រាជធានីភ្នំពេញ៖ ចាប់ពីឆ្នាំ២០១១ រហូតដល់ឆ្នាំ២០១៧ កម្ពុជាទទួលបានទុនវិនិយោគ លើវិស័យសំណង់ ស្ថាបត្យកម្ម កើនឡើងរហូត ដល់៦៧៩៧លានដុល្លារ បើធៀបនឹងឆ្នាំ២០១៦ ដែលមានទុនវិនិយោគ៥៥៧៩លានដុល្លារ កើនឡើងប្រមាណជិត១២ភាគរយ ដែលជំរុញឲ្យសេដ្ឋកិច្ចកម្ពុជា ស្ថិតក្នុងរង្វង់៧ភាគរយ នៅឆ្នាំ២០១៨ នៅតែបន្តរក្សាកំណើនទៅមុខជាបន្តបន្ទាប់។
ឆ្លើយតបទៅនិងការរីកចម្រើន នៃវិស័យសំណង់ នាពេលបច្ចុប្បន្ន នៅក្នុងប្រទេសកម្ពុជា ពិព័រណ៍ស្ថាបត្យកម្មកម្ពុជា និងការតុបតែងផ្ទៃក្នុង លើកទី ៣ នឹងនាំមកនូវមុខមាត់ថ្មីដល់ព្រះរាជាណាចក្រកម្ពុជា។
ជារៀងរាល់ឆ្នាំកម្រិតជីវភាពរស់នៅរបស់ប្រជាពលរដ្ឋកម្ពុជាបានផ្លាស់ប្តូរ និងមានភាពប្រសើរឡើងយ៉ាងឆាប់រហ័ស ជាពិសេសគឺអ្នករស់នៅទីក្រុងធំៗដូចជានៅរាជធានីភ្នំពេញ និងនៅតាមបណ្តាខេត្តសំខាន់ៗមួយចំនួនទៀត។
ស្របពេលជាមួយគ្នានេះដែរក៏នឹងមានការផ្លាស់ប្តូរយ៉ាងឆាប់រហ័សនៃការរចនានៃវិស័យអចលនទ្រព្យដូចជាស្តង់ដាថ្មីនៃអគារពាណិជ្ជកម្ម អគារការិយាល័យ កន្លែងធ្វើការរួមគ្នា កន្លែងកម្សាន្ត ផ្សារទំនើបផ្សារ ហាងកាហ្វេ និងអគារលំនៅដ្ឋាន ។ល។
ប្រធានបទ “ការរចនាសម្រាប់កន្លែងធ្វើការ និងការរស់នៅឱ្យកាន់តែមានភាពប្រសើរ” នៃពិព័រណ៍ស្ថាបត្យកម្មកម្ពុជា និងការតុបតែងផ្ទៃក្នុងលើកទី ៣ ដែលរៀបចំឡើងដោយក្រុមហ៊ុន ICVeX Co Ltd សហប្រតិបត្តិការជាមួយសមាគមស្ថាបត្យកម្មកម្ពុជារៀបចំរួមគ្នាចាប់ពីថ្ងៃនេះដល់ថ្ងៃទី ២៦ នៅក្នុងបរិវេណមជ្ឈមណ្ឌលពិព័រណ៍ និងសន្និបាតកោះពេជ្រ នៅរាជធានីភ្នំពេញ នៃព្រះរាជាណាចក្រកម្ពុជា។
ការតាំងពិព័រណ៍រយៈពេល ៣ ថ្ងៃដែលមានការចូលរួមពីក្រុមហ៊ុន Jotun ជាអ្នកឧបត្ថម្ភការតុបតែងលំអរពិពរ័ណ៍នៅឆ្នាំនេះ និងក៏មានការចូលរួមពីក្រុមហ៊ុនជាង១៥០ ជាតិ និងអន្តរជាតិ មកពីទូទាំងពិភពលោក ចូលរួមជាមួយនឹងទំហំទីតាំងពិព័រណ៍ជិត 4000 ម៉ែត្រការ៉េ ដាក់តាំងបង្ហាញនូវផលិតផលថ្មីៗ និងភាពច្នៃប្រឌិតថ្មីៗ ដល់អ្នកចូលរួមមកពីវិស័យស្ថាបត្យកម្ម រចនាផ្ទៃខាងក្នុង អ្នកអភិវឌ្ឍអចលនទ្រព្យ និងសំណង់ ក៏ដូចជា តាំងបង្ហាញដល់បងប្អូនប្រជាពលរដ្ឋទូទៅ ដែលជាម្ចាស់ផ្ទះ និងសាស្ត្រាចារ្យជំនាញ ក្នុងវិស័យនេះផងដែរ។ ខណៈដែលអ្នកតាំងពិព័រណ៍ អាចមានឱកាស ក្នុងការចែករំលែកនូវព័ត៌មាន និងចំណេះដឹងដោយផ្ទាល់ ជាមួយអ្នកចូលរួម។
លោក Chinakit Viphavakit ប្រធានគ្រប់គ្រងទូទៅរបស់ក្រុមហ៊ុន ICVeX បានមានប្រសាសន៍ថា៖ “យើងទទួលបានជោគជ័យយ៉ាងខ្លាំងចំពោះពិពរ័ណ៍លើកទី១ និងទី២កន្លងរួចមកហើយ ដោយមានការគាំទ្រយ៉ាងខ្លាំងពីសំណាក់អ្នកដែលក្នុងឧស្សាហកម្មនេះក៏ដូចជាក្រសួង និងស្ថាប័ននានារបស់រដ្ឋជាពិសេសក្រសួងរៀបចំដែនដី នគរូបនីយកម្ម និង សំណង់” ។
លោកបានថ្លែងបន្តថា៖”ឆ្នាំនេះគឺជាការរៀបចំពិពរ័ណ៍ស្ថាបត្យកម្មកម្ពុជា និងការតុបតែងផ្ទៃក្នុងលើកទី៣ របស់យើងដែលនឹងផ្តល់ជូននូវឱកាសជាច្រើនសម្រាប់អ្នកចូលរួមក្នុងការរៀនសូត្រ។ យើងចង់ជម្រុញប្រជាជនកម្ពុជា និងផ្តល់គំនិត និងចំណេះដឹងដល់ពួកគេក្នុងរបៀបរៀបចំលម្អរនៅកន្លែងធ្វើការ និងការរស់នៅរបស់ពួកគេឱ្យកាន់តែមានភាពប្រសើរឡើង “។
ជាការពិតណាស់តួនាទីនៃការរចនា គុណភាពនៃការតុបតែង និងស្ថាបត្យកម្មមិនត្រូវបានកាត់ផ្តាច់ចេញពីការរីកចម្រើននៃវិស័យសំណង់នោះឡើយ ព្រោះវាធ្វើឱ្យអាគារមានភាពទាក់ទាញនិងមានផាសុកភាព និងមានផលប៉ះពាល់ផ្ទាល់ទៅលើបរិស្ថានរស់នៅរបស់ប្រជាពលរដ្ឋយើង។
លោក ភឿង សុភ័ណ្ឌ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងជាអគ្គលេខាធិការ
គណៈស្ថាបត្យករកម្ពុជា បានមានប្រសាសន៍ថា វិស័យសំណង់ និង អចលនទ្រព្យនៅកម្ពុជាបានដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ចជាតិ។ ក្នុងពេលជាមួយគ្នានេះដែរមានតម្រូវការនៃទំនើបកម្មនិងការតុបតែងលំអរអគារ និងគេហដ្ឋានក៏ជារឿងចាំបាច់ផងដែរ។
