Friday, March 29, 2024

ទំនាក់ទំនង : 0716140005

Address : #16 (Borey New World) St. 6A sk . Phnom Penh Thmey kh. Sen Sok ct., Phnom Penh 120913 Office: +85523232725 Tel: 017 93 61 91

ចាប់​មន្ត្រី​ប៉ូលិស​នាយរ​ង​ផ្នែក​បន្ទប់ពិសោធន៍ វាយ​យុវជន​ម្នាក់ ដោយ​គ្មាន​មូលហេតុ ហើយ​ទម្លាក់​ចោល​នៅ​ក្រសួង​មហាផ្ទៃ​

spot_img

​​ភ្នំពេញ ៖ ប៉ូលិស​វ័យក្មេង​ម្នាក់​ដែល​មាន​ឋានន្តរស័ក្តិ​ព្រិន្ទបាលឯក ជា​នាយរង​ផ្នែក​បន្ទប់ពិសោធន៍ ក្នុងចំណោម​បក្ខពួក​ជាច្រើន​នាក់ បែរ​ជា​ហ៊ាន​ប្រើអំពើហិង្សា វាយដំ​យុវជន​ម្នាក់​បែក​មុខ​បែក​មាត់ យក​ទៅ​បោះចោល​នៅក្នុង​ក្រសួង​មហាផ្ទៃ កាលពី​យប់​ថ្ងៃ​ទី​២៤ ខែ​ឧសភា ឆ្នាំ​២០១៨ នៅ​ចំណុច​ផ្លូវ​លេខ​៣៦០ កែង​ផ្លូវ​១០៥ សង្កាត់​បឹង​កេងកង​ទី​៣ ខណ្ឌចំការមន​។​

​បន្ទាប់ពី​ហេតុការណ៍​នេះ​កើតឡើង និង​មាន​សំណូមពរ​ស្រែក​យក​យុត្តិធម៌​ពី​ក្រុម​គ្រួសារ​ជនរងគ្រោះ​នោះ មន្ត្រីប៉ូលិស​ដែល​ជា​ជនដៃដល់​រូប​នេះ បាន​សមត្ថកិច្ច​ធ្វើការ​ឃាត់ខ្លួន ដើម្បី​ចាត់ការ​តាមច្បាប់​។ ប៉ូលិស​រូប​នោះ ឈ្មោះ សុន ពិសា​ល អត្តលេខ ៧៤៨៤០ ឋានន្តរស័ក្តិ​ព្រិន្ទបាលឯក ជា​នាយរង​ផ្នែក​បន្ទប់ពិសោធន៍​នៅ​នាយកដ្ឋាន​នគរបាល​ប​ច្ចេស​ទេស​និង​វិទ្យាសាស្ត្រ កើត​ឆ្នាំ​១៩៩៣ ស្នាក់​នៅផ្ទះ​លេខ ២៦៣​បេ ផ្លូវ​លេខ​២៦១ សង្កាត់​ទឹកល្អក់​២ ខណ្ឌ​ទួលគោក រាជធានី​ភ្នំពេញ ហើយ​បក្ខពួក​ជាច្រើន​នាក់​ទៀត​សមត្ថកិច្ច​កំពុង​ស្វែង​ចាប់ខ្លួន​ផងដែរ ខណៈ​បាន​គេចខ្លួន​បាត់​អស់​។ ចំ​ណែក​ជនរងគ្រោះ​ឈ្មោះ អ៊ឹម បញ្ញា ភេទ​ប្រុស អាយុ ២៤​ឆ្នាំ ស្នាក់​នៅផ្ទះ​លេខ​៣៨៤ ផ្លូវលំ ភូមិ​រោងចក្រ សង្កាត់​គោក​ឃ្លោង ខណ្ឌ​សែន​សុខ រាជធានី​ភ្នំពេញ​។​

