ការរស់នៅដោយខ្លួនឯង គឺជាជីវិតឯករាជ្យ ជាពិសេសសម្រាប់អ្នកដែលចូលចិត្តភាពឯកជនរបស់ពួកគេ ប៉ុន្តែ វាក៏មានគុណវិបត្តិមួយចំនួនផងដែរ។ ជាក់ស្តែង ស្ត្រីជនជាតិថៃអាយុ ៥៤ ឆ្នាំម្នាក់ បានចាក់សោខ្លួនឯងដោយចៃដន្យ នៅក្នុងបន្ទប់ទឹក ដោយរង់ចាំតែការស្លាប់ប៉ុណ្ណោះ បន្ទាប់ពីបានព្យាយាមស្រែកឱ្យគេជួយ តែគ្មានអ្នកណាម្នាក់់ឮ អស់រយៈពេល៣ថ្ងៃ។
ស្ត្រីម្នាក់នៅក្នុងទីក្រុងបាងកក ដែលមិនត្រូវបានសារព័ត៌មានថៃបង្ហាញឈ្មោះ បានចូលទៅក្នុងបន្ទប់ទឹកផ្ទះរបស់នាងកាលពីថ្ងៃទី២២ ខែសីហា និងបានចំណាយពេល៣ថ្ងៃទៀតជាប់ខ្លួននៅក្នុងនោះ គឺនៅពេលដែលនាងបិទទ្វារភ្លាម កូនសោទ្វារដែលមានកំហុស ក៏បានប្រែក្លាយបន្ទប់ទឹកឱ្យទៅជាគុក ដែលនាងសូម្បីមិនចាប់អារម្មណ៍យកទូរស័ព្ទរទៅជាមួយ។ នាងបានព្យាយាមគោះទ្វារ និងស្រែកឲ្យគេជួយ ប៉ុន្តែគ្មានអ្នកណាមកជួយនាងឡើយ។
ទោះជានាងខំប្រឹងប្រែង ដើម្បីទទួលបានការចាប់អារម្មណ៍ពីអ្នកជិតខាង ឬសូម្បីតែជនចម្លែកក៏ដោយ ក៏គ្មាននរណាម្នាក់បានឮនាងស្រែកខ្លាំងៗ និងស្រែកឱ្យគេជួយដែរ ដូច្នេះហើយនាងត្រូវរស់ក្នុងនោះដ៏អស់សង្ឃឹម ពឹងទៅលើទឹកម៉ាស៊ីនតែម្នាក់ឯង។ ដោយអស់កម្លាំងបន្ទាប់ពី២ថ្ងៃនៃការព្យាយាមទាក់ទាញការចាប់អារម្មណ៍ពីនរណាម្នាក់ ស្ត្រីរូបនេះ ត្រូវបានគេរាយការណ៍ថា បានសម្រេចសរសេរសារលាជាចុងក្រោយ នៅលើជញ្ជាំងបន្ទប់ទឹក ដោយប្រើផលិតផលថែរក្សាស្បែក ហើយសម្រេចចិត្តរង់ចាំការស្លាប់មកដល់ប៉ុណ្ណោះ។
តែពិតជាសំណាងល្អសម្រាប់ស្ត្រីនោះហើយ គឺបន្ទាប់ពីបាត់ដំណឹងអស់រយៈពេលប៉ុន្មានថ្ងៃ បងស្រីរបស់នាងក៏បានចាប់ផ្តើមបារម្ភ ហើយបានជូនដំណឹងដល់ប៉ូលិសអំពីការបាត់ខ្លួនរបស់នាង។ ក្រុមសង្រ្គោះត្រូវបានគេបញ្ជូនទៅពិនិត្យផ្ទះស្ត្រីនោះ ហើយបន្ទាប់ពីមិនមានការឆ្លើយតបនៅមាត់ទ្វារពួកគេក៏សម្រេចចិត្តគោះទ្វារផ្ទះតែម្តង។
បន្ទាប់ទម្លុះចូលទៅក្នុងផ្ទះ ក្រុមសង្គ្រោះបានគោះទ្វារបន្ទប់ទឹក ពួកគេក៏បានប្រទះឃើញស្ត្រីនោះ កំពុងស្ថិតក្នុងសភាពទន់ខ្សោយខ្លាំងទៅហើយ។ ដោយគិតថានាងមិនបានញ៉ាំអាហារក្នុងរយៈពេលច្រើនថ្ងៃមកហើយ ពួកគេក៏ប្រញាប់ប្រញាល់បញ្ជួននាងទៅកាន់មន្ទីរពេទ្យដែលនៅជិតបំផុត។ បន្ទាប់មកពួកគេបានឃើញសារនៅលើជញ្ជាំងបន្ទប់ទឹកដែលនាងបានសរសេរថា៖ “ខ្ញុំបានជាប់គាំងនៅក្នុងបង្គន់តាំងពីថ្ងៃទី២២ ខែសីហា។ ប្រសិនបើខ្ញុំស្លាប់សូមឱ្យ Jay Lek ថែរក្សាឆន្ទៈរបស់ខ្ញុំ។ សូមប្រគល់ទ្រព្យសម្បត្តិរបស់ Tuk ទៅឲ្យ Tua Toon Tum។ ខ្ញុំបានផឹកទឹកម៉ាស៊ីនដើម្បីរស់ បើគ្មានទឹកទេ ខ្ញុំនឹងស្លាប់បាត់ហើយ។ ខ្ញុំព្យាយាមអង្រួន និងវាយផ្លូវចេញ ខ្ញុំព្យាយាមស្រែក ប៉ុន្តែគ្មាននរណាឮខ្ញុំទេ»។
វេជ្ជបណ្ឌិតបានធ្វើតេស្តស្ត្រីអាយុ ៥៤ ឆ្នាំ រូបនេះ ហើយបានរកឃើញថា ទោះបីជានាងមានស្ថានភាពខ្សោយក៏ដោយ ក៏នាងមានសុខភាពល្អជាទូទៅដែរ។ នាងត្រូវបានគេរំពឹងថា នឹងជាសះស្បើយពេញលេញឡើងវិញផងដែរ៕ រក្សាសិទ្ធិដោយ៖ លឹម ហុង