លោក ភឿង សុភ័ណ្ឌ បានមានប្រសាសន៍យ៉ាងដូច្នេះថា៖”ពិពរ័ណ៍ស្ថាបត្យកម្មកម្ពុជា និងការតុបតែងផ្ទៃក្នុងលើកទី ៣ឆ្នាំនេះនឹងក្លាយជាភស្តុតាងដើម្បីបង្ហាញថាវិស័យសំណង់និង អចលនទ្រព្យនៅកម្ពុជាបានធ្វើការទាក់ទាញវិនិយោគិនជាច្រើនទាំងក្នុងស្រុកនិងក្រៅស្រុក។ ព្រឹត្តិការណ៍ដ៏ពិសេសនេះនឹងដើរតួជាវេទិកាមួយដោយនាំមកនូវគំនិតថ្មី ផលិតផលថ្មីៗ និងគំរូនៃការតុបតែងអគារ និងផ្ទះល្អៗដល់ប្រទេស និងប្រជាជនរបស់ យើងខណៈដែលរបៀបរស់នៅ របស់ប្រជាជនកម្ពុជា បានផ្លាស់ប្តូរយ៉ាងឆាប់រហ័ស នាពេលប៉ន្មានឆ្នាំចុងក្រោយនេះ”។
លោកបានថ្លែងបន្តថា វិស័យស្ថាបត្យកម្មនិងសំណង់បានដើរតួយ៉ាងសំខាន់ ក្នុងការៀបចំអភិវឌ្ឍន៍ប្រទេសជាតិ និងការរីកចម្រើនគួរឲ្យគត់សម្កាល់នៅចន្លោះឆ្នាំ២០០៣ និងឆ្នាំ២០០៧ ដែលបានជំរុញឲ្យកំណើនសេដ្ឋកិច្ចទទួលបានពីរខ្ទង់ គឺ១៣,៣ភាគរយក្នុងរយៈពេល៥ឆ្នាំជាប់ៗគ្នា ប៉ុន្តែចាប់តាំងពីឆ្នាំ២០០៨ ដោយសេដ្ឋកិច្ចកម្ពុជា ទទួលរងឥទ្ធិពលដោយប្រយោលពីវិបត្តិសេដ្ឋកិច្ចពិភពលោក បានធ្វើឲ្យវិស័យវិនិយោគនិងវិស័យស្ថាបត្យកម្មនិងសំណង់ នៅកម្ពុជាបានចុះថយជាបន្តបន្ទាប់។ រដ្ឋាភិបាលកម្ពុជា បានចេញនូវគោលនយោបាយលើកទឹកចិត្តឲ្យមានការសាងសង់នូវអគារទំនើបៗខ្ពស់ៗនៅតាមទីតាំងមួយចំនួនក្នុងរា
ជធានីភ្នំពេញ ចាប់ពីអគារដែលមានកម្ពស់ជាង៥ជាន់ កើនឡើងដល់៧៩៧អគារ និងមានបុរីលំនៅដ្ឋានចំនួន៣៤ទីតាំង និងជំរុញឲ្យមានការកសាងទីក្រុងរណបថ្មី តំបន់សេដ្ឋកិច្ច តំបន់ពាណិជ្ជកម្ម អគារឧស្សាហកម្ម និងបានបង្កើតអនុក្រឹត្យអគារសហកម្មសិទ្ធិផ្តល់ដល់ជនបរទេសអាចសិទ្ធិ ជាពិសេសអ្នកវិនិយោគទុនបរទេសទិញលំនៅដ្ឋានចាប់ពីជាន់ទី១ឡើងទៅ។
កម្មវត្ថុនៃការតាំងពិព័រណ៍នេះ មានសារសំខាន់ណាស់ សម្រាប់ព្រះរាជាណាចក្រកម្ពុជា ដែលបាននិងកំពុងជំរុញ ការអភិវឌ្ឍហេដ្ឋារចនាសម្ព័ន្ធ បង្កើនការសាងសង់សំណង់ អគារសម្រាប់ការស្នាក់នៅ សម្រាប់គោលនយោបាយពាណិជ្ជកម្ម និងសម្រាប់ការកសាងព្រះរាជាណាចក្រកម្ពុជា ដែលជាទីក្រុងមួយ គឺទីក្រុងឆ្លាតវៃ ក្នុងខណៈដែលសេដកិច្ចកំពុងមានកំណើនខ្ពស់ និងមានស្ថិរភាពនយោបាយ ។ លោកបានបញ្ជាក់ថា “ខ្ញុំសូមបញ្ជាក់ថាវិស័យស្ថាបត្យកម្មនិងសំណង់ គឺជាកត្តាជំរុញកំណើនសេដ្ឋកិច្ចមួយ រួមជាមួយវិស័យទេសចរណ៍ វិស័យឧស្សាហកម្មកាត់ដេរ និងវិស័យកសិកម្ម ដែលមកដល់ពេលនេះមានក្រុមហ៊ុនធំៗ បានមកពីប្រទេសកូរ៉េ ចិន ជប៉ុន ថៃ សិង្ហបុរីជាដើម បានមកបោះទុនវិនិយោគសាងសង់សំណង់ទំនើបៗ ដូចជា ខុនដូ អគារពាណិជ្ជកម្ម ផ្សារទំនើបជាដើម ដែលគេជឿជាក់ទុកចិត្តលើនយោបាយ ដឹកនាំដ៏ឆ្លាតវៃរបស់ប្រមុខរាជរដ្ឋាភិបាល ។ ដែលជាក់ស្តែងមានក្រុមហ៊ុនចុះបញ្ជីសំណង់ នៅក្នុងក្រសួងរៀបចំដែនដី នគរូបនីយកម្មនិងសំណង់ ដែលមានសុពលភាព១០៦៣ក្រុមហ៊ុន ស្ថិតនៅក្នុងសន្ទុះរីកចម្រើននៃវិស័យសំណង់ និងការតុបតែង ដែលទាមទារត្រូវការជាចាំបាច់នូវបច្ចេកទេស បច្ចេកវិទ្យាសម្ភារៈទំនើបសម្បូរបែបជាកត្តាចាំបាច់ ដើម្បីធ្វើឲ្យប្រសើរឡើងនូវប្រសិទ្ធភាពគុណភាពនៃវិស័យស្ថាបត្យកម្មសំណង់ឆ្លើយតបទៅនឹងស្តង់ដារអន្តរជាតិ។
ជាមួយនឹងភាពជោគជ័យដ៏ធំធេងក្នុងការតាំងពិព័រណ៍ពីរលើកកន្លងមកនេះ ព្រឹត្តិការណ៍ថ្ងៃនេះ នឹងផ្តល់នូវវេទិកាតែមួយគត់ សម្រាប់អ្នកចូលរួមទាំងអស់ មានជំនួបដោយផ្ទាល់ជាមួយ វាគ្មិនសំខាន់ៗ និងអ្នកតាំងពិព័រណ៍ នៅក្នុងពិធីអាហារពេលល្ងាចឆ្នាំ ២០១៨ នៅសាលពិពរ័ណ៍ និងសន្និបាតកោះពេជ្រ នៅថ្ងៃទី២៤ ខែឧសភា ឆ្នាំ២០១៨។ សូមបញ្ជាក់ផងដែរថា កាលពីឆ្នាំ ២០១៧ ពិព័រណ៍នេះបានទាក់ទាញភ្ញៀវចូលរូមចំនួន ៤.309 នាក់ដោយមានកើនឡើងជាង២៣ ភាគរយធៀបទៅឆ្នាំ២០១៦។
និន្នាការនៃវិស័យអចលនទ្រព្យ និងសំណង់នៅកម្ពុជា ចំនួនប្រជាជនរបស់កម្ពុជា ត្រូវបានគេរំពឹងថា នឹងកើនឡើងពី ១៥ ទៅ ១៩ លាននាក់ នៅចន្លោះពេលនេះ រហូតដល់ឆ្នាំ២០៣០ ហើយនៅទីក្រុងភ្នំពេញ និងនៅតាមទីប្រជុំជន នឹងមានចំនួនប្រជាជនកើនឡើងពី ៤ ទៅ ៧ លាននាក់ ដែលជំរុញឲ្យមានតម្រូវការ លំនៅដ្ឋានថ្មី ប្រមាណជា ៨០០.០០០ ផ្ទះ បន្ថែមទៅលើចំនួនលំនៅឋានបច្ចុប្បន្ន។ នេះបើយោងតាមរបាយការណ៍ពី MLMUPC។
