មនុស្ស ៤០ នាក់បានរួចផុតអាយុជីវិត ១ នាក់ត្រូវបានចាប់ និង ១នាក់ ទៀត បានលង់ទឹកទន្លេ Binh Di បន្ទាប់ពីបានរត់ចេញពីកាសុីណូ Rich World – ទីកន្លែងប្រដូចទៅនឹងឋាននរកនៅលើផែនដី ជាមួយនឹងការដាក់ទណ្ឌកម្មយ៉ាងឃោរឃៅ។
ដោយសារតែមិនមានការងារមានស្ថិរភាព PTTG និងស្វាមី (អាយុ ២៣ ឆ្នាំ រស់នៅខេត្ត Kien Giang) ត្រូវបានមិត្តភ័ក្តិម្នាក់ណែនាំអោយកាន់ប្រទេសកម្ពុជា ដោយធានាថានឹងទទួលបានប្រាក់ខែខ្ពស់។ នៅពេលដែលនាងទៅដល់ទីនោះ នាង G. បានដឹងថា នាងត្រូវបានគេបោកបញ្ឆោតលក់ចូលទៅក្នុងកាស៊ីណូ Rich World ។ ទាំងប្តីទាំងប្រពន្ធពិតជាមានការភិតភ័យណាស់ ប៉ុន្តែត្រូវធ្វើតាមសំណើរបស់អ្នកគ្រប់គ្រងនៅទីនោះ។
ជារៀងរាល់ខែ G. និងប្តី ត្រូវតែរកឲ្យបានគោលដៅ 300 លានដុង ឱ្យអ្នកគ្រប់គ្រង បើមិនដូច្នេះទេ ពួកគេនឹងត្រូវរងការដាក់ពិន័យដោយឆក់ខ្សែភ្លើង។
G. បានរៀបរាប់ទាំងស្រក់ទឹកភ្នែកថា «ពិតជាឃោរឃៅណាស់ ធ្វើទារុណកម្មអ្នកដ៏ទៃ ដោយមិនអាណិតអាសូរ ប្តីខ្ញុំត្រូវគេនាំទៅជាន់ទី៨ ចាប់ដាក់ខ្នោះលើកៅអី ឡោមព័ទ្ធដោយបុរសមាឌធំៗ៣នាក់ កាន់ម្ជុលអគ្គិសនី ចាក់ជើង ដៃ ក ខ្នង ឬកន្លែងផ្សេងទៀតដែលគេចង់ធ្វើ។ ប្តីខ្ញុំត្រូវបានគេចាក់រហូតដល់ដួលសន្លប់ ហើយបន្ទាប់គាត់ដឹងខ្លួនវិញ គាត់ក៏ត្រូវបានកេចាក់ម្តងទៀត នោះជាការដាក់ទណ្ឌកម្មដ៏អាក្រក់មួយ ដែលមនុស្សគ្រប់គ្នាធ្វើនៅទីនោះខ្លាចមានទោសបំផុត»។
វត្តមានក្រុមមនុស្ស ៤២នាក់ ដែលបានប្រថុយជីវិតឆ្លងទន្លេ Binh Di ត្រឡប់ទៅប្រទេសវៀតណាមវិញ នាង D.TND (អាយុ ២០ឆ្នាំ រស់នៅខេត្ត Cao Bang) មិនអាចបំភ្លេចថ្ងៃនឿយហត់នៅក្នុងកាស៊ីណូ Rich World បានទេ។
D បានចាកចេញពីស្រុកកំណើតទៅខេត្តបាក់និញដើម្បីធ្វើការជាកម្មករតាំងពីអាយុ ១៧ ឆ្នាំ។ ប្រហែល៤ខែមុននាងបានពិភាក្សាជាមួយប្តីដើម្បីរកការងារផ្សេង នៅពេលនោះ នាងបានឃើញការងារបង្ហោះនៅលើ Facebook ជាមួយនឹងប្រាក់ខែដ៏គួរឱ្យទាក់ទាញជាង ២៥ លានដុង/ខែ ក៏បានទាក់ទងនឹងមេខ្យល់។ D ត្រូវបានមេខ្យល់នោះណែនាំឱ្យទៅធ្វើការងាយស្រួល ផ្នែកកុំព្យូទ័រក្នុងបន្ទប់ម៉ាសុីនត្រជាក់ ទើបនាងនិងប្តីជឿ ក៏រៀបចំអីវ៉ាន់ឡើងរថយន្តភ្លាមៗតាមការការរៀបចំរបស់ឈ្មួញកណ្តាល។
បន្ទាប់ពីចាកចេញពីស្រុកកំណើតបាន២ថ្ងៃ នៅថ្ងៃទី៣ D បានរកឃើញថា នាងកំពុងស្ថិតនៅប្រទេសកម្ពុជា។ ពេលនោះ នាងភ័យណាស់ចង់ទៅផ្ទះវិញ តែត្រូវថៅកែកាស៊ីណូគំរាមបង្ខំឱ្យសងបំណុល។
