គេហទំព័រ South China Morning Post កាលពីថ្ងៃទី១៥ ខែសីហា ឆ្នាំ ២០២២ បានរាយការណ៍ថា ភាពចលាចលដ៏ធំមួយនៅផ្សារទំនើប IKEA ក្នុងទីក្រុងសៀងហៃ ប្រទេសចិន បានកើតឡើង បន្ទាប់ពីមន្ត្រីសុខាភិបាលបានប្រកាសពីការបិទទ្វារផ្សារទំនើបភ្លាមៗ ជាមួយនឹងការបញ្ជាដាក់ហាមអ្នកទិញទំនិញទាំងអស់ចាកចេញពីអគារ បន្ទាប់ពីបានដឹងថា ក្នុងចំណោមពួកគេមានទំនាក់ទំនងជិតស្និទ្ធជាមួយអ្នកជំងឺ COVID-19 ម្នាក់ដែលបានធ្វើដំណើរទៅកាន់ IKEA ។
ការប្រកាសបិទផ្សារទំនើបដ៏ប្រថុចញ៉ុចនេះ គឺបានកើតឡើងកាលពីថ្ងៃសៅរ៍ ទី១៣ ខែសីហា ដែលជាលទ្ធផលបានធ្វើឲ្យមនុស្សរាប់សិបនាក់ព្យាយាមទម្លុះរបាំងការពារសន្តិសុខ និងបុគ្គលិកសុខាភិបាលដើម្បីចាកចេញពីផ្សារ។ ភាពចលាចលនៃការស្រែកទាមទារចាកចេញរបស់ក្រុមអ្នកទិញឥវ៉ាន់ត្រូវបានគេចែករំលែកនៅលើប្រព័ន្ធផ្សព្វផ្សាយសង្គម រហូតបង្កឲ្យមានការភ្ញាក់ផ្អើលដល់មនុស្សជុំវិញពិភពលោកតែម្តង។
មន្ត្រីសុខាភិបាលនៅទីក្រុងសៀងហៃ បាននិយាយថា ពួកគេបានអនុវត្តវិធានការទប់ស្កាត់បណ្តោះអាសន្ននៅក្នុងផ្សារទំនើប បន្ទាប់ពីដឹងថា ក្នុងចំណោមពួកគេមានទំនាក់ទំនងជិតស្និទ្ធជាមួយក្មេងប្រុសអាយុ ៦ ឆ្នាំម្នាក់ ដែលឆ្លងមេរោគកូវីដ-19 ដែលបានធ្វើដំណើរទៅកាន់ផ្សារទំនើបនេះ។ តែទោះជាយ៉ាងណាក៏ដោយ ករណីនេះ មិនត្រូវបានគេបង្ហាញឱ្យដឹងថា តើក្មេងប្រុសនោះបានទៅ IKEA នៅពេលណានោះទេ។
Zhao Dandan នាយករងនៃគណៈកម្មការសុខភាពសៀងហៃ បាននិយាយនៅថ្ងៃទី១៤ ខែសីហា ឲ្យដឹងថា អ្នកគ្រប់គ្នានៅក្នុងផ្សារទំនើប IKEA Shanghai និងតំបន់ដែលរងផលប៉ះពាល់ផ្សេងទៀត នឹងត្រូវដាក់ឱ្យនៅដាច់ដោយឡែក រយៈពេល២ថ្ងៃ និងតាមដានរយៈពេល ៥ ថ្ងៃទៀត។
ទាក់ទងនឹងករណីបិទទ្វារបែបផ្លេកបន្ទោរនេះផងដែរ គឺត្រូវបានដឹងថា ជាផ្នែកមួយនៃយុទ្ធសាស្ត្រសូន្យកូវីដរបស់រដ្ឋាភិបាលចិន ក្នុងគោលបំណងលុបបំបាត់ការផ្ទុះឡើងនៃជំងឺនៅក្នុងតំបន់ដែលមនុស្សរស់នៅក្នុងអគារ ឬតំបន់ទីក្រុង ដែលនឹងត្រូវបានជូនដំណឹងជាមុនក្នុងរយៈពេលខ្លី មុនពេលបិទការចេញចូល ដែលបានបង្កការភ័យស្លន់ស្លោពេញប្រទេស។
