សារព័ត៌មាន Thai PBS World បានរាយការណ៍ថា តារាសម្តែងស្រីដ៏ល្បីនាង Savika Chaiyadej (ហៅកាត់ថា Pinky) រួមជាមួយម្តាយបង្កើតរបស់នាង Sarinya Chaiyadej និងប្អូនប្រុស Surayuth Chaiydej ស្ថិតក្នុងចំណោមមនុស្ស ១៩ នាក់ ផ្សេងទៀត ត្រូវបានចាប់ខ្លួនកាលពីថ្ងៃទី១៨ ខែសីហា ក្រោមការចោទប្រកាន់ពីបទឆបោក តាមរយៈរយៈកម្មវិធីបោកប្រាស់វិនិយោគហិរញ្ញវត្ថុ Forex-3D។
Pinky និងសាច់ញាតិរបស់នាង បានប្រើលិខិតបញ្ជាក់កម្មសិទ្ធិដីជាវត្ថុបញ្ចាំក្នុងពាក្យសុំនៅក្រៅឃុំ។ តែទោះជាយ៉ាងណា តុលាការឧក្រិដ្ឋកម្មនៃប្រទេសថៃ បានច្រានចោលសំណើរបស់ជនជាប់ចោទ ដោយបារម្ភថា ពួកគេអាចនឹងព្យាយាមរត់គេចខ្លួន។ បន្ទាប់ពីបើកសវនាការ តារាស្រីវ័យ៣៦ឆ្នាំ ម្តាយបង្កើត និងប្អូនប្រុសត្រូវឃុំខ្លួន។
យោងតាម Thaiger បានឱ្យដឹងថា Pinky និងសាច់ញាតិរបស់នាង បានចាប់ផ្តើមផ្សព្វផ្សាយកម្មវិធី Forex-3D នៅខែមករា ឆ្នាំ២០២០។
ក្រៅពី Pinky ប៉ូលិសថៃ ថ្មីៗនេះក៏បានប្រកាសថា តារាពីរនាក់ទៀតក្នុងចំណោមជនសង្ស័យ ១៩ នាក់ដែលប្រឈមមុខនឹងការកាត់ទោសព្រហ្មទណ្ឌគឺមានតារាសម្ដែង Thunsiwat Chantanukul (អាយុ ២៩ ឆ្នាំ) និង Kasem Kolpraneet (អាយុ ៣២ ឆ្នាំ)។ ជនសង្ស័យទាំងពីរនាក់ក៏ត្រូវបានបដិសេធមិនឱ្យនៅក្រៅឃុំដែរ។
នាយកដ្ឋានស៊ើបអង្កេតពិសេសរបស់ប្រទេសថៃ (DSI) បាននិយាយថា មនុស្សប្រហែល ១៤,០០០ នាក់ ត្រូវបានបោកបញ្ឆោតឱ្យវិនិយោគតាមរយៈកម្មវិធី Forex-3D ជាមួយនឹងចំនួនទឹកប្រាក់ប៉ាន់ស្មានសរុបចំនួន ១.៩ ពាន់លានបាត ។ យោងតាមល្បិចរបស់អ្នកឆបោក គឺគេនឹងផ្តល់ប្រាក់ចំណេញទៅឲ្យ “អ្នកត្រូវបានបោក” 60-80% ត្រឡប់មកវិញ ទៅលើការវិនិយោគរបស់ពួកគេ។ តែទោះជាយ៉ាងណា តាមការពិត ជនរងគ្រោះមិនបានទទួលប្រាក់ចំណេញសូម្បីតែមួយរៀលដូចតាមការសន្យា ឬផ្សាយពាណិជ្ជកម្មនៅលើកម្មវិធីរបស់ពួកគេនោះទេ។
DSI ក៏បានប្រគល់ទ្រព្យសម្បត្តិដែលមានតម្លៃប្រហែល ២៣០ លានបាត ដែលរឹបអូសពីក្រុមហ៊ុនវិនិយោគ Forex-3D ដឹកនាំដោយលោក Apirak Kotethi ទៅកាន់ការិយាល័យប្រឆាំងការលាងលុយកខ្វក់ ដើម្បីរក្សាទុក មុនពេលដោះស្រាយ ដើម្បីប្រគល់ទៅឲ្យជនរងគ្រោះវិញ។ ទ្រព្យសម្បត្តិខាងលើរួមមាន រថយន្ត ១៤ គ្រឿង លិខិតបញ្ជាក់ប្រើប្រាស់ដី ១២ គោយន្ត ១១ គ្រឿង ស្លាកលេខថ្លៃ ៩ ខ្សែ នាឡិកាដៃ ឧបករណ៍ហាត់ប្រាណ ៥៤ ឈុត និងគ្រឿងអលង្ការមាសផងដែរ។
DSI បានចាប់ផ្តើមស៊ើបអង្កេតការឆបោកទ្រង់ទ្រាយធំនេះ គឺចាប់ពីថ្ងៃទី៥ ខែតុលា ឆ្នាំ២០១៩ បន្ទាប់ពីជនរងគ្រោះជាច្រើន បានដាក់ពាក្យបណ្តឹងថា Forex-3D គឺជាគ្រោងការបោកប្រាស់។ នៅថ្ងៃទី១៥ ខែមករា ឆ្នាំ២០២១ មេក្លោង Apirak Kotethi ត្រូវបានចាប់ខ្លួនដោយសង្ស័យថា បានប្រព្រឹត្តិការក្លែងបន្លំដោយការស្វែងរកការវិនិយោគសាធារណៈ តាមរយៈវេទិកាអនឡាញដូចជាគេហទំព័រ Forex-3D និងនៅលើ Facebook ។
Savika Chaiyadej គឺជាតារាចម្រៀង តារាសម្តែង និងជាតារាបង្ហាញម៉ូតដ៏ល្បីមួយរូបនៅក្នុងប្រទេសថៃ។ នាងបានលេចមុខក្នុងខ្សែភាពយន្តជាច្រើនដូចជារឿង “កូនអយុត្តិធម៌”, “Catwalk Love Net”, “Step Mother”… ។ Pinky ក៏ជាមិត្តដ៏ល្អរបស់ Tangmo តារាស្រី “ស្លឹកឈើហោះ” ផងដែរ៕ រក្សាសិទ្ធិដោយ៖ លឹម ហុង
