ខេត្តកំពង់ធំ ៖ បុរសជាប្តីបានអារកនិងកាប់សម្លាប់ប្រពន្ធគួរឲ្យរន្ធត់ ក្រោយពេលមានជម្លោះលែងលះគ្នា។ សពស្ត្រីរងគ្រោះ ត្រូវបានប្រទះឃើញ ដេកស្លាប់ នៅវេលាម៉ោង៤ រសៀល ថ្ងៃទី២៧ ខែឧសភា ឆ្នាំ២០១៨ ស្ថិតនៅចំណុចទ្បូត៍២០០៩ របស់ក្រុមហ៊ុនហ្គោស្វ័យសុន ខាងកើតភូមិថ្មសំលៀង ប្រហែល ៦០០ ម៉ែត្រ ក្នុងឃុំក្រយា ស្រុកសន្ទុក ខេត្តកំពង់ធំ ។
សមត្ថកិច្ចមូលដ្ឋាន បានឲ្យដឹងថា ជនរងគ្រោះឈ្មោះ ព្រំ សុខភី អាយុ២៤ឆ្នាំ។ ចំណែកជនសង្ស័យត្រូវបានសមត្ថកិច្ចឃាត់ខ្លួនបាន ឈ្មោះ អាំ ភៀន អាយុ២៦ឆ្នាំ នៅភូមិសែនសេរីមង្គល ឃុំក្រយា ស្រុកសន្ទុក។
សមត្ថកិច្ចបានឲ្យដឹងថា គ្រួសារថ្មីថ្មោងមួយនេះ ឧស្សាហ៍ឈ្លោះទាស់ទែងគ្នាញឹកញាប់ណាស់ និងតែងតែបង្កជាអំពើហិង្សាជាច្រើនលើកច្រើនសារ មកហើយ ហើយអាជា្ញធរក៏ធ្លាប់បានហៅមកសម្របសម្រួល និងដោះស្រាយញឹកញាប់។ នៅមុនពេលកើតហេតុ ជនសង្ស័យ និងជនរងគ្រោះបានឈ្លោះគ្នាទៀត ហើយថាលែងលះគ្នា ខណៈពេលនោះបុរសជាប្តីក៏ទាញបានកាំបិតកាប់ទៅលើជនរងគ្រោះជាច្រើនកាំបិត រួចចាប់អារកបណ្តាលឲ្យស្លាប់ភ្លាមៗនៅនឹងកន្លែងកើតហេតុ។ បន្ទាប់ពីបង្កហេតុរួច ជនសង្ស័យត្រូវសមត្ថកិច្ចចាប់ខ្លួនបាន៕ ដោយ៖បញ្ញាស័ក្តិ
