អ្នកសរសេរប្លុកចិនដ៏ល្បីមួយរូប បានបង្ហោះរូបថតប៉ុន្មានសន្លឹក ក្នុងគោលបំណង ទាក់ទាញចំណាប់អារម្មណ៍អ្នកគាំទ្រ ប៉ុន្តែ នឹកស្មានមិនដល់ថា វាបានបង្កឲ្យមានការរិះគន់ជាសាធារណៈ។
តាមរយៈរូបថតគេអាចមើលឃើញថា តារាស្រីរូបនេះស្លៀកពាក់យ៉ាងស្រស់ស្អាត ដៃកាន់ឆ័ត្រ ញញឹមស្រស់ដូចផ្កា អង្គុយលើរទេះរុញ ដែលត្រូវបានរុញដោយបុរសម្នាក់ ដែលត្រូវបានគេជឿថាជាគូស្នេហ៍របស់នាង។
ការបង្ហោះនោះ អមដោយខ្លឹមសារដ៏ហួសចិត្តថា៖ «ផ្នែកដែលខ្លាចកខ្វក់លើដងខ្លួនបំផុតរបស់ខ្ញុំគឺ «ជើង» ហ្នឹងតែម្តង ដូច្នេះហើយ រាល់ពេលភ្លៀងពាក់ស្បែកជើងគឺហត់ណាស់ ក្រោយមកបងខ្ញុំក៏បានទិញរទេះរុញឲ្យខ្ញុំតែម្តងទៅ។ មេឃនៅតែភ្លៀងមិនអាចពាក់ស្បែកជើងបានទេ!»។
ក្រោយពីបានឃើញបែបនេះ អ្នកលេងបណ្តាញសង្កម បានបញ្ចេញមតិដាក់ឲ្យបែបនេះថា៖ «តើនាងគិតថានាងជាព្រះនាងឬ? តើនារីម្នាក់នេះ កំពុងមានបញ្ហាផ្លូវចិត្តឬ? ថ្វីត្បិតតែទង្វើនៃការដើរតាមផ្លូវក្នុងរទេះរុញ ដើម្បីគេចពីទទឹកភ្លៀង វាជាសេរីភាពរបស់នារីម្នាក់នេះក៏ដោយ ប៉ុន្តែ វិធីនៃការបង្ហាញនៅលើបណ្តាញសង្គម វាដូចជាជ្រុលលើសពេកហើយនាង!»។
គួរឲ្យដឹងផងដែរថា នេះមិនមែនជាលើកទីមួយទេ ដែលអ្នកសរសេរប្លក់ស្រីម្នាក់នេះបង្ហាញ «ការភ័យខ្លាចកខ្វក់» បែបនេះ ដោយកន្លងមក តារាស្រីរូបនេះក៏បានបង្ហោះរូបថតអង្គុយជាមួយស្បែកជើង ដាក់នៅលើកៅអីក្នុងហាង ដោយបានបញ្ចេញរូបស៊ិចស៊ី អង្គុយញ៉ាំបាយ និងថតរូប។ ខ្លាចជើងកខ្វក់ជារឿងរបស់អ្នក ប៉ុន្តែ ការដាក់ស្បែកជើងលើកៅអីនៅទីសាធារណៈ អ្នកកំពុងធ្វើឲ្យប៉ះពាល់ដល់អ្នកដទៃ។
ទង្វើដ៏មិនសមរម្យ របស់តារាស្រីរូបនេះ គឺជាឧទាហរណ៍មួយរបស់ក្រុមមនុស្ស «បាត់បង់ស្មារតី» ដែលអះអាងថាខ្លួនមានឯកសិទ្ធិក្នុងសង្គម ព្រោះ ពួកគេគិតតែពីខ្លួនឯង មិនចេះគិតដល់អ្នកដទៃ ហើយក៏មិនមានការយល់ដឹងអំពីសហគមន៍ និងវប្បធម៌ស្តង់ដារដែរ។
មនុស្សទាំងនេះមានភាពល្បីល្បាញនៅលើបណ្តាញសង្គម ក្លាយជានិន្នាការ និងមតិសាធារណៈនាំមុខគេ បង្កើតនិន្នាការដែលធ្វើឱ្យយុវវ័យមួយចំនួនធំធ្វើតាម។
ជាក់ស្តែង ថ្មីៗនេះ និន្នាការថ្មី «ការបាត់បង់ខួរក្បាល» បានរីករាលដាលពាសពេញបណ្តាញទំនាក់ទំនងសង្គមចិន។ នោះគឺក្មេងស្រីជំទង់ស្លៀកពាក់ JK (ឯកសណ្ឋានសិស្សសាលាជប៉ុន) ដេកនៅលើផ្លូវថ្មើរជើងដ៏ប្រឈមគ្រោះថ្នាក់ គ្រាន់តែចង់ថតរូបជាមួយគំនិតនៃ «ករណីក្មេងស្រីសិស្សសាលាជួបគ្រោះថ្នាក់ដែលមិននឹកស្មានដល់» ។
ប្រហែលមិនដឹងមានមនុស្សជាច្រើនកំពុងយល់ច្រឡំថា ការថតបែបនេះឡូយ និងស្អាតបែបណាទេ ទើបក្លាយជានិន្នាការបែបនេះ? ដូច្នោះហើយ អ្នកសរសេរប្លុកជាច្រើនបានប្រកួតប្រជែងគ្នានៅតាមផ្លូវដើម្បីថតរូប ដែលភាគច្រើនជាសិស្សស្រី ដែលនៅតែអង្គុយលើកៅអីសាលា។
តែទោះជាយ៉ាងណា ជាមួយទង្វើនេះ អ្នកនិយមលេងអ៊ីនធឺណិតជាច្រើនបានបញ្ចេញមតិរិះគន់ថា៖ «បើមានគ្រោះថ្នាក់ច្បាស់ជាត្រូវបន្ទោសអ្នកបើកបរ។ មនុស្សទាំងនេះមិនដឹងថា គេទទួលបានការអប់រំល្អ ឬុយ៉ាងណាទេ ប៉ុន្តែស្មារតីរបស់គេអន់ខ្លាំងណាស់។ ហើយជាការពិតដែលមិនមែនអ្នកដែលមានការអប់រំល្អទាំងអស់ចេះប្រើខួរក្បាលគិតនោះទេ, បើអ្នកចង់លេចធ្លោក្នុងពិភពអនឡាញ អ្នកក៏ត្រូវចេះគិតឱ្យបានត្រឹមត្រូវ បង្ហាញជាមួយអាកប្បកិរិយាឲ្យសមរម្យ សំខាន់បំផុតគឺកុំឱ្យប៉ះពាល់ដល់អារម្មណ៍អ្នកដទៃ»៕