Sunday, November 28, 2021

អភិបាលខេត្ត​ស្វាយរៀង​ជំ​រុញឱ្យ​នាយទាហាន​នាយទាហានរង និង​ពលទាហាន​វរៈ​សេនា​តូច​លេខ​២០១​ទាំងអស់ ត្រូវ​ស្គា​ល់ពី​ផែនទី​និង​តាំង​ភូមិសាស្ត្រ​របស់​ខេត្តស្វាយរៀង​

​ខេត្តស្វាយរៀង ៖ លោក​ម៉ែន វិបុល អភិបាលខេត្ត​ស្វាយរៀង​និង​ជា​ប្រធាន​គណៈបញ្ជាការ​ឯកភាព​ខេត្ត​បាន​មានប្រសាសន៍ថា ៖ នាយទាហាន​នាយទាហានរង​និង​ពលទាហាន​វរៈ​សេនា​តូច​លេខ​២០១​ទាំងអស់ ត្រូវ​ស្គា​ល់ពី​ផែនទី​និង​តាំង​ភូមិសាស្ត្រ​របស់​ខេត្តស្វាយរៀង​ឱ្យបាន​ច្បាស់​ជៀសវាង​មានការ​ភ័​ន្ទ​ច្រឡំ​ហើយ​ត្រូវមាន​ភារកិច្ច​ទទួលខុស​ត្រូវ​នៅតាម​ទីតាំង​ឈរជើង​នីមួយៗ​ឱ្យ​កាន់តែ​ទទួលបាន​ជោគជ័យ​ក្នុងការ​បំពេញភារកិច្ច​ក្នុង​បេស​ម្ម​ជាក់ស្តែង​។

​លោក​អភិបាលខេត្ត​ស្វាយរៀង​បាន​មានប្រសាសន៍​ដូច្នេះ​ក្នុងឱកាស​ដែល​លោក​បាន​អញ្ជើញ​ជា​អធិបតី​នៅក្នុង​ពិធី​បើក​វគ្គ​ហ្វឹកហ្វឺន​ជំនាញ​ការពារ​ព្រំដែន​នៅ​ទីបញ្ជាការ​វរៈ​សេនា​តូច​ការពារ​ព្រំដែន​គោក​លេខ​២០១​ថ្ងៃ ទី​៦ ខែវិច្ឆិកា​ឆ្នាំ​២០១៧​នេះ ព្រមទាំង​មានការ​អញ្ជើញ​ចូលរួម​ផងដែរ​ពី​សំណាក់​លោក​មេបញ្ជាការ មេ​បញ្ជា​រង​តំបន់សឹករង​ស្វាយរៀង​លោក​មេបញ្ជាការ​វរៈ​សេនា​តូច​ការពារ​ព្រំដែន​គោក​លេខ​២០១​និង​សិក្ខាកាម​សរុប​១០៥​នាក់​ដែលមាន​រយៈពេល​ហ្វឹកហ្វឺន​ចំនួន​៤៥​ថ្ងៃ​។ លោក​បាន​មានប្រសាសន៍​បន្តទៀតថា នេះ​ជា​លើក​ទី​២​ហើយ​ក្នុងនាម​ជា​អភិបាល​ខេត្តស្វាយរៀង​ដែល​លោក​បាន​អញ្ជើញ​ចូលរួម​ក្នុង​ពិធី​បើក​វគ្គ​ហ្វឹកហ្វឺន​ជំនាញ​ដល់​នាយទាហាន នាយទាហានរង​និង​ពលទាហាន​ដែល​កាលពី​លើក​ទី​១​គឺ​បើក​វគ្គ​ហ្វឹកហ្វឺន​បំប៉ន​លំ​ហាត់​របៀប​ក្បាច់គុណ អប់រំ​ចិត្តសាស្ត្រ ដែល​បាន​ប្រា​ព្ធ​ធ្វើ​នៅ​ទីបញ្ជាការ​សឹក​រង​ស្វាយរៀង​នា​ថ្ងៃទី​១​ខែវិច្ឆិកា​ឆ្នាំ​២០១៦​កន្លងទៅ​។​

​លោក​អភិបាលខេត្ត​ស្វាយរៀង​ក៏បាន​ថ្លែង​នូវ​ការកោតសរសើរ​ចំពោះ​កិច្ចខិតខំ​ប្រឹងប្រែង​រប​ស់​ថ្នាក់ដឹកនាំ​បញ្ជាការដ្ឋាន​តំបន់​ប្រតិបត្តិការ​សឹក​រង​ស្វាយរៀង ដែល​បានរៀបចំ​នូវ​វគ្គ​ហ្វឹកហ្វឺន​នេះ​ឡើង ដែល​វគ្គ​សិក្សា​នេះ​ពិត​ជាមាន​សារៈសំខាន់​ព្រមទាំង​រួមចំណែក​ក្នុងការ​កសាង​ប្រភពធនធាន​មនុស្ស​ក្នុង​កងយោធពល​ខេមរៈភូមិន្ទ ដើម្បី​ពង្រឹងពង្រីក​នូវ​សមត្ថភាព​ការពារ​បូរណភាព​ទឹកដី ការពារ​ខ្សែរ​បន្ទាត់​ព្រំដែន​និង​ការពារជាតិ​មាតុភូមិ​ផ្តល់ឱ្យ​សិក្ខាកាម​គ្រប់រូប​បាន​យល់ច្បាស់​នូវ​យុទ្ធវិធី​និង​ជំនាញ​ច្បាស់លាស់​ពិតប្រាកដ​ក្នុង​កិច្ចការពារ​ព្រំដែន​ធ្វើឱ្យ​យោធិន​តាម​បណ្តា​កង​អង្គភាព ដែលមាន​ភារកិច្ច​ទទួល​ខុសត្រូវ​នៅតាម​ទីតាំង​ឈរជើង​នីមួយៗ​កាន់តែ​ទទួលបាន​ជោគជ័យ​ក្នុងការ​បំពេញភារកិច្ច​ក្នុង​បេសកម្ម​ជាក់ស្តែង​។​

