និយាយដល់វត្តត្រពាំងឈូក ដែលមានទីតាំងស្ថិតក្នុងទឹកដីខណ្ឌពោធិ៍សែនជ័យ (ជាប់ផ្លូវកប់ស្រូវ) នោះជឿថា ប្រិយមិត្តជាច្រើនប្រាកដជាបានស្គាល់រួចហើយ ដែលខណៈពេលបច្ចុប្បន្ននេះ បានក្លាយជាទីកន្លែងកម្សាន្ត ជាពិសេសសម្រាប់បងប្អូនកម្មករ-កម្មការិនី នាំគ្នាទៅអង្គុយលេងកម្សាន្ត លំហែអារម្មណ៍ជុំវិញស្រះទឹក។
តែយ៉ាងណាមិញ ក្រៅពីទីធ្លាក្នុងវត្ត នោះទីកន្លែងកម្សាន្តដែលកំពុងពេញនិយមខ្លាំងបំផុតមួយទៀត គឺផ្លូវរថភ្លើងខាងមុខវត្តត្រពាំងឈូកនេះតែម្តង ដោយមានកម្មករ-កម្មការិនី ក្រុមស្ទាវៗ កំលោះក្រមុំ មានទាំងអ្មកមានគូ អត់គូ ឬ ប្តីប្រពន្ធ បានទៅអង្គុយហូបជុំគ្នាយ៉ាងពពាក់ពពួន ជាពិសេសនៅថ្ងៃចុងសប្តាហ៍តែម្តង។
ដោយឡែក វីដេអូមួយ បានកំពុងទទួលការចាប់អារម្មណ៍ និងភ្ញាក់ផ្អើលយ៉ាងខ្លាំងតែម្តង ពីសំណាក់លេងបណ្តាញសង្គម បន្ទាប់ពីបានឃើញអ្នកទៅលេង នាំគ្នាទៅអង្គុយញ៉ាំនៅលើផ្លូវដែកយ៉ាងរំភើយ ដែលឃើញហើយ ពិតជាគួរឲ្យស្រៀវបុកពោះជំនួស ព្រោះតែបារម្ភខ្លាចក្រែងរថភ្លើងមក រត់ចែកជើងគ្នាមិនទាន់។
ទោះជាយ៉ាងណា រឿងនេះទំនងមិនជាបញ្ហាអ្វីនោះទេ ព្រោះថា មិនខុសអ្វីទៅនឹងអ្នកលក់ដូរនៅក្នុងប្រទេសថៃនោះទេ គឺមុនពេលរថភ្លើងមកដល់ ក្រុមអាជីវករនាំគ្នារើប្រមូលរបស់របរលក់ដូររបស់ពួកគេ ចេញបណ្តោះអាសន្ន រួចដាក់លក់លើផ្លូវវិញធម្មតា បន្ទាប់រថភ្លើងឆ្លងកាត់ផុត៕ រក្សាសិទ្ធិដោយ៖ លឹម ហុង