​សូមបញ្ជាក់​ថា សមត្ថកិច្ច​នគរបាល​មួយក្រុម ចាប់​វាយ​យុវជន​ម្នាក់ និង​បាន​ដាក់​ខ្នោះ​ផងដែរ រួចហើយ​ចាប់​អូស​ឡើងលើ​ម៉ូតូ​កង់​បី យកទៅ​ទម្លាក់​ចោល នៅក្នុង​ក្រសួង​មហាផ្ទៃ ដោយ​មិន​ដឹង​ពី​មូលហេតុ​ច្បាស់លាស់ ហើយ​ក្រុម​សមត្ថកិច្ច​ឯកសណ្ឋាន​ស៊ីវិល បាន​គេចខ្លួន​បាត់ បង្ក​ឲ្យ​ភ្ញាក់ផ្អើល កាលពី​វេលា​ម៉ោង​៧ និង​៣០​នាទី យប់​ថ្ងៃ​ទី​២៤ ខែ​ឧសភា ឆ្នាំ​២០១៨ ស្ថិតនៅតាម​បណ្តោយ​ផ្លូវ​លេខ​៣៦០ កែង​ផ្លូវ​១០៥ ស្ថិតក្នុង​សង្កាត់​បឹង​កេងកង​ទី​៣ ខណ្ឌចំការមន​។ សាច់ញាតិ​យុវជន ដែល​សមត្ថកិច្ច ចាប់​វាយ​បែក​មុខ និង​ដាក់​ខ្នោះ យកទៅ​ទម្លាក់​ចោល នៅក្នុង​ក្រសួង​មហាផ្ទៃ បាន​អំពាវនាវ​ដល់​ថ្នាក់ដឹកនាំ​រដ្ឋាភិបាល ជួយ​ស្វែងរក​យុវត្តិធម៌​។​

​សាក្សី​ដែល​ឃើញ​ហេតុការណ៍​បានឲ្យដឹងថា មុនពេល​កើតហេតុ គេ​ឃើញ​យុវជន​ម្នាក់ ត្រូវបាន​សមត្ថកិច្ច​មា​ន​គ្នា ប្រមាណ​៤​ទៅ​៥​នាក់ ស្លៀកពាក់​ស៊ីវិល និង​មាន​ម្នាក់​ពាក់​ឯកសណ្ឋាន​ប៉ូលិស សុទ្ធតែ​មាន​កាន់​វិទ្យុទាក់ទង និង​អាវុធ​។ ពេលនោះ​សមត្ថកិច្ច បានធ្វើ​សកម្មភាព ចាប់ និង​វាយ​យុវជន​រូបនោះ រួចហើយ​ចាប់​អូស​ចេញពី​ហាង​មួយ ឡើង​លើ​ម៉ូតូ​កង់​បី​ឥណ្ឌា និង​បាន​យកទៅ​ទម្លាក់​ចោល នៅក្នុង​ក្រសួង​មហាផ្ទៃ​។​

​ស្ត្រី​ឈ្មោះ វត្តី អាយុ​២៨​ឆ្នាំ ជា​បងស្រី​បង្កើត របស់​យុវជន​រងគ្រោះ បានបញ្ជាក់​ថា រូបនាង និង​ស្វាមី បាន​ទទួល​ទូរស័ព្ទ​ពី​ប្រជាពលរដ្ឋ នៅ​កន្លែងកើតហេតុ​ប្រាប់ថា ប្អូនប្រុស​របស់​នាង​ត្រូវ បាន​សមត្ថកិច្ច​ស្លៀកពាក់​ស៊ីវិល និង​ម្នាក់​ពាក់​ឯកសណ្ឋាន​ប៉ូលិស មាន​គ្នា​ប្រមាណ​៤​ទៅ​៥​នាក់ វាយ រួច​ហើយ​ប្អូនប្រុស​របស់​នាង បាន​រត់​ចូល​ទៅក្នុង​ហាង​មួយ ដែល​នៅក្បែរ​កន្លែង​កើតហេតុ ក៏​ត្រូវ​សមត្ថកិច្ច​ទាំងនោះ ចូល​ទៅ​ចាប់​ដល់​ក្នុង​ហាង​នោះ​ទៀត​។​

​អ្នកនាង វត្តី បាន​និយាយថា គ្រាន់តែ​ឮ​ដំណឹង​នេះ​ភ្លាម នាង និង​ស្វាមី បាន​ជិះ​ម៉ូតូ​មកដល់ កន្លែងកើតហេតុ ប៉ុន្តែ​មិនឃើញ​ប្អូនប្រុស​នោះទេ ដោយ​គេ​ប្រាប់ថា សមត្ថកិច្ច​ទាំងនោះ យក​ទៅ​ប៉ុស្តិ៍​រដ្ឋបាល​បឹង​កេងកង​ទី​៣ រួច​ហើយ​នាង និង​ស្វាមី ក៏​បាន​ទៅ​កាន់​ប៉ុស្តិ៍​រដ្ឋបាល​បឹង​កេងកង​ទី​៣ តែ​សមត្ថកិច្ច​ប៉ុស្តិ៍​ម្នាក់​នៅ​ទីនោះ និយាយ​ដោយ​ខ្លី​ថា រឿងនេះ​ការងារ​របស់​ខាង​សមត្ថកិច្ច​ក្រសួង​មហាផ្ទៃ ខាង​ប៉ុស្តិ៍​អត់​ដឹង​ទេ​។​

​អ្នកនាង វត្តី បាន​បញ្ជាក់ទៀតថា ពេល​សមត្ថកិច្ច​ប៉ុស្តិ៍​រដ្ឋបាល​បឹង​កេងកង​ទី​៣​និយាយ​ដូច្នេះ រូបនាង និង​ស្វាមី ក៏​បាន​ទៅ​ដល់​ក្រសួងមហាផ្ទៃ ប៉ុន្តែ​ពេល​ទៅដល់ ឃើញ​តែ​ប្អូនប្រុស​របស់​នាង​ប៉ុណ្ណោះ កំពុង​ដេក​ហូរឈាម នៅ​លើ​ម៉ូតូ​កង់​បី​ឥណ្ឌា​ម្នាក់ឯង តែ​មិនឃើញ​សមត្ថកិច្ច ដែល​ចាប់ខ្លួន​ប្អូនប្រុស របស់​នាង​នោះ​ទេ​។​
​នាង និង​ស្វាមី បាន​នាំ​ប្អូនប្រុស មក​សង្គ្រោះ​បន្ទាន់ នៅឯ​មន្ទីរ​ព្យាបាល​បាយ័ន ដែល​នៅ​ជិត​ស្ពាន​អាកាស​ក្បាលថ្នល់​។​

​ក្នុង​ពេល​កើតហេតុ​នោះ បើ​កុំ​តែ​បាន​ប្រជាពលរដ្ឋ​នៅ​ទីនោះ​ជួយ​ឃាត់ កុំ​អី​ប្រហែល​ជា​សមត្ថកិច្ច​ទាំងនោះ វាយ​យុវជន​រូបនោះ​ស្លាប់បាត់​ទៅ​ហើយ​។​

