បើនិយាយអំពីសមត្ថភាពទប់ទល់នឹងគ្រាប់កាំភ្លើង និងគ្រឿងផ្ទុះ អាចមិនល្អដូចកងរថយន្តរបស់ប្រធានាធិបតីអាមេរិក ដូណាល់ ត្រាំទេ ប៉ុន្តែកងរថយន្តរបស់មេដឹកនាំកូរ៉េខាងជើង គីម ជុងអ៊ុន មានចំណុចមួយស៊ីដាច់តែម្តង នោះគឺបង្គន់អនាម័យ ។
តាមកាសែត The Washington Post នោះ “បន្ទប់អនាម័យចល័តនេះ តែងត្រូវបានគេនាំយករៀងរាល់ពេលដែលលោកគីម ធ្វើដំណើរឆ្ងាយ ហើយបំណងសំខាន់នៃសកម្មភាពនេះ គឺបង្ការកុំឲ្យចារកម្មបរទេស អាចប្រមូលយកលាមក ដើម្បីពិនិត្យដឹងពីស្ថានភាពសុខភាពរបស់មេដឹកនាំកូរ៉េខាងជើង ។
តាមនោះទោះបីជាធ្វើដំណើរដោយរថយន្ត ឬប្រភេទយានជំនិះផ្សេងទៀតក៏ដោយ លោកគីម អាចប្រើប្រាស់បង្គន់ពិសេសផ្ទាល់ខ្លួនគ្រប់ពេលវេលា។ ប្រភពនោះនៅបានប្រាប់ថា ៖ មានរថយន្តជាច្រើននៅក្នុងកងរថយន្តនោះ គេពិបាកដឹងថា មេដឹកនាំរូបនេះ កំពុងអង្គុយក្នុងរថយន្តណាមួយ ប៉ុន្តែប្រាកដណាស់ ក្នុងចំណោមនោះមានរថយន្តមួយត្រូវបានតម្លើងបង្គន់មួយសម្រាប់លោកប៉ុណ្ណោះ ។