របាយការណ៍ដដែល បានបង្ហាញថា កាលពីឆ្នាំ២០១៧ វិស័យអចលនទ្រព្យ មានការកើនឡើងគួរឱ្យកត់សម្គាល់ ជាមួយនឹងគម្រោងអនុម័តចំនួន ៣.៤១៨ គម្រោង ហើយវិស័យសំណង់ បានកើនឡើង ២២ភាគរយ ពីមួយឆ្នាំទៅមួយឆ្នាំ (មានទឹកប្រាក់រហូតដល់ទៅ ៦,៨ ពាន់លានដុល្លារ) ក្នុងនោះ ៨២ភាគរយ ជាគម្រោងលំនៅដ្ឋាន។
ជាមួយគ្នានេះដែរ កាលឆ្នាំ ២០១៧ ត្រូវបានគេមើលឃើញថាមានការកើនឡើងនូវតម្រូវការ សម្រាប់អគារការិយាល័យដែលមានគុណភាពល្អទាំងអ្នកក្នុងស្រុកនិងក្រៅស្រុក។ ការណ៍នេះបានធ្វើឱ្យប្រភេទអគារការិយាល័យប្រភេទ B ធ្លាក់ចុះប្រហែល ១០ ភាគរយ។ ស្របពេលជាមួយគ្នាដែរ នៅដំណាច់ត្រីមាសទី ៤ ឆ្នាំ ២០១៧ ផ្ទៃដីសម្រាប់ជួលដើម្បីធ្វើការលក់រាយប្រហែល ៣០០.០០០ ម៉ែត្រការ៉េកំពុងត្រូវបានសាងសង់ឬគ្រោងនឹងបញ្ចប់បានកើនឡើងទ្វេដងសម្រាប់តម្រូវការផ្គត់ផ្គង់លក់រាយនាពេល២៤ ខែខាងមុខ។
លោក ស៊ិន សុជាតិ ប្រធានសមាគមស្ថាបត្យករកម្ពុជា (CSA) បានមានប្រសាសន៍ថា ប្រទេសកម្ពុជា បានទទួលបាននូវកំណើនសេដ្ឋកិច្ច យ៉ាងឆាប់រហ័ស សម្រាប់ឆ្នាំកន្លងមក ដោយសារវិស័យសំណង់ និងអចលនទ្រព្យគឺជាឧស្សាហកម្មឈានមុខគេមួយ។
លោក ស៊ិន សុជាតិ បានមានប្រសាសន៍បន្ថែមទៀតថា៖”ស្របពេលជាមួយគ្នានោះដែរ សេដ្ឋកិច្ចរបស់យើងកំពុងរីកចម្រើនដោយយើងឃើញមានការសាង់សង់សណ្ឋាគារថ្មីៗ អគារការិយាល័យ ផ្សារទំនើប ភោជនីយដ្ឋាន និងអគារលំនៅដ្ឋានកំពុងមានការរីកចំរើននៅរាជធានីភ្នំពេញ និងបានរីករាលដាលទៅកាន់ទីក្រុងនានាក្នុងប្រទេសកម្ពុជា ។ បច្ចុប្បន្ននេះមានប្រជាជនថ្នាក់កណ្តាលកំពុងមានការកើនឡើង ហើយរបៀបនៃរស់នៅរបស់ពួកគេក៏កំពុងផ្លាស់ប្តូរទាំងការងារ និងបរិស្ថានផ្ទាល់ខ្លួនផងដែរ”។
ធនាគារអភិវឌ្ឍន៍អាស៊ី មូលនិធិរូបិយវត្ថុអន្ដរជាតិ ក៏ដូចជារដ្ឋាភិបាល បានធ្វើការព្យាករណ៍ថា សេដ្ឋកិច្ចកម្ពុជា នឹងបន្តកើនឡើងក្នុងរង្វង់ ៧ ភាគរយនៅឆ្នាំនេះ និងឆ្នាំក្រោយ។ វិស័យសំណង់ គឺជាផ្នែកមួយដ៏សំខាន់ ដែលគាំទ្រដល់កំណើនខ្ពស់បែបនេះ៕ ដោយ៖បញ្ញាស័ក្តិ
