ភ្នំពេញ ៖ បន្ទាប់ពីបញ្ចប់ការសាកសួរ លោក តុប ឈុនហេង ចៅក្រមស៊ើបសួរសាលាដំបូងរាជធានីភ្នំពេញ ចេញដីកាបង្គាប់ឲ្យឃុំខ្លួននគរបាលទំនើង ឈ្មោះសុន ពិសាល ដែលបានវាយយុវជនម្នាក់ឲ្យបែកមុខបែកមាត់នោះ ដាក់ពន្ធនាគារជាបណ្តោះអាសន្ន នៅរសៀលថ្ងៃទី២៧ ខែឧសភា ឆ្នាំ២០១៨។
នគរបាល ឈ្មោះសុន ពិសាល អត្តលេខ ៧៤៨៤០ ឋានន្តរស័ក្តិព្រិន្ទបាលឯក នាយរងផ្នែកបន្ទប់ពិសោធន៍ នៃនាយកដ្ឋាននគរបាលបច្ចេសទេស និងវិទ្យាសាស្ត្រ ត្រូវបានលោក ចែ សុង ព្រះរាជអាជ្ញាអមសាលាដំបូងរាជធានីភ្នំពេញ សម្រេចចោទប្រកាន់ហើយពីបទ “ប្រើហិង្សាដោយចេតនា មានស្ថានទម្ងន់ទោស” នៃក្រមព្រហ្មទណ្ឌ នៅរសៀលថ្ងៃទី២៧ ខែឧសភា ឆ្នាំ២០១៨នេះ ត្រូវបានគេបញ្ជូនទៅចៅក្រមស៊ើបសួរភ្លាមៗ ដើម្បីសម្រចថា នឹងត្រូវឃុំខ្លួនមន្ត្រីនគបាលរូបនេះដាក់ពន្ធនាគារឬយ៉ាងណា ប៉ុន្តែបញ្ចប់ការសន្និដ្ឋាន លោក តុប ឈុនហេង ចៅក្រមស៊ើបសួរសាលាដំបូងរាជធានីភ្នំពេញ ចេញដីកាបង្គាប់ឲ្យឃុំខ្លួននគរបាលទំនើងរូបនោះតែម្តង។
គួររំលឹកថា កាលពីថ្ងៃទី២៦ ខែឧសភា ឆ្នាំ២០១៨ នគបាលការិល័យព្រហ្មទណ្ឌកម្រិតធ្ងន់ នៃនាយកដ្ឋានព្រហ្មទណ្ឌក្រសួងមហាផ្ទៃ បានបញ្ជូនខ្លួននគរបាលវ័យក្មេងទំនើង ធ្លាប់មានប្រវត្តិបន្លំយកតួនាទី ដើម្បីជម្រិតយកទ្រព្យសម្បត្តិរបស់ប្រជាពលរដ្ឋ និងបានប្រើហិង្សាលើជនស៊ីវិលនាពេលកន្លងមក ទៅតុលាការ ដើម្បីចាត់ការទៅតាមច្បាប់។
លោកវរសេនីយ ជាវ វិបុល ប្រធានការិយាល័យព្រហ្មទណ្ឌកម្រិតធ្ងន់ បានឲ្យដឹងថា មន្ត្រីនគរបាលរូបនេះ ក្នុងចំណោមបក្ខពួករបស់គេមួយក្រុម បានប្រើអំពើហិង្សាលើជនរងគ្រោះកាលពីយប់ថ្ងៃទី២៤ ខែឧសភា ឆ្នាំ២០១៨ នៅចំណុចផ្លូវលេខ៣៦០ កែងផ្លូវ១០៥ សង្កាត់បឹងកេងកងទី៣ ខណ្ឌចំការមន។
