ប្រទេសស្វីស គឺជាប្រទេសមួយដែលល្បីល្បាញសម្រាប់ទេសភាពភ្នំព្រិល រួមជាមួយនឹងផ្ទាំងទឹកកក Aletsch ដ៏អស្ចារ្យ។ តែយ៉ាងណាមិញ រដូវក្តៅដ៏ក្តៅខ្លាំងនៅទូទាំងទ្វីបអឺរ៉ុបឆ្នាំនេះ បានបណ្តាលឱ្យទឹកកករលាយ បង្ហាញបំណែក…សាកសពជាច្រើន ដើម្បីបញ្ជាក់ពីអាថ៌កំបាំងដ៏មិននឹកស្មានជាច្រើន។
ផ្ទាំងទឹកកកនេះ មានទីតាំងនៅក្នុងខេត្ត Valais ភាគខាងត្បូងនៃប្រទេសស្វីស។ Aletsch គឺជាផ្ទាំងទឹកកកដ៏ធំបំផុតនៃភ្នំ Alps ដែលគ្របដណ្តប់ជាង ១២០ គីឡូម៉ែត្រការ៉េ នៅភាគខាងត្បូងប្រទេសស្វីស។ នេះជាកន្លែងដែលបំណែកយន្តហោះដ៏សោកនាដកម្មមួយបានកើតឡើងកាលពីជាង ៥០ ឆ្នាំមុន។
ការធ្លាក់ព្រិលទាបក្នុងរដូវរងារ និងរលកកំដៅនៅទូទាំងទ្វីប នៅក្នុងរដូវក្តៅពីរជាប់ៗគ្នា បានធ្វើឲ្យប៉ះពាល់យ៉ាងធ្ងន់ធ្ងរដល់ផ្ទាំងទឹកកក។ ផ្ទាំងទឹកកកក្នុងតំបន់ជិតរលាយជាមួយបរិមាណដ៏ធំបំផុត ក្នុងរយៈពេលយ៉ាងហោចណាស់ ៦០ ឆ្នាំ។
សីតុណ្ហភាពខ្ពស់មិនធម្មតា ក្នុងរដូវក្តៅនេះ បានធ្វើឲ្យរលាយផ្ទាំងទឹកកក ដោយបញ្ចេញឱ្យឃើញនូវកំទេចកំទី និងសាកសពជាច្រើន។ ក្នុងចំណោមនោះ មានជនរងគ្រោះ៣នាក់ (គ្រូបង្រៀនម្នាក់, ប្រធានមន្ទីរពេទ្យម្នាក់ និងកូនប្រុសរបស់គាត់) ដែលត្រូវបានដឹងថា សុទ្ធតែមកពីទីក្រុង Zurich។
អត្តសញ្ញាណជាក់លាក់របស់ជនរងគ្រោះទាំងនោះ មិនទាន់ត្រូវបានគេបញ្ចេញនៅឡើយទេ។ ប៉ូលីស Valais ប្រឈមមុខនឹងកិច្ចការងារដ៏ធំមួយនាពេលខាងមុខ ដោយសារបញ្ជីឈ្មោះអ្នកបាត់ខ្លួនពីឧបទ្ទវហេតុនេះ មានប្រវែងប្រហែល ៣ ទំព័រ A4 ។
ការរកឃើញថ្មីនេះ ត្រូវបានធ្វើឡើងដោយមគ្គុទ្ទេសក៍ភ្នំ នៅក្នុងអំឡុងពេលធ្វើដំណើរដោយចៃដន្យ។ បំណែកឆ្អឹងជនរងគ្រោះ ត្រូវបានគេរកឃើញនៅលើផ្ទាំងទឹកកក Chessjen ក្បែរផ្លូវឡើងភ្នំចាស់ដែលមិនត្រូវបានប្រើអស់រយៈពេល ១០ ឆ្នាំមកហើយ។
ផ្លូវឡើងភ្នំត្រូវបានផ្លាស់ប្តូរដោយសារតែការរលាយទឹកកកនៅកន្លែងជាច្រើន។ បំណែកយន្តហោះ បានពន្យល់ពីអាថ៌កំបាំងដែលលាក់ទុកអស់រយៈពេល ៥០ ឆ្នាំមកហើយ។
ការស៊ើបអង្កេតមួយត្រូវបានធ្វើឡើង ហើយគេបានកំណត់ថា បំណែករបស់យន្តហោះនោះ ជាកម្មសិទ្ធិរបស់យន្តហោះ Piper Cherokee ចុះបញ្ជី HB-OYL ដែលបានធ្លាក់នៅទីតាំងនេះនៅថ្ងៃទី៣០ ខែមិថុនា ឆ្នាំ១៩៦៨។
Andrea Fischer អ្នកស្រាវជ្រាវនៅ Innsbruck បានប្រើច្រវាក់ដើម្បីទាញសាកសពម៉ាំមីចេញពីផ្ទាំងទឹកកក។ សាកសពនោះ គឺជានារីវ័យក្មេង ដែលត្រូវបានរក្សាទុកយ៉ាងល្អនៅក្នុងផ្ទាំងទឹកកក។
គួរបញ្ជាក់ថា រលកកំដៅនៅរដូវក្ដៅនេះ បានធ្វើឱ្យសីតុណ្ហភាពកើនឡើងលើសពី ៤០ អង្សាសេ នៅក្នុងប្រទេសជាច្រើននៅអឺរ៉ុប ខណៈភូមិភ្នំ Zermatt នៃប្រទេសស្វីស បានកត់ត្រាសីតុណ្ហភាព ៣០ អង្សាសេ។ ភូមិនេះស្ថិតនៅលើកម្ពស់ខ្ពស់ ១,៦០០ ម៉ែត្រពីលើនីវ៉ូទឹកសមុទ្រ៕ រក្សាសិទ្ធិដោយ៖ លឹម ហុង