ជារឿងដ៏ហួសចិត្តខ្លាំងណាស់ នៅពេលដែលបានឃើញគេតខ្សែភ្លើងឆ្លងកាត់ក្នុងប្រឡាយទឹកបែបនេះ ដោយមិនគិតពីហានិភ័យគ្រោះថ្នាក់សោះឡើយ ហើយជាលទ្ធផល នៅពេលនេះ បានធ្វើឲ្យបុរសជាជាងភ្លើងម្នាក់ ត្រូវខ្សែភ្លើងក្នុងទឹកឆក់ស្លាប់ម្នាក់ហើយ។
ហេតុការណ៍នេះ បានកើតឡើងនៅត្រង់ចំណុចផ្លូវ៦០ម៉ែត្រ ព្យុងយូ (ផ្សាររាត្រី) ក្នុងភូមិភ្លង់ ឃុំលាងដៃ ស្រុកអង្គរធំ ខេត្តសៀមរាប កាលពីវេលាម៉ោង ៩ និង ០០ នាទីយប់ថ្ងៃទី១៦ ខែសីហា ឆ្នាំ២០២២។
នេះបើតាមគណនីហ្វេសប៊ុកឈ្មោះ Eap Tong Chhan បានបង្ហោះសារទាក់ទងនឹងករណីនេះឲ្យដឹងថា៖ «ពេលខ្ញុំឃើញខ្សែភ្លើងនៅក្នុងទឹក នៅផ្លូវ៦០m ព្យុងយូរអង្គរ មើលទៅគួរអោយខ្លាច តែមិនហ៊ានផុសទេ ទី១ ខ្លាចខ្សែគេឈប់ប្រើ ទី២ខ្លាចអ្នកបានផលប្រយោជន៍គេខឹង តែក្នុងចិត្តខ្ញុំគិតថា ថ្ងៃណាមួយនឹងមានគ្រោះថ្នាក់ដល់មនុស្សពុំខាន តែឥលូវមែន ចំជាងភ្លើងទៀត»។
ក្រោយពីបានឃើញបែបនេះ មហាជនបានសម្តែងការហួសចិត្តថា «មើលទៅដូចដាក់អន្ទាក់ចឹង ម្នាយអាណាយកខ្សែភ្លើងដាក់តាមប្រឡាយ, ជាងភ្លើងភ្លេចដាក់អក្សរ (ង) បើជាងភ្លើងមានអក្សរ (ង) គេអត់ធ្វើភ្លើងក្នុងទឹកទាំងមិនបិទភ្លើងចឹងទេ,…»៕ រក្សាសិទ្ធិដោយ៖ លឹម ហុង
