គេហទំព័ររបស់ចិន sinchew នៅថ្ងៃទី១៧ ខែសីហា ឆ្នាំ២០២២ នេះ បានបញ្ចេញរឿងរ៉ាវដ៏ខ្លោចចិត្តបំផុតមួយ ដែលនារីវ័យក្មេងម្នាក់ រស់នៅក្នុងទីក្រុង Tangshan ខេត្ត Hebei ប្រទេសចិន គឺចាប់តាំងពីនាងសម្រាលបានកូនស្រីដោយការវះកាត់រួចមក ត្រូវបានគ្រួសារខាងប្តីមិនពេញចិត្ត ដោយបានចោទប្រកាន់ថា នាងមិនព្រមធ្វើអ្វីសោះ បន្ទាប់ពីសម្រាលកូន ខណៈដែលម្តាយក្មេកបានជំរុញឲ្យនាងចេញទៅធ្វើការ ដើម្បីរកប្រាក់ផ្គត់ផ្គង់គ្រួសារ។
ចំណែកប្តីរបស់នាងវិញ ដែលត្រូវបានដឹងថា ក៏មិនធ្វើអ្វីសោះ មិនបានគិតគូរអំពីការការពារប្រពន្ធទន់ខ្សោយរបស់ខ្លួនពីការវះកាត់នោះទេ ដែលធ្វើឲ្យប៉ះពាល់ដល់ផ្លូវចិត្តរបស់នាងជាខ្លាំង។ ដោយសារតែបញ្ហាមិនខ្វល់ខ្វាយយកចិត្តទុកដាក់ ពីសំណាក់ម្តាយក្មេក និងប្តី នាងបានបង្ខំចិត្តស៊ូទ្រាំ និងព្យាយាមមើលថែកូនស្រីដោយខ្លួនឯង។
នាងបានប្រាប់ថា នៅក្នុងគ្រួសារខាងប្តី គឺមានតែជីដូនអាយុ ៨០ ឆ្នាំម្នាក់ប៉ុណ្ណោះ ដែលមិនមើលងាយនាង ហើយគាត់ក៏ជាអ្នកដែលបានជួយមើលថែនាងក្នុងអំឡុងពេលសម្រាកព្យាបាលក្រោយសម្រាលកូនផងដែរ។ តែទោះបីជាយ៉ាងណា ការប្រឈមមុខទៅនឹងទង្វើដ៏អាក្រក់របស់ម្តាយក្មេក និងប្តីក៏គ្មានក្តីស្រឡាញ់ថែមទៀតនោះ នៅពេលនេះ នាងសម្រេចចិត្តលែងលះប្តីដោយស្ងាត់ៗ បន្ទាប់ពីសុខភាពរបស់នាងក្រោយសម្រាលកូន បានល្អប្រសើរឡើងឡើងវិញ។
ជាក់ស្តែង ថ្មីៗនេះ នាងបានទៅកាន់ការិយាល័យប៉ូលីសក្នុងតំបន់ ដើម្បីរៀបចំឯកសារលែងលះ មុននឹងនាំកូនស្រីវិលត្រឡប់ទៅផ្ទះរបស់នាងវិញ។ នាងក៏បានបញ្ចេញអារម្មណ៍មួយនេះ «កម្មអ្វីម្ល៉េះទេ! ហេតុអ្វីបានជាខ្ញុំត្រូវមកប្រឈមមុខនឹងម្តាយក្មេកដែលតែងតែបង្កហេតុបែបនេះអុីចឹង?»។
រឿងរ៉ាវនេះ បាននាំឱ្យមានការជជែកវែកញែក នៅក្នុងចំណោមអ្នកលេងអ៊ីនធឺណិតចិន។ ក្នុងនោះ មតិមហាជនជាច្រើនបានរិះគន់ម្តាយក្មេកនោះយ៉ាងធ្ងន់ៗថា «តើអ្នកជាម្តាយក្មេកបែបណា ហេតុអ្វីគ្មានចិត្ត គ្មានបេះដូងបែបនេះ សូម្បីចំពោះចៅ, តើអ្នកដឹងទេថា ការវះកាត់នេះមានការឈឺចាប់ខ្លាំង និងត្រូវថ្នមខ្លួន ដោយមានការយកចិត្តទុកដាក់ពីគ្រួសារដែរឬទេ ព្រោះថាសូម្បីតែមិនអាចផ្លាស់ទីបាន ក្រោយសម្រាល,…»៕ រក្សាសិទ្ធិដោយ៖ លឹម ហុង
