កាលពីថ្ងៃទី៤ ខែកញ្ញា ឆ្នាំ២០២២ លោក ខឹម វាសនា បានយល់ព្រមឲ្យសមត្ថកិច្ចចូលទៅក្នុងទីតាំងដីចំការម្រេចរបស់ខ្លួន ស្ថិតនៅភូមិថ្មជល់ ឃុំត្បែង ស្រុកបន្ទាយស្រី ខេត្តសៀមរាប ដេីម្បីត្រួតពិនិត្យ និងសហការពន្យល់ណែនាំប្រជាពលរដ្ឋ (មានទាំងក្មេងៗ និងមនុស្សចាស់) ដែលកំពុងស្នាក់នៅទីនោះ ឲ្យវិលត្រឡប់ទៅផ្ទះវិញ ខណៈដែលមានក្រុមគ្រួសារជាច្រើន ដែលមានការព្រួយបារម្ភខ្លាំង ស្នើសុំឲ្យជួយអន្តរាគមន៍រំដោះកូនៗ និងប្តីឬប្រពន្ធ ដែលត្រូវបានគិតថា ពួកគេអាចទំនងជាកំពុងត្រូវបានបង្ហាំង ឬឈ្លក់វង្វេងងប់ងល់យ៉ាងខ្លាំង ដោយសារតែមនោគមបែកឆ្វេងរបស់មេសម្ព័ន្ធខឹម វាសនា។
តែទោះជាយ៉ាងណា អ្វីៗគឺផ្ទុយពីការគិតទាំងស្រុង ព្រោះថា នៅពេលសមត្ថកិច្ចចូលទៅដល់ ដើម្បីឲ្យរំសាយការប្រមូលផ្តុំនេះ ស្រាប់តែមនុស្សទាំងនោះ បានស្រែកដាក់សមត្ថកិច្ចថា ពួកគេមិនចាកចេញជាដាច់ខាត ស៊ូស្លាប់នៅទីនេះ ព្រោះកន្លែងនេះហើយ គឺជាផ្ទះរបស់ពួកគេ។
លើសពីនេះ ក្រុមមនុស្សទាំងនោះដែលហាក់កំពុងត្រូវ «ថ្នាំសណ្តំ» មនោគមរបស់ព្រហ្ម ខឹមវាសនា យ៉ាងងប់ងល់ បានចោទសមត្ថកិច្ចថា តាមមករំខានយាយី ដែលធ្វើពួកគេធ្លាក់ខ្លួនឈឺទៀតផង។
ខណៈពេលនោះផងដែរ អ្វីដែលហួសចិត្តខ្លាំងបំផុតទៀតនោះ គឺថាមានស្រ្តីវ័យចំណាស់ម្នាក់ក្នុងចំណោមនោះ ដែលបានចេញមុខប្រឈមមុខ បានបង្ហាញឲ្យសមត្ថកិច្ចបានឃើញ ជាមួយការគោរពយ៉ាងខ្លាំងក្លា ដល់ថ្នាក់ក្រាបសំពះមេព្រហ្ម ខឹម វាសនា ប្រៀបដូចព្រះអុីចឹង ដែលធ្វើឲ្យសមត្ថកិច្ចនិយាយមិនចេញ ចង់វិលមុខគ្រប់ៗគ្នាតែម្តង៕ រក្សាសិទ្ធិដោយ៖ លឹម ហុង