ក្នុងខែដំបូង នាងត្រូវបានបង្រៀនពីរបៀបប្រើឈ្មោះហៅក្រៅ ដើម្បីអញ្ជើញអ្នកផ្សេងទៀត ឱ្យចូលរួមក្នុងហ្គេមណាត់ជួប ដោយទាក់ទាញពួកគេឱ្យបញ្ចូលទឹកប្រាក់។ ដោយដឹងពីលក្ខណៈនៃការឆបោក នាងគ្មានជម្រើសអ្វីក្រៅពីធ្វើតាម។
D បានឲ្យដឹងថា “នៅក្នុងនោះ ខ្ញុំគ្រាន់តែស្តាប់បង្គាប់ពួកគេ បើមិនដូច្នេះទេ ខ្ញុំនឹងត្រូវគេវាយដំ សូម្បីតែគំរាមកំហែងដល់អាយុជីវិត។ ហើយមួយខែបើខ្ញុំមិនបានដល់គោលដៅ ៣០០ លានដុង ទេ ខ្ញុំត្រូវបានពួកគេគំរាមកំហែងថានឹងនាំខ្ញុំទៅកន្លែងនោះ (ជាន់ទី៨ ឆក់ខ្សែភ្លើង) ខ្ញុំភ័យណាស់ ខ្ញុំខំប្រឹងទាំងថ្ងៃទាំងយប់ ហត់តែមិនហ៊ានសម្រាក វាព្រៃផ្សៃណាស់ រាល់ពេលនឹកឃើញ ខ្ញុំតែងញាប់ញ័រដោយការភ័យខ្លាច»។
D បាននិយាយទាំងរំភើបចិត្តថា «ក្រុមមនុស្សដែលសម្រេចចិត្តរត់ចេញពីកាស៊ីណូ សំណាងណាស់ដែលដឹងថា ត្រើយម្ខាងនៃទន្លេជាព្រំដែនវៀតណាម។ ខ្ញុំ និងបងប្អូននៅទីនោះ បានទៅបន្ទប់ទឹក ក្រឡេកមើលតាមបង្អួច ហើយឃើញទង់ជាតិវៀតណាមនៅត្រើយម្ខាងនៃទន្លេ ដូច្នេះពូកយើងគិតថា បើយើងអាចហែលទៅត្រើយម្ខាងបាន យើងនឹងមានសំណាងរួចផុតពីឋានរកនៅទីនេះ»។
តាមផែនការ លុះព្រឹកឡើង គណៈគ្រប់គ្រងកាស៊ីណូ មានការធ្វេសប្រហែស មិនបានបិទទ្វារទេ ហើយមានអ្នកចូលបម្រើការងារតែ ៧-៨នាក់ ប៉ុណ្ណោះ។ ក្រោយពីចូលវេនបានប្រហែលមួយម៉ោង ក្រុមកម្មករទាំងអស់ក៏ប្រញាប់ទៅទ្វារព្រមៗគ្នា។ ក្រុមយុវជនដែលមានសុខភាពល្អ បានវាយក្រុមសន្តិសុខ បំបែកការឡោមព័ទ្ធ ដើម្បីឲ្យក្រុមនារី៥នាក់ ចេញមកក្រៅ។ បន្ទាប់មក យុវជនដែលកាន់ «គ្រាប់បែកសាំង» បានគប់នៅផ្លូវបង្កើតឱកាសឱ្យអ្នកដទៃមានពេលរត់គេចខ្លួន។
ឆ្លងកាត់ខ្សែជីវិតដ៏លំបាកវេទនា មនុស្ស៤០នាក់ ដែលមានសំណាងត្រូវបានប្រជាពលរដ្ឋ និងឆ្មាំព្រំដែនជួយសង្គ្រោះ តែ១នាក់ ជាអកុសលត្រូវលង់ទឹកហើយសាកសពទើបត្រូវបានរកឃើញនៅព្រឹកថ្ងៃទី២០ សីហា ខណៈជនរងគ្រោះម្នាក់ទៀតត្រូវបានចាប់ខ្លួនចូលកាសុីណូវិញ ដោយក្រុមសន្តិសុខ។
ភ្នាក់ងារសន្តិសុខស៊ើបអង្កេតនៃប៉ូលីសខេត្ត An Giang បានចេញសេចក្តីសម្រេច ចាប់ខ្លួនមុខសញ្ញាមេខ្យល់២នាក់ឈ្មោះ Nguyen Thi Le (អាយុ ៤២ ឆ្នាំ) និង Le Van Danh (អាយុ ៣៤ ឆ្នាំ) – អ្នកទាំងពីររស់នៅក្រុង Long Binh ស្រុក An Phu ខេត្ត An Giang ដើម្បីស៊ើបអង្កេតលើសកម្មភាពរៀបចំអ្នកដទៃឲ្យចាកចេញពីប្រទេសដោយខុសច្បាប់៕ រក្សាសិទ្ធិដោយ៖ លឹម ហុង
