តើលោកអ្នកដែលមានអារម្មណ៍ដូចគ្នា ដែរឬទេថា កាន់តែអាយុច្រើន កាន់តែគេងបានតិច តែបើថ្ងៃណាគេងបានច្រើនវិញ ក៏អាចនឹងដូចជាមិនសូវមានអារម្មណ៍ស្រស់ថ្លា ១០០ភាគរយដូចគ្នា។ នេះ គឺដោយសារតែ នៅពេលយើងធំ ឬកាន់តែចាស់ទៅ រយៈពេលក្នុងការគេងលក់របស់យើង ក៏នឹងប្រែប្រួល(តិច ឬច្រើន) ទៅតាមអាយុរបស់យើងដែរ។ ដូច្នេះសួរថា តើអាយុប៉ុន្មាន គួរគេងឱ្យបានប៉ុន្មានម៉ោង ទើបអាចហៅបានថា គេងបានគ្រប់គ្រាន់? អ៊ីចឹងយើងនាំគ្នា ទៅមើលចម្លើយទាំងអស់គ្នា...។
មូលនិធិសម្រាប់ការគេងលក់ ក្នុងប្រទេសអាមេរិក បានបញ្ជាក់អំពីរយៈពេលនៃការគេងលក់ ដែលសមល្មមរបស់មនុស្ស ដោយបែងចែកទៅតាមអាយុដូចតទៅ៖
- ទារកកើតដំបូង ដល់ ៣ខែ គួរគេងពី ១៤ ទៅ ១៧ម៉ោង ក្នុង ១ថ្ងៃ។
- ទារក អាយុ ៤ខែ ដល់ ១១ខែ គួរគេងពី ១២ ទៅ ១៥ម៉ោង។
- ក្មេង អាយុ ១ឆ្នាំ ដល់ ២ឆ្នាំ គួរគេងពី ១១ ទៅ ១៤ម៉ោង។
- វ័យមត្តេយ្យ អាយុ ៣ ដល់ ៥ឆ្នាំ គួរគេងពី ១០ ទៅ ១៣ម៉ោង។
- វ័យបឋម អាយុ ៦ឆ្នាំ ដល់ ១៣ឆ្នាំ គួរគេងពី ៩ ទៅ ១១ម៉ោង។
- វ័យមធ្យម អាយុ ១៤ ដល់ ១៧ឆ្នាំ គួរគេងពី ៨ ទៅ ១០ម៉ោង។
- វ័យកំលោះ-ក្រមុំ អាយុ ១៨ ដល់ ២៥ឆ្នាំ គួរគេងពី ៧ ទៅ ៩ម៉ោង។
- វ័យធ្វើការ អាយុ ២៦ - ៦៤ឆ្នាំ គួរគេងឱ្យបាន ៧ ទៅ ៩ម៉ោង ស្មើនឹងពេលវ័យកំលោះ-ក្រមុំ។
- វ័យជរា អាយុ ៦៥ឆ្នាំឡើងទៅ គួរគេងឱ្យបាន ៧ ទៅ ៨ម៉ោង។
ទាំងអស់នេះ គឺជារយៈពេលគេង ដែលអ្នកជំនាញបានណែនាំថា វានឹងល្អចំពោះរាងកាយយើងខ្លាំងបំផុត តែក៏អាចបូក ឬលុប ១ម៉ោងបានខ្លះដែរ ក្នុងករណី ដូចជាក្នុងវ័យកំលោះ-ក្រមុំ ឬវ័យធ្វើការ អាចគេងត្រឹម ៦ ឬ ១០ម៉ោងក៏បាន ដោយមិនបានមានន័យថា គេងតិច ឬច្រើនជ្រុលពេកនោះឡើយ។
ដូច្នេះយើងមើលឃើញថា អ្វីដែលយើងធ្លាប់បានរៀនកាលពីមុនមកថា បើគេងបានពី ៦ - ៨ម៉ោង គឺគ្រប់គ្រាន់ហើយនោះ ការពិតទៅ អ្នកដែលគេងបានតិចជាង ៦ម៉ោងញឹកញាប់ អាចនឹងក្លាយជារឿង គេងមិនបានគ្រប់គ្រាន់ ព្រោះរឹតតែគេងមិនបានគ្រប់គ្រាន់ជាប់ៗគ្នា យូរៗទៅ អាចនឹងហុចផលមិនល្អ ដល់សុខភាពក្នុងរយៈពេលវែងបាន៕