​សូមបញ្ជាក់​ថា ជនរងគ្រោះ​រងរបួស​ធ្ងន់​ត្រង់​ចិញ្ចើម​ខាងស្តាំ និង​ដៃ​មាន​ជាប់​ខ្នោះ​នៅឡើយ​ពេល​នាំ មក​ដល់​មន្ទីរពេទ្យ​។ បន្ទាប់​ពី​គ្រូពេទ្យ​ធ្វើការ​ព្យាបាល​រួច ក្រុមគ្រួសារ​យុវជន​រងគ្រោះ ត្រូវបាន​នាំ​ទៅកាន់​មន្ទីរពេទ្យ​ផ្សេង ដែល​នៅ​ក្បែរ​ផ្ទះ​នៅ​ឯ​ចោមចៅ​។ ក្រុមគ្រួសារ​យុវជន​រងគ្រោះ បាន​ស្នើ​ដល់​ថ្នាក់ដឹកនាំ​រដ្ឋាភិបាល សុំ​ជួយ​រក​យុត្តិធម៌​ដល់​ជន​រងគ្រោះ​ផង ព្រោះ​ក្រុម​សមត្ថកិច្ច​ទាំងនោះ វាយ​ជនរងគ្រោះ​រួច យកទៅដាក់​ក្នុង​ក្រសួងមហាផ្ទៃ ដោយ​មិន​ពី​មូលហេតុ​ច្បាស់លាស់ ហើយ​បាន​គេចខ្លួន​មិន​ទទួលខុសត្រូវ​នោះឡើយ ។​

ប៉ុន្តែ​ប្រភព​មួយ​ផ្សេង​ទៀត ពី​កន្លែងកើតហេតុ បានបញ្ជាក់​ថា រឿងនេះ កើតឡើង​ដោយសារ​មាន​ប៉ូលិស​ម្នាក់​បាត់​ម៉ូតូ ហើយ​បាន​ទៅ​សួរ​ជន​រងគ្រោះ​ថា មាន​បាន​ឃើញ​ជន​ណា​លួច​ម៉ូតូ​គាត់​ឬ​ទេ​? ស្រាប់តែ​ពីរ​ថ្ងៃ​ក្រោយមក ប៉ូលិស ដដែល​នោះ បាន​ហៅ​ជនរងគ្រោះ ឲ្យទៅជួយ​ស្វែងរក​ចោរលួច​ម៉ូតូ​។ ជនរងគ្រោះ​ក៏​យល់ព្រម តែ​ប៉ូលិស​ទាមទារ​ឲ្យ​ជនរងគ្រោះ​យក​ម៉ូតូ របស់​ជនរងគ្រោះ ជិះ​ជូន​ទៅ​រក​ចោរ ដោយ​ប៉ូលិស​ជា​អ្នកបើក​ម៉ូតូ​។​

ពេល​ស្វែងរក​ចោរ ប៉ូលិស​បើក​ម៉ូតូ គ្មាន​ទិសដៅ​។ ជន​រងគ្រោះ​ឃើញ​សភាពការណ៍​មិន​ស្រួល ក៏​ទូរស័ព្ទ​ទៅ​ប្រាប់​ម្តាយ ប៉ូលិស​ឃើញ​ដូច្នោះ ក៏​ទាញ​ទូរស័ព្ទដៃ ពី​ជនរងគ្រោះ​ក្រវែង​ចោល​។ ជនរងគ្រោះ​ដឹងខ្លួន ក៏​លោត​ចុះ​ពី​ម៉ូតូ រ​ត់ចូលទៅ​ក្នុង​ហាង​បាយ ឲ្យ​ប្រជាជន​ជួយ​។ ពេលនោះ ប៉ូលិស ហៅ​គ្នីគ្នា​ពីរ​បី​នាក់​ទៀត ទៅ​វាយដំ​ជនរងគ្រោះ ទាញ​យក​ចេញ​ពី​ហាង​បាយ យកទៅ​ទម្លាក់​ចោល​នៅ​ក្រសួង​មហាផ្ទៃ ប៉ុន្តែ​ពេល​សាច់ញាតិ​យុវជន​រងគ្រោះ​ទៅ​ដល់​ក្រសួង​មហាផ្ទៃ ឃើញ​តែ​យុវជន​រងគ្រោះ​ដេក​ហូរឈាម លើ​ម៉ូតូ​កង់​បី​ម្នាក់ឯង មិន​មាន​សមត្ថកិច្ច​ចេញមុខ​មក​ទទួល​ខុស​ត្រូវ​នោះឡើយ​៕ ​ដោយ​៖​បញ្ញា​ស័ក្តិ​

spot_img
×