ជនរងគ្រោះក្នុងហេតុការណ៍នេះ មានឈ្មោះ អ៊ឹម បញ្ញា ភេទប្រុស អាយុ ២៤ឆ្នាំ ស្នាក់នៅផ្ទះលេខ ៣៨៤ ផ្លូវលំ ភូមិរោងចក្រ សង្កាត់គោកឃ្លោង ខណ្ឌសែនសុខ រាជធានីភ្នំពេញ។ ជនរងគ្រោះគេឃើញមានស្នាមរងរបួសធ្ងន់ត្រង់ចិញ្ចើមខាងស្តាំ និងដៃមានជាប់ខ្នោះនៅឡើយពេលនាំទៅដល់មន្ទីរពេទ្យ។ បើតាមសាក្សីដែលឃើញហេតុការណ៍ផ្ទាល់ភ្នែកបានឲ្យដឹងថា មុនកើតេហេតុគេឃើញក្រុមជនបង្ករបានចាប់ និងវាយយុវជនរងគ្រោះ រួចហើយចាប់អូសឡើងលើម៉ូតូកង់បីដឹកយកទៅទម្លាក់ចោលនៅក្នុងក្រសួងមហាផ្ទៃ ។
បើតាមការចុះផ្សាយរបស់សារព័ត៌មាន នគរបាលជាតិ បានបញ្ជាក់ថា អនុប្រធាននាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ លោកឧត្តមសេនីយ៍ទោ ស៊ុយ សុគន្ធា បានប្រាប់ឲ្យដឹងនៅរសៀលថ្ងៃទី២៧ ខែឧសភា ឆ្នាំ២០១៨នេះថា ករណីមន្ត្រីនគរបាលដែលវាយប្រជាពលរដ្ឋម្នាក់ បណ្ដាលឲ្យរងរបួសរួចយកទៅទម្លាក់ ក្នុងក្រសួងមហាផ្ទៃនោះ គឺដោយសារខឹងជនរងគ្រោះ មិនប្រាប់កន្លែងស្នាក់នៅ អ្នកដែលយកម៉ូតូមិត្តភក្តិជនបង្កទៅបញ្ចាំ ទើបកើតជាហិង្សាតែម្ដង ។
លោកអនុប្រធាននាយកដ្ឋាន បានរៀបរាប់ថា ជនបង្កសារភាពថា នៅថ្ងៃទី២២ ខែឧសភា ឆ្នាំ២០១៨ មិត្តភក្តិរបស់ជនរងគ្រោះ បានយកម៉ូតូមួយគ្រឿង ម៉ាកប៊ីត ពណ៌ខៀវ (មិនចាំស្លាកលេខ) ជាកម្មសិទ្ធិរបស់ខ្លួនទៅបញ្ចាំ។ លុះនៅថ្ងៃទី២៣ ខែឧសភា មិត្តភក្តិរបស់ខ្លួនបានមកពឹងខ្លួន ឲ្យជួយដើររកអ្នកដែលយកម៉ូតូទៅបញ្ចាំ ហើយខ្លួនបានណាត់ជនរងគ្រោះ នៅចំណុចក្រោយសាលា១០០ខ្នង ស្ថិតក្នុងសង្កាត់ទឹកថ្លា ខណ្ឌសែនសុខ ដើម្បីដើររកអ្នកដែលយកទៅបញ្ចាំ ប៉ុន្ដែរកមិនឃើញ។ លុះនៅថ្ងៃទី២៤ ខែឧសភា ឆ្នាំ២០១៨ ដែលជាថ្ងៃកើតហេតុ ជនរងគ្រោះបានជិះម៉ូតូមួយគ្រឿង ម៉ាក Honda C125 ពណ៌ទឹកប្រាក់ មិនចាំស្លាកលេខ មកជួបខ្លួនម្ដងទៀត ដើម្បីដើររកអ្នកដែលយកម៉ូតូទៅបញ្ចាំ តែពេលនោះជនរងគ្រោះហាក់បីជាមានចេតនាមិនចង់សហការ ដោយសួរជនរងគ្រោះម្ដងហើយម្ដងទៀត អំពីអាសយដ្ឋាននៅតែមិនប្រាប់ និងមានបំណងរត់គេច។ ពេលនោះខ្លួនក៏បានប្រតាយប្រតប់គ្នានឹងបង្កនូវហិង្សាតែម្ដង រួចបញ្ជូនជនរងគ្រោះតាមម៉ូតូកង់បីមកនាយកដ្ឋានជំនាញ ពេលមកដល់ក្រុមគ្រួសារគេឃើញស្ថានភាពជនរងគ្រោះមានរបួស ក៏នាំទៅព្យាបាលនៅមន្ទីរពេទ្យតែម្ដង។
