ប្តីប្រពន្ធវ័យចំណាស់មួយគូ នៅក្នុងប្រទេសអាល្លឺម៉ង់ បាននាំអ្នកជិតខាងផ្ទះរបស់ពួកគេទៅតុលាការ ជុំវិញរឿងចោទប្រកាន់ថាសត្វមាន់ «រងាវ» ខ្លាំង ប្រហែល ២០០ ដងក្នុងមួយថ្ងៃ ដែលរំខានធ្វើឱ្យពួកគេមិនអាចសម្រាកបាន។
លោក Friedrich-Wilhelm អាយុ ៧៦ ឆ្នាំ និងប្រពន្ធរបស់គាត់ឈ្មោះ Jutta មកពីទីក្រុង Bad Salzuflen នៅភាគខាងលិចប្រទេសអាល្លឺម៉ង់ បានអះអាងថា ពួកគេពិតរងការរំខានយ៉ាងខ្លាំងដោយសារតែមាន់គករបស់អ្នកជិតខាងឈ្មោះ Magda ។ មាន់គកនេះត្រូវបានចោទប្រកាន់ថា បានរងាវមិនឈប់ឈរជារៀងរាល់ថ្ងៃ ដោយចាប់ផ្តើមពីម៉ោងប្រហែល ៨ ព្រឹក រហូតដល់ថ្ងៃលិចនៅពេលដែលម្ចាស់ដាក់ទ្រុងជាមួយមាន់ផ្សេងទៀត។ ដោយសារតែអ្នកជិតខាងមិនមានដំណោះស្រាយចំពោះបញ្ហានេះជាច្រើនឆ្នាំបាន នៅពេលនេះ លោក Friedrich និង Jutta បាននាំពួកគេទៅតុលាការដើម្បីដោះស្រាយគ្នា។
លោក Friedrich-Wilhelm បានប្រាប់អ្នកយកព័ត៌មានថា «អ្នកជិតខាងមិនបោះបង់ចោលសត្វមាន់របស់គាត់ទេ ហេតុនេះ តើយើងត្រូវបន្តរស់នៅជាមួយវា ឬយើងត្រូវឈ្នះនៅក្នុងតុលាការ?។ យើងមិនអាចប្រើសួនច្បារ ហើយក៏មិនអាចបើកបង្អួចបានទេ ដោយសារតែមិនអាចទ្រាំនឹងសំឡេងតម្លង់នេះ»។
Jutta ភរិយារបស់គាត់បានបន្ថែមថា៖ «វាពិបាកក្នុងការនិយាយ អំពីការធ្វើទារុណកម្ម ហេតុនេះ យើងមានតែប្រើច្បាប់ជាជម្រើសតែមួយគត់ ដើម្បីដំណោះស្រាយ»។
លោក Michael D. ដែលជាម្ចាស់ Magda បានប្រាប់អ្នកយកព័ត៌មានថា មាន់ជល់ដើរតួនាទីយ៉ាងសំខាន់ ក្នុងចំណោមហ្វូងមាន់របស់គាត់ ខណៈដែលគាត់រក្សាសណ្តាប់ធ្នាប់ក្នុងចំណោមសត្វស្លាបផ្សេងទៀត។
ម្ចាស់មាន់រូបនេះ បានបន្តថា “មេមាន់ត្រូវការមាន់គគនេះ បើមិនដូច្នេះទេ ពួកវានឹងបោចគ្នា”។
ចៅក្រមតុលាការស្រុក Lemgo គ្រោងនឹងបើកសវនាការរឿងក្តីរបស់ Friedrich និង Jutta ក្នុងពេលឆាប់ៗនេះ ហើយនឹងសម្រេចលើជោគវាសនារបស់ Magda នាពេលពេលខាងមុខ៕ រក្សាសិទ្ធិដោយ៖ លឹម ហុង