួន ៦នាក់ រស់នៅសហគមន៍អូរខ្សាច់ ភូមិ៤ ឃុំអូរត្រេះ ស្រុកស្ទឹងហាវ ជាទីតាំងដីកំពុងមានទំនាស់ និងចាប់ពលរដ្ឋដាក់ខ្នោះ បញ្ជូនភ្លាមៗមកកាន់បញ្ជាការដ្ឋានកងរាជអាវុធហត្ថខេត្ត។ ហើយក្រោយមកបានបញ្ជូនបន្តទៅកាន់សាលាដំបូងខេត្តព្រះសីហនុ ទៅតាមបណ្តឹង របស់លោកឧកញ៉ា តាន់ តាត់ និងលោក ឡុញ វណ្ណៈ ដែលជាអ្នកមានទ្រព្យស្តុកស្តម រស់នៅខេត្តព្រះសីហនុ។
បន្ទាប់ពីត្រូវតុលាការសាកសួររួច ពលរដ្ឋរងគ្រោះដីធ្លីចំនួន ៤នាក់ ក្នុងចំណោម៦នាក់ ត្រូវ លោក ឡូត ផារី ចៅក្រមស៊ើបសួរសាលាដំបូងខេត្តព្រះសីហនុ សម្រេចចេញដីកាបង្គាប់ឲ្យឃុំខ្លួន ដាក់ក្នុងពន្ធនាគារខេត្តនេះជាបណ្តោះអាសន្ន កាលពីល្ងាចថ្ងៃទី៨ ខែឧសភា ដោយចោទពីបទ «ប្រើហឹង្សាលើអ្នកកាន់កាប់អចលនវត្ថុដោយសុចរិត» ប្រព្រឹត្តនៅចំណុចភូមិ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុ កាលពីថ្ងៃទី៦ ខែឧសភា ឆ្នាំ២០១៨។
មុនពេលត្រូវកម្លាំងកងរាជអាវុធហត្ថ នាំខ្លួនពីសាលាដំបូងខេត្តព្រះសីហនុ បញ្ជូនទៅដាក់ពន្ធនាគារ ស្ត្រីវ័យចំណាស់ ដែលមានសក់ស្កូវសំពោង ឈ្មោះ ឡុច ទូច ជាពលរដ្ឋរងគ្រោះដីធ្លីម្នាក់ ស្ថិតក្នុងចំណោមពលរដ្ឋ៤នាក់ បានចាត់ទុកដីកាសម្រេច របស់លោក ឡូត ផារី ចៅក្រមស៊ើបសួរសាលាដំបូងខេត្តព្រះសីហនុ ថាមានភាពអយុត្តិធ៌មសម្រាប់ពួកគាត់ និងបានដង្ហោយរក សម្តេចតេជោ ហ៊ុន សែន នាយករដ្ឋមន្ត្រី ហ៊ុន សែន ឲ្យជួយរកយុត្តិធ៌មរួចផុតពីការចោទប្រកាន់ និងមានសិទ្ធិកាន់កាប់ដីធ្លីធ្លាប់រស់នៅដូចដើមវិញ។
សំណុំរឿងដីធ្លីនៅសហគមន៍អូរខ្សាច់ ភូមិ៤ ឃុំអូរត្រេះ ស្រុកស្ទឹងហាវខាងលើនេះ ក្រោយពេលតុលាការចាប់ ប្រជាពលរដ្ឋ ដែលតស៊ូមតិលើវិវាទដីធ្លីដាក់គុក កាលពីថ្ងៃទី៨ ខែឧសភា ឆ្នាំ២០១៨រួចមក គឺជាបន្តបន្ទាប់មកនេះ បានកើតមានសកម្មភាពបុគ្គលមួយចំនួន ដែលអះអាងថា មានចំណែកក្បាលដីនៅលើទីតាំងដីកំពុងមានទំនាស់ជាមួយពលរដ្ឋនៅសហគមន៍អូរខ្សាច់មានដូចជា៖ លោក ឧកញ៉ា តាន់ តាត់ ក៏បាននាំក្រុមការងារចុះទៅមើលដីជាទីតាំងដី ដែលលោកអះអាងថា មានប្លង់កម្មសិទ្ធិស្របច្បាប់ចំនួន ១៦ប័ណ្ណ កាលពីថ្ងៃទី១០ ខែឧសភា ឆ្នាំ២០១៨ និងបានសង់ផ្ទះតូចៗ នៅលើដីទំនាស់នោះ ដោយគ្មានការរំខានពីអាជ្ញាធរមានសមត្ថកិច្ចទេ ។
បន្ថែមលើនេះ កាលពីថ្ងៃទី២៣ ខែឧសភា ឆ្នាំ២០១៨ គណៈកម្មការចម្រុះ របស់រដ្ឋបាលខេត្តព្រះសីហនុ ក៏បានចុះទៅវាស់វែងដីតាមការស្នើសុំ របស់លោកស្រី ជា សុខឡេង ដែលកន្លងមកត្រូវលោកមេភូមិ៤ បញ្ជាក់ថា ទីតាំងដីជាក់ស្តែង របស់លោកស្រី ជា សុខឡេង មិនមែននៅទីតាំងដីកំពុងមានទំនាស់ខាងលើទេ គឺនៅទីតាំងផ្សេងពីមូលដ្ឋាននេះ ប៉ុន្តែជាក់ស្តែងត្រូវក្រុមការងារចម្រុះ របស់រដ្ឋបាលខេត្តព្រះសីហនុ បន្តចុះមកវាស់វែងដី នៅលើដីប្រជាពលរដ្ឋ នៅសហគមន៍អូរខ្សាច់ ត្រង់ចំណុចភូមិ៤ ឃុំអូរត្រេះ ស្រុកស្ទឹងហាវទៅវិញ៕