គួរបញ្ជាក់ថា កន្លងមក ប្រជាជន ២៥ លាននាក់ នៅទីក្រុងសៀងហៃ បានប្រឈមមុខនឹងការបិទទ្វារយ៉ាងតឹងរ៉ឹងក្នុងខែមេសា ដល់ខែឧសភា ដោយត្រូវបានហាមឃាត់មិនឱ្យចាកចេញពីលំនៅដ្ឋាន ដែលជាហេតុធ្វើឲ្យមនុស្សជាច្រើនប្រឈមនឹងការស្រេកឃ្លានដោយសារកង្វះអាហារ។
ក្នុងឃ្លីបដែលត្រូវបានផ្សព្វផ្សាយលើបណ្តាញសង្គមបានឃើញថា មានការប្រកាសមួយបានបន្លឺឡើងនៅក្នុងហាងទំនិញ IKEA ដោយបុគ្គលិកបានជូនដំណឹងថា សូមស្នើសុំបិទផ្សារទំនើបជាបន្ទាន់ និងបញ្ឈប់មនុស្សមិនឱ្យចូល ឬចាកចេញពីអគារឡើយ។ បន្ទាប់មក នៅពេលដែលបុគ្គលិកនៅក្នុងសម្លៀកបំពាក់ការពារ បានព្យាយាមបិទទ្វារនៃហាងទំនិញ ស្រាប់តែមានមនុស្សរាប់សិបនាក់ បានប្រញាប់ប្រញាល់ទៅទ្វារចេញ ដើម្បីទម្លុះចេញផ្អើលឈូឆរតែម្តង។
ម្នាក់ក្នុងចំណោមអ្នកនៅក្នុងហេតុការណ៍នោះ ក៏បានបង្ហោះឃ្លីបនៅលើ Douyin ឬហៅថា TikTok ជាភាសាចិនថា អ្នកដែលព្យាយាមរត់ចេញពីផ្សារពេលអត់រួចនោះ គឺត្រូវជាប់នៅក្នុង IKEA ចាប់ពីម៉ោង ៨ យប់រហូតដល់ពាក់កណ្តាលអធ្រាត្រ មុនពេលត្រូវបាននាំទៅកាន់សណ្ឋាគារ ដែលប្រើសម្រាប់ការដាក់ឱ្យនៅដាច់ពីគេ។
ផ្សារទំនើប IKEA ក្រោយមកបានចេញសេចក្តីថ្លែងការណ៍មួយដោយប្រកាសបិទហាងរបស់ខ្លួនជាបណ្តោះអាសន្ន នៅថ្ងៃទី១៤-១៥ ខែសីហា ដើម្បីឆ្លើយតបទៅនឹងវិធានការទប់ស្កាត់ការរីករាលដាលនៃជំងឺរាតត្បាត។
ទោះបីជាស្ថានភាពសង្គម និងសេដ្ឋកិច្ច កាន់តែយ៉ាប់យ៉ឺនក៏ដោយ គិតត្រឹមថ្ងៃទី១៥ ខែសីហា ប្រទេសចិនបានរាយការណ៍ករណីថ្មីនៃ COVID-19 ចំនួន ២.៣១២ នៅក្នុងប្រទេស ដែលនេះជាលើកទីមួយក្នុងរយៈពេលជាងបីខែ ដែលប្រទេសចិនបានរកឃើញច្រើនជាងករណីកូវីដ-១៩ ចំនួន ២,០០០ ករណី ក្នុងរយៈពេលបីថ្ងៃជាប់គ្នា៕ រក្សាសិទ្ធិដោយ៖ លឹម ហុង