តាមការយល់ដឹងរបស់អ្នករាល់គ្នា នោះរថយន្តធ្វើដំណើរតែលើដីប៉ុណ្ណោះ គ្មានអ្វីផ្សេងទៀតទេ។ ហើយម្យ៉ាងវិញទៀត ទិដ្ឋភាពដូចជាឡានមួយរំពេចហោះលើអាកាស គឺអាចកើតឡើងបានតែនៅក្នុងភាពយន្ត ឬកម្មវិធីកម្សាន្តប៉ុណ្ណោះ។ ប៉ុន្តែថ្មីៗនេះ អ្នកដំណើរឆ្លងកាត់ទីក្រុង Xi’an ខេត្ត Shaanxi ប្រទេសចិន បាន «បើកភ្នែកធំៗ» តែម្តង ខណៈបានប្រទះឃើញទិដ្ឋភាពដ៏អស្ចារ្យរថយន្ត១គ្រឿងកំពុង «សំកាំង» លើចុងឈើបែបនេះ។
ជាក់ស្តែង បុរសម្នាក់បើករថយន្តស្រាប់តែឃើញរថយន្ត «ចត» លើដើមឈើក្បែរផ្លូវ គាត់ពិតជាមានការភ្ញាក់ផ្អើលយ៉ាងខ្លាំង ហើយបានថតរូបដ៏ចម្លែកមួយនេះយ៉ាងរហ័ស។ តាមរយៈរូបភាពគេអាចឃើញរថយន្តពណ៌សស៊េរីទំនើប១គ្រឿងដែលកំពុងចតនៅដើមឈើប្រហែល ៦ ទៅ ៧ ម៉ែត្រពីលើដី។
បន្ទាប់ត្រូវបានបង្ហោះ ឈុតរូបភាព «ឡានហោះ» នេះ ឃើញថាទទួលបានការចាប់អារម្មណ៍ខ្លាំងពីអ្នកនិយមលេងអ៊ីនធឺណិត ក្នុងរយៈពេលដ៏ខ្លី។ ជាមួយគ្នានោះ សំណួររាប់មិនអស់បានកើតឡើងក្នុងចិត្តរបស់អ្នកនិយមលេងអ៊ីនធឺណិត ដែលគ្រប់គ្នាចង់ដឹងចម្លើយ បានលើកជាចម្ងល់ផ្សេងៗគ្នាថា ហេតុអ្វីបានជាឡានទៅនៅលើដើមឈើបែបនេះ? តើឡានបញ្ចប់ដោយរបៀបណា? តើនេះជា “យន្តហោះ” មែនទេ?។
ចំណែកមតិកំប្លែងជាច្រើន ក៏ត្រូវបានធ្វើឡើងជាមួយនឹងការស្រមើស្រមៃថា៖
“តើវាជាអ្វី? តើរថយន្តឡើងដើមឈើ ឬក៏ដើមឈើរុញឡានឡើងដោយខ្លួនឯង, ពេលខ្ញុំរៀនបើកឡាន គ្រូមិនព្រមបង្រៀនខ្ញុំឲ្យចេះចតលើអាកាសសោះ!, នេះត្រូវបានគេហៅថាដើមឈើរថយន្ត,…”។
តែទោះជាយ៉ាងណា គ្មានការបញ្ចេញមតិរបស់អ្នកលេងអ៊ីនធឺណិតណាម្នាក់អាចទាយការពិតត្រូវឡើយ។ តាមពិតទៅ មិនមែនឡានហោះ ឬដៃចង្កូតអាច “ចត” រថយន្តទាំងមូលនៅលើចុងឈើដូចក្នុងរូបថតនោះទេ ប៉ុន្តែវាគ្រាន់តែជារូបភាពរថយន្តដែលបង្កើតឡើងសម្រាប់ការផ្សាយពាណិជ្ជកម្មប៉ុណ្ណោះ។
ពិតណាស់ ឡានត្រូវបានដាក់ជាប់នឹងស៊ុមដែក ដែលត្រូវបានដំឡើងនៅក្នុងជួរដើមឈើ ហើយរថយន្តទាំងមូលគ្របដណ្ដប់លើស៊ុមដែកខាងក្រោម ធ្វើឲ្យរថយន្តនោះហាក់ដូចជាហោះទៅលើអាកាស ហើយ «ចុះចត» នៅលើចុងឈើអុីចឹង។
បុគ្គលិកម្នាក់បាននិយាយថា “ឡាន” នេះត្រូវបានគេតំឡើងក្នុងប្រហែលឆ្នាំ ២០១៥ ហើយជាម៉ូដែល MG5 ក្នុងអំឡុងពេលដំណើរការសាងសង់ មានតែតួរថយន្តប៉ុណ្ណោះ ត្រូវបានរក្សាទុក ហើយគ្រឿងបន្លាស់នៅក្នុងផ្នែកត្រូវបានដកចេញ។ គេបង្កើតឡើងគឺដើម្បីផ្សព្វផ្សាយរថយន្ត ប៉ុន្តែឥឡូវម៉ូដែលនេះកម្រមានណាស់នៅលើទីផ្សារ៕ រក្សាសិទ្ធិដោយ៖ លឹម ហុង
