វីដេអូមួយ ត្រូវបានបង្ហោះលើបណ្តាញសង្គមប្រទេសចិន បានបង្ហាញរូបភាពឪពុកកូនក្រមុំអង្គុយលើកៅអី ក្នុងពេលកូនក្រមុំ និងកូនកម្លោះលត់ជង្គង់នៅចំពោះមុខលោក ។ នេះជាផ្នែកមួយក្នុងប្រពៃណីជូនទឹកតែក្នុងអាពាហ៍ពិពាហ៍តាមទំនៀមទម្លាប់ចិន ។
បុរសអាយុ ៦២ឆ្នាំ ដកក្រដាសមួយសន្លឹកចេញពីហោប៉ៅខោ រួចចាប់ផ្តើមអានពាក្យផ្តែផ្តាំដ៏គួរឲ្យរំជួលចិត្តដល់កូនប្រសា និងកូនស្រីគាត់ ។
“ខ្ញុំជាមនុស្សដំបូងឱបវា (កូនក្រមុំ) ពុំមែនជាឯង ។ ខ្ញុំជាមនុស្សដំបូងថើបវា ពុំមែនឯង ។ ខ្ញុំជាមនុស្សដំបូងស្រឡាញ់វា ពុំមែនឯង” គាត់និយាយមួយៗ ។
យកដៃកៀសទឹកភ្នែកចេញ គាត់បន្តទៀតថា “តែខ្ញុំសង្ឃឹមថា ឯងនឹងជាមនុស្សអាចនៅក្បែរវាអស់មួយជីវិត ។ ប្រសិនមានថ្ងៃមួយ ពេលឯងមិនស្រឡាញ់វាទៀត កុំនិយាយជាមួយវា តែចូរនិយាយជាមួយខ្ញុំ ។ ខ្ញុំនឹងទៅយកវាមកផ្ទះវិញ” ។
ពាក្យផ្តែផ្តាំរបស់ឪពុកកូនក្រមុំបានធ្វើឲ្យមនុស្សគ្រប់គ្នានៅទីនោះទប់ទឹកភ្នែកមិនជាប់ ។
វីដេអូដ៏រំជួលចិត្តខាងលើ ត្រូវបានថតដោយ Ting Yi Yeh ប្អូនស្រីកូនក្រមុំក្នុងអាពាហ៍ពិពាហ៍បងស្រីរបស់ខ្លួននៅទីក្រុងកាវសុង ភាគខាងត្បូងកោះតៃវ៉ាន់ កាលពីចុងសប្តាហ៍មុន ។
កូនក្រមុំ Zheng Wen Yeh និយាយប្រាប់ Daily Mail ថា នាងមិនចង់និយាយពាក្យលាគ្នាជាមួយឪពុកនាងក្រោយរៀបការ ។ “ខ្ញុំមិនចង់ចាកឆ្ងាយពីប៉ា ។ ខ្ញុំចង់នៅក្បែរដើម្បីមើលថែទាំគាត់អស់មួយជីវិត ។ ខ្ញុំដឹងគុណប៉ាម៉ាក់ខ្ញុំបំផុត ។ ខ្ញុំនឹងគោរពស្រឡាញ់ប៉ាជារៀងរហូត” ។
តាម Ting Yi Yeh ឪពុកនាងមិនបានរៀនសូត្រខ្ពស់ តែជាមនុស្សម៉ឺងម៉ាត់ និងមិនសូវនិយាយស្តី ។ “ពួកខ្ញុំមិនបានជិតស្និទ្ធជាមួយប៉ា” ។ ប៉ុន្តែគ្រប់យ៉ាង បានប្រែប្រួលមុននេះ ។ ឆ្នាំពេលបងប្អូននាងទាំង៣ ត្រូវបាត់បង់ម្តាយ ៕