នៅថ្ងៃទី២២ ខែសីហា ឆ្នាំ២០២២ គេហទំព័រ Says បានបង្ហាញពីរឿងរ៉ាវដ៏អស់សំណើចខ្លាំងមួយ របស់បុរសអ្នកដឹកជញ្ជូនវ័យក្មេងម្នាក់ ដែលបានបង្កើតការភ្ញាក់ផ្អើលសម្រាប់មនុស្សជាច្រើនបន្ទាប់ពីរូបថតរបស់គាត់បានលេចឡើងលើបណ្ដាញសង្គម ដោយបង្ហាញថា គាត់ត្រូវបានប៉ូលិសចរាចរណ៍ធ្វើការឃាត់ខ្លួន គោលបំណងផាកពិន័យ ក្នុងករណី “មនុស្ស” អង្គុយពីក្រោយមិនពាក់មួកសុវត្ថិភាព។
ហេតុការណ៍នេះបានកើតឡើងនៅតាមផ្លូវមួយកន្លែងក្នុងទីក្រុង Puerto Princesa ប្រទេសហ្វីលីពីន។ ពិតណាស់ ក្រឡេកពីចម្ងាយ នោះអ្នកអាចមើលឃើញថា «ស្រីស្អាត» ម្នាក់ស្លៀករ៉ូបពណ៌ផ្កាឈូក ពាក់មួកកន្តឹបពណ៌ខៀវ កំពុងអង្គុយពីក្រោយអ្នកបើកម៉ូតូ។ ប៉ុន្តែទីតាំងអង្គុយរបស់ «នាង» គឺមិនធម្មតាទេ ដោយដាក់ដៃនៅលើចង្កេះរបស់អ្នកបើក ហើយថែមទាំងលើកជើងដាក់គងលើភ្លៅរបស់គាត់ ឃើញថាឡើងស្នឹបនឹងគ្នាខ្លាំងតែម្តង។
ទោះជាយ៉ាងណា ក្រោយពីបានសង្កេតឃើញ «ស្រីស្អាត» អង្គុយឱបចង្កេះ អត់ពាក់មួកសុវត្ថិភាពត្រឹមត្រូវ ប៉ូលីសក៏បានហៅឲ្យឈប់។ តែលុះពេលចូលទៅជិត ដើម្បីនិយាយរឿងផាកពិន័យ បានធ្វើឲ្យប៉ូលីសម្នាក់ៗស្ទើរដាច់ផ្ងារ និងអស់សំណើចខ្លាំងតែម្តង ព្រោះថា «អ្នកអង្គុយក្រោយ» នោះ មិនមែនជាមនុស្សទេ តែតាមពិត គឺជា «កូនក្រមុំ» តុកតាជ័រប៉ុណ្ណោះ ហើយ នៅទីបំផុត ប៉ូលីសក៏បានដោះលែង…។
ប្រជាពលរដ្ឋដែលធ្វើដំណើរឆ្លងកាត់ឃើញហេតុការណ៍បាននាំគ្នាថតរូបបង្ហោះលើហ្វេសប៊ុក មុនពេលវាក្លាយជារឿងកំប្លែង ត្រូវបានចែករំលែករាប់ពាន់ដង។ អ្នកលេងអ៊ីនធឺណិតបានសើចចំអក និងអាណិតអ្នកជិះជាខ្លាំងដោយនិយាយថា “គាត់ច្បាស់ជាឯកាណាស់”។
តែយ៉ាងណាមិញ ក្រោយមក គេបានដឹងថា អ្នកដឹកជញ្ជូនវ័យក្មេងនោះ គឺជាបុគ្គលិកនៃក្រុមហ៊ុនដឹកជញ្ជូន Mannequin ហើយគាត់កំពុងដឹកផលិតផលនេះ ទៅឲ្យអតិថិជន។ មូលហេតុដែល «នាង» ត្រូវឱបគាត់យ៉ាងណែនប្រៀបដូចគូស្នេហ៍បែបនេះ គឺដោយសារខ្លាចធ្លាក់ និងខូចខាត៕ រក្សាសិទ្ធិដោយ៖ លឹម ហុង