​លោក ម៉ែន វិបុល ក៏បាន​សំដែង​នូវ​ការ​កោតរ​សើរ​និង​វាយ​តំលៃ​ខ្ពស់​ចំពោះ​តំបន់​ប្រ​តឹ​ប​ត្តិ​ការ​សឹក​រង​ស្វាយរៀង នាយទាហាន នាយទាហានរង ពលទាហាន​ទាំងអស់​ដែល​កន្លងមក​បាន​ចូលរួម​យ៉ាងសកម្ម​ក្នុង​កិច្ចការ​សង្គម​និង​ការជួយ​សង្គ្រោះ​ប្រជាពលរដ្ឋ​ពេល​ជួបប្រទះ​នូវ​គ្រោះមហន្តរាយធម្មជាតិ គ្រោះថ្នាក់​សង្គម​ផ្សេងៗ​និង​ក្នុង​ការងារ​ថែរក្សា​សន្តិសុខ សុវត្ថិភាព​សណ្តាប់ធ្នាប់ សាធារណៈ​នៅក្នុង​ពិធី​ប្រណាំងទូក​នៅ​ទន្លេ​វ៉ៃ​គោ កាលពី​ថ្ងៃទី​២៨ ខែតុលា ឆ្នាំ​២០១៧ និង​ការសហការ​ទប់ស្កាត់បាន​មិន​ឱ្យមាន​បាតុកម្ម​អសកម្ម​ណាមួយ​កើតឡើង នៅក្នុង​អំឡុងពេល​នៃ​ចំណាត់ការ​របស់​រាជ​រដ្ឋាភិបាល​ទៅលើ​បុគ្គល កឹម សុខា និង​គណបក្ស​សង្គ្រោះ​ជាតិ​ដែល​កន្លងមក​បានចេញ​ញ្ញ​តិ្ត ចំនួន​២ លើក​គឺ​លើក​ទី​១ ញ្ញត្តិ​គាំទ្រ​ចំពោះ​ចំណាត់ការ​របស់​រាជរ​ដ្ឋា​ភិ​បាល​ទៅលើ​បុគ្គល កឹម សុខា លើក​ទី​២ ញ្ញត្តិ​ថ្កោលទោស​ចំពោះ​ការ​ញុះញង់​របស់​ទណ្ឌិត សម ង្ស៊ី ដែល​បាន​អំពាវនាវ​ឱ្យ​កងកំលាំង​បង្វែរ​ចុងការ​ណុង​ផ្តួលរំលំ​រាជរដ្ឋាភិបាល​ស្របច្បាប់​ដែល​ទាំងអស់នេះ​ពិតជា​បានបង្ហាញ​ឱ្យឃើញ​ពី​ឆ​ន្ទះ​និង​ភក្តីភាព​ដ៏​មោះមុត​របស់​នាយទាហាន នាយទាហានរង​និង​ពលទាហាន​ទាំងអស់​ក្នុងការ​ការពារ​សន្តិភាព​និង​សន្តិសុខ​របស់​ប្រទេសជាតិ ការពារ​រាជរដ្ឋាភិបាល​និង​ប្រឆាំង​ដាច់ខាត​ចំពោះ​បុគ្គល​ណា ឬ ក្រុម​ណា​ដែល​មានបំណង​ផ្តួលរំលំ​រាជរដ្ឋាភិបាល​ស្របច្បាប់​។​

​លោក​ម៉ែន វិបុល ក៏បាន​ក្រើនរំលឹក​ឱ្យ​សិក្ខាកាម​ទាំងអស់​ត្រូវ​យកចិត្តទុកដាក់​សិក្សា​រៀនសូត្រ​និង​ស្តាប់​គ្រូ​ឧទ្ទេសនាម​ដើម្បី​ទទួលបាន​នូវ​ចំណេះដឹង​ថ្មីៗ​បន្ថែមទៀត​យកទៅអនុវត្ត​ជាក់ស្តែង​ឱ្យ​ទទួលបាន​លទ្ធផល​ជោគជ័យ​នឹង​ទទួលបាន​ចំណេះដឹង​ថ្មីៗ​ជា​ប្រយោជន៍​សំរាប់​ការបំពេញ​តួនាទី​ប្រចាំថ្ងៃ​បម្រើ​ជាតិ មាតុភូមិ និង​ប្រជាជន​៕​វ៉ៃ​កូ​