ទិដ្ឋភាពដ៏ភ្ញាក់ស្រឡាំងកាំង ស្ទើរលោះព្រលឹង បង្ហាញអ្នកទេសចររាប់សិបនាក់ ជីករណ្តៅនៅឆ្នេរខ្សាច់ Cua Lo ជម្រៅប្រហែលៗកន្លះម៉ែត្រ រួចដេកសម្រាកលេង… បង្កឱ្យមានមតិចម្រុះ។
កាលពីថ្ងៃទី២៤ ខែសីហា នៅលើបណ្តាញទំនាក់ទំនងសង្គម វីដេអូឃ្លីបមានរយៈពេលជាង១នាទី បានកត់ត្រាមនុស្សរាប់សិបនាក់ កំពុងដេកនៅក្នុងរណ្តៅ នៅលើឆ្នេរខ្សាច់។ បើតាមអ្នកថតវីដេអូ បានប្រាប់ឲ្យដឹងថា ហេតុការណ៍នេះត្រូវបានថតនៅតំបន់ឆ្នេរ Cua Lo ដោយមានមនុស្សរាប់សិបនាក់កំពុងដេកក្នុងរណ្តៅ ដើម្បីងូតក្នុងខ្សាច់។ ប៉ុន្តែ មនុស្សទាំងនេះត្រូវបានឃើញស្លៀកពាក់ធម្មតា ក្នុងនោះ អ្នកខ្លះសូម្បីស្លៀកខោអាវវែង សំពត់ ដេកនៅក្នុងរណ្តៅខ្សាច់ មិនដូចក្នុងស្ថានភាពកំពុងងូតទឹកខ្សាច់នោះទេ។
តែទោះជាយ៉ាងណា តាមរយៈរូបភាពនេះ បានធ្វើឲ្យមនុស្សជាច្រើនបានយល់ច្រឡំថា ពួកគេកំពុងដេកក្នុងផ្នូរ។ វីដេអូដែលល្បីពេញបណ្ដាញសង្គមបានបង្កឲ្យមានមតិចម្រុះ។ ក្នុងនោះមនុស្សជាច្រើន បានរិះគន់ថា ពួកគេមិនគួរធ្វើរឿងឆ្កួតៗបែបនេះទេ ព្រោះថា នេះអាចជាការប្រមាថជីវិតរបស់ពួកគេអុីចឹង។
ទាក់ទិននឹងករណីនេះ លោក Vo Van Tuat ប្រធានគណៈកម្មាធិការប្រជាជនសង្កាត់ Nghi Thuy (ទីប្រជុំជន Cua Lo, Nghe An) បានបញ្ជាក់ថា ហេតុការណ៍នេះបានកើតឡើងនៅក្នុងមូលដ្ឋានរបស់លោក កាលពី ៣ ថ្ងៃមុន។
ជាក់ស្តែង កាលពីព្រឹកព្រលឹមថ្ងៃទី២១ ខែសីហា ក្រុមភ្ញៀវទេសចរប្រមាណ ៣០ នាក់មកពីតំបន់ផ្សេងៗគ្នា បានទៅតំបន់ឆ្នេរ Cua Lo ដោយឆ្លងកាត់ Nghi Thuy ។ មនុស្សទាំងនេះ បន្ទាប់មកបានប្រើប៉ែលដើម្បីជីករណ្តៅខ្សាច់រាប់សិបកន្លែង ដែលមានជម្រៅជាង ៥០ សង់ទីម៉ែត្រ ទទឹងប្រហែល ៦០ សង់ទីម៉ែត្រ និងបណ្តោយប្រហែល ១៧០ សង់ទីម៉ែត្រ។
មនុស្សរាប់សិបនាក់ទាំងនោះ បន្ទាប់មក បានស្លៀកសំលៀកបំពាក់វែងធម្មតា ដេកក្នុងណ្តៅខ្សាច់ ដើម្បីសម្រាកលេង និងថតរូប។
លោក Vo ក៏បានបញ្ជាក់ថា “នៅពេលរកឃើញសេចក្តីរាយការណ៍ពីប្រជាពលរដ្ឋ អាជ្ញាធរមូលដ្ឋាន និងនគរបាលសង្កាត់ បានចេញមកពិនិត្យ និងស្នើសុំឲ្យពួកគេបញ្ឈប់សក្មភាព និងកាយដីលប់វិញ”។ លោកបន្ថែមថា មនុស្សទាំងនេះជីករណ្តៅតាំងពីព្រលឹម ហើយនាំគ្នាងូតទឹកខ្សាច់។
ក្រោយពីសមត្ថកិច្ចចុះពិនិត្យ និងបញ្ជាឲ្យកាយដីចាក់បំពេញរណ្តៅរួច ភ្ញៀវទេសចរមួយក្រុមនោះ ក៏បានចាកចេញពីកន្លែងកើតហេតុ៕ រក្សាសិទ្ធិដោយ៖ លឹម ហុង
