កាលពីថ្ងៃអង្គារ ទី៦ ខែកញ្ញា តុលាការសិង្ហបុរីបានបើកសវនាការលើករណីសាស្ត្រាចារ្យនៅវិទ្យាស្ថានអប់រំបច្ចេកទេសសិង្ហបុរី (ITE) នៃមហាវិទ្យាល័យ ITE East ក្នុងក្រុង Simei ដែលហៅថា A អាយុ ៤៨ឆ្នាំ ចំពោះទង្វើដ៏មិនគប្បីរបស់គាត់ ថតវីដេអូសម្ងាត់រាប់រយក្រោមសំពត់របស់សិស្សស្រីនៅបរិវេណសាលា។
ករណីនេះបានកើតឡើងតាំងពីឆ្នាំ ២០១៩ ហើយការកាត់ក្តីនាពេលថ្មីៗនេះ បានទាក់ទាញការចាប់អារម្មណ៍ជាសាធារណៈ នៅក្នុងប្រទេសកោះតោមួយនេះ។ មនុស្សជាច្រើនពិតជាស្រឡាំង ព្រោះតែមិននឹកស្មានសោះថា បុគ្គលដែលធ្លាប់ជាសាស្ត្រាចារ្យ និងជាអ្នកទទួលខុសត្រូវក្នុងការបង្រៀន និងការពារសិស្ស បែរជាប្រព្រឹត្តនូវទង្វើបែបនេះ។
ករណីនេះត្រូវបានបែកធ្លាយដោយសារភាពចន្លោះប្រហោងរបស់ជនខិលខូច ត្រូវកូនសិស្សដទៃក្នុងថ្នាក់រៀនចាប់បាន គឺ
នៅព្រឹកថ្ងៃទី ២៥ ខែតុលា ឆ្នាំ ២០១៩ ពេលសិស្សស្រីម្នាក់ស្លៀកសំពត់ខ្លី ដែលជាគោលដៅ។ វីដេអូបានបង្ហាញ គ្រូខិលខូចរូបនោះ បានបើកមុខងារថតរូបភាព និងវីដេអូនៅលើទូរសព្ទរបស់គាត់ ហើយចូលទៅជិតសិស្សស្រី ដោយធ្វើជាកំពុងបង្រៀន ប៉ុន្តែបានទុកទូរសព្ទនៅដៃម្ខាង ដើម្បីលួចថតផ្នែកខាងក្រោមសំពត់របស់សិស្សស្រីតែម្តង។
លោក A បានធ្វើបែបនេះរយៈពេល ១ ទៅ ២ នាទី មុនពេលចាកចេញ។ បន្ទាប់ពីថ្នាក់រៀនចប់ A បានពិនិត្យយ៉ាងយកចិត្តទុកដាក់ ដើម្បីប្រាកដថាគ្មាននរណាម្នាក់នៅជុំវិញ មុនពេលយកទូរស័ព្ទដៃរបស់គាត់ ដើម្បីពិនិត្យមើលរូបថតដែលគាត់គិតថា គាត់បានថតនៅក្រោមសំពត់របស់សិស្សស្រីនោះ។
តែទោះជាយ៉ាងណា A ពិតមិនបានដឹងថា សិស្សស្រីរងគ្រោះបានដឹងអំពីសកម្មភាពថតលួចលាក់នេះ ដែលនាងបានផ្ញើទៅកាន់ឪពុក បងស្រី និងមិត្តរួមថ្នាក់មួយចំនួនភ្លាមៗ ហើយនៅទីបំផុត ពួកគេបានរាយការណ៍ករណីនេះប្រាប់ប៉ូលិសនោះទេ។
បន្ទាប់ពីចាប់ផ្តើមការស៊ើបអង្កេត ប៉ូលីសបានរកឃើញថា A បានថតរូបនិងវីដេអូនៅក្រោមសំពត់របស់សិស្សស្រីផ្សេងៗទៀតនៅក្នុងបរិវេណសាលា។ A ត្រូវបានចាប់ខ្លួនភ្លាមៗ ហើយរូបថត ១៣៣ និងវីដេអូ ១៧ ដែលថតនៅក្រោមសំពត់របស់ក្មេងស្រី ត្រូវបានរកឃើញនៅក្នុងទូរស័ព្ទរបស់គាត់ផងដែរ។
យោងតាមឯកសារដែលចេញនៅតុលាការ បានឲ្យដឹងថា A បានប្រើប្រាស់ទូរស័ព្ទដៃ ដើម្បីថតរូប និងវីដេអូ នៅក្រោមសំពត់របស់ក្មេងស្រីមិនស្គាល់អត្តសញ្ញាណនៅក្នុងអាហារដ្ឋានរបស់សាលា កាលពីព្រឹកថ្ងៃទី៥ ខែមិថុនា ឆ្នាំ ២០១៩។
ហើយនៅវេលាម៉ោង១១ និង ៣៩ នាទី ថ្ងៃទី២៩ ខែកក្កដា ឆ្នាំ ២០១៩ ក្មេងស្រីម្នាក់ទៀតមិនស្គាល់អត្តសញ្ញាណ ក៏ត្រូវបានថត នៅក្នុងការិយាល័យទូទៅរបស់សាលា។
A ត្រូវបានគេធ្វើរោគវិនិច្ឆ័យថា មានជំងឺធ្លាក់ទឹកចិត្ត ហើយនេះត្រូវបានចាត់ទុកថា ជាកត្តាមានឥទ្ធិពលសម្រាប់ការប្រព្រឹត្តខុសរបស់គាត់។ គាត់ក៏បានទទួលការព្យាបាលផ្លូវចិត្ត ហើយអ្នកចិត្តសាស្រ្តរបស់គាត់ បានបញ្ជាក់ថា ភាពខុសប្រក្រតីរបស់គាត់គឺ “ទាបណាស់” ។ មេធាវីរបស់ A ក៏បានបញ្ជាក់ថា ទង្វើលួចរូបថតបែបនេះ គឺមិនមែនជាទង្វើធម្មតារបស់គាត់ទេ ព្រោះបើសិស្សមួយចំនួនបាននិយាយថា គាត់ជាមនុស្សរួសរាយរាក់ទាក់ និងចេះជួយជ្រោមជ្រែង។
ទោះបីជាយ៉ាងណាក៏ដោយ នៅក្នុងសវនាការកាលពីថ្ងៃទី៦ ខែកញ្ញា បន្ទាប់ពីបានសារភាពកំហុស, A ត្រូវបានកាត់ទោសឱ្យជាប់ពន្ធនាគាររយៈពេល ៤ ខែ ពីបទថតរឿងសម្ងាត់ និងបៀតបៀនស្ត្រី។
មហាជនជាច្រើនបាននិយាយថា A មិនត្រឹមតែត្រូវជាប់គុកប៉ុណ្ណោះទេ គឺថែមទាំងបាត់បង់កេរ្តិ៍ឈ្មោះទាំងអស់ ដែលគាត់បានខិតខំកសាងអស់ជាច្រើនឆ្នាំ និងក៏ដូចជាការងារផងដែរ -ជាតំណែងដែលមនុស្សជាច្រើនកោតសរសើរ និងស្រមៃចង់បាន៕ រក្សាសិទ្ធិដោយ៖ លឹម ហុង
