ភ្នំពេញ ៖ អតីតតារាសម្តែងអ្នកនាង ស្រីម៉ុច បានគាស់រំលើងបើកកាយរំលឹកឡើងវិញ នូវរឿងរ៉ាវអតីតកាលដែលនាងធ្លាប់រងគ្រោះដោយការរិះគន់រឿងស្លៀកពាក់ស៊ិចស៊ី ដោយភ្ជាប់ជាមួយរឿងការរិះគន់ខ្លាំងលើឈុតដែលសិចស៊ីរបស់បេក្ខនារីប្រឡងកម្មវិធី Miss Grand Cambodia ។
តារាសម្តែងក្នុងបទ(ជីដូនកាកី)រូបនេះក៏បានរំលឹកឡើងវិញនូវពេលនាងបង្ហាញភាពសិចស៊ីនៅលើឆាកផ្ទាល់ខ្លួនតូចមួយបែរជាត្រូវទទួលការស្តីបន្ទោស និងរិះគន់ រហូតក្រសួងកោះហៅ ដោយនោះមិនមែនជាឆាកធំដូចកម្មវិធីប្រឡងសម្រស់មួយនេះផង។
តាមរយៈសំណេរដែលបានបង្ហោះតាមហ្វេសប៊ុកនោះ អ្នកនាង ស្រីម៉ុច បានលើកឡើងថា នឹកឃើញកាលនោះខ្ញុំដើរម៉ូតឲ្យ event ក្នុងកម្មវិធី private របស់ក្រុមហ៊ុនខ្ញុំសោះ ជេរខ្ញុំផ្អើលស្រុកផ្អើលទេស អាស៊ូតែខ្ញុំទៅឈរនៅលើឆាកអន្តរជាតិ តំណាងជាតិ តំណាងប្រទេសអីមិនថាទេ។ ដើរតែក្នុងកម្មវិធីខ្លួនឯងសោះ។
នាងបញ្ជាក់ថា បងប្អូនប្រជាជនជេរមធ្យម ងំក្រសួងហៅដួសក្អែល ឥឡូវមិចវិញអាវទ្រនាប់ខោស្លិបតែម្ដងចា ហើយសុទ្ធតែអ្នក ដំណាងអោយស្រុកអោយប្រទេស តែនិយាយទៅខ្ញុំគ្រាំទ្រ ព្រោះមិនមែនតែស្រុកគេទេដែលមានស្រីស្អាត ស្រុកយើងកមាន អោយពិភពលោកបានឃើញផង let’s go Cambodia ។
គេនៅចាំថា អតីតតារាសម្ដែងជីដូនកាកី នាង ស្រីម៉ុច បានលេចមុខដើរបង្ហាញម៉ូដកណ្ដាលសណ្ឋាគារសូហ្វីតែល ភោគិត្រា ភ្នំពេញ កាលពីរាត្រីថ្ងៃទី២៣ ខែកក្កដា ឆ្នាំ២០១៨ ធ្វើឲ្យទាំងភ្ញៀវជាតិ និងអន្តរជាតិ តារាល្បីៗជាច្រើនដួង មានការភ្ញាក់ផ្អើលយ៉ាងខ្លាំង នៅពេលដែលនាងស្លៀកឈុតសិចស៊ីលេចខោក្នុង និងបញ្ចេញដើមទ្រួងយ៉ាងទ្រលុកទ្រលន់ ជាមួយតារាចម្រៀងល្បីរបស់ថៃ នាង Katreeya English ក្នុងកម្មវិធីជប់លៀងរបស់គ្លីនិកកែសម្ផស្សមួយ ។
ការស្លៀកពាក់យ៉ាងស៊ិចស៊ីរបស់អ្នកនាងនាពេលនេះក៏ទទួលបានការរិះគន់យ៉ាងចាស់ដៃពីសំណាក់មហាជន រហូតក្រសួងបានកោះហៅអ្នកនាងទៅធ្វើការអប់រំ បើទោះបីជាអ្នកនាងបានរសាត់ចេញឆ្ងាយពីវិស័យសិល្បៈនេះអស់ជាច្រើនឆ្នាំក៏ដោយ។
យ៉ាងណា ក្រោយមានរឿងខាងលើនេះអ្នកនាង ស្រី ម៉ុច ក៏បានបង្ហាញអារម្មណ៍មិនសប្បាយចិត្ត និងមិនអស់ចិត្តចំពោះការរិះគន់ និងការកោះហៅពីក្រសួងនាពេលនោះឡើយ ដោយនាងលើកហេតុផលថា នាងបានឈប់ពីសិល្បៈតាំងពីឆ្នាំ ២០០៨ មកម្ល៉េះ ខណះពេលការសិចស៊ីរបស់នាងនាពេលនេះ មិនមែនក្នុងការងារសិល្បៈនោះទេ៕ រក្សាសិទ្ធិដោយ ៖ សំណាងSV