យ៉ាងណាមិញ សម្រាប់បក្ខពួកម្នាក់ទៀតរបស់ជនបង្កនោះ ត្រូវបានលោកអនុប្រធាននាយកដ្ឋាន បានបញ្ជាក់ថា កម្លាំងនគរបាលជំនាញកំពុងតែសុំដីកា ពីស្ថាប័នតុលាការ ដើម្បីតាមចាប់ជនម្នាក់ទៀត ដែលជាប្រជាពលរដ្ឋធម្មតាមិនមែនជាសមត្ថកិច្ចនោះទេ ខណៈដែលជនបង្កនៅពេលនេះ កំពុងស្ថិតក្រោមចំណាត់ការតាមនីតិវិធីច្បាប់របស់តុលាការ។
ការឃាត់ខ្លួននេះ ត្រូវបានធ្វើឡើងក្រោយមានបញ្ជាផ្ទាល់ពី លោកនាយឧត្តមសេនីយ៍ ឆៃ ស៊ីណារិទ្ធ អគ្គស្នងការស្ដីទី នៃអគ្គស្នងការនគរបាលជាតិ និងឯកឧត្តម ឧត្តមសេនីយ៍ឯក អ៊ិន បូរ៉ា ប្រធាននាយកដ្ឋានកណ្ដាលនគរបាលយុត្តិធម៌ និងលោកឧត្តមសេនីយ៍ឯក សុខ ខេមរិន ប្រធាននាយកដ្ឋាននគរបាលព្រហ្មទណ្ឌ។
ប៉ុន្តែទោះជាយ៉ាងណា មុនពេលចាប់ខ្លួន នគរបាលទំនើងរូបនេះ បានឡាយវីដេអូក្នុងផេកហ្វេសប៊ុករបស់ខ្លួនថា បើខ្លួនមានបញ្ហាអ្វីកើតឡើង គឺលោកប៉ា ដែលមានបុណ្យស័ក្តិធំជាអ្នកចេញជួយអន្តរាគមន៍។ ជាមួយគ្នានោះដែរ ដើមចចមដែលមានការបែកធ្លាយទៀតហើយក្នុងរឿងនេះ គឺដើមហេតុ គឺរឿងពាលស៊ីពាល តែស៊ីពាលមិនបាន បែរជាចង់ធ្វើស៊ី សាក្សី ទៅវិញ។ ពីរថ្ងៃមុននឹងកាច់កចង់សម្លាប់ សាក្សីឈ្មោះ អ៊ឺម បញ្ញា ប៉ូលិសតិរច្ឆាន សុន ពិសាល បានសរសេរអត្ថបទមួយ ជាអក្សរឡាតាំង ផុសនៅលើផេកហ្វេសប៊ុករបស់ខ្លួន។
អត្ថបទខាងក្រោមនេះ ត្រូវបាន សុន ពិសាល លុបចោលវិញ ក្រោយពីកើតហេតុការណ៍ ចង់សម្លាប់សាក្សីប្លន់យកម៉ូតូ បានពីរថ្ងៃ។ សំណេរជាអក្សរឡាតាំង មានអត្ថន័យដូចខាងក្រោមនេះ៖ “ចូលក្នាច់ហើយ ចូលក្នាច់ហើយ អាធា។ ចាំមើលទាំងអស់គ្នាហ្នា ចាំមើលគេជប់ ៣០០(ដុល្លា)ឲ្យទៅជា ៣០០០ វិញ។ ធ្វើដាក់អាណា អញមិនសូវខ្វល់ទេអា តែធ្វើដាក់បងអញ ទោះបីជាអញបាត់បង់ដៃម្ខាង ក៏អញតាមចាប់ហ្អែងឲ្យទាល់តែបានដែរ។ចាំមើលៗ អាណាវាហ៊ានចេញមុខទៅដោះហ្អែង…ហ្អែងគិតថាវាហ៊ានទេ…”៕ ដោយ៖បញ្ញាស័ក្តិ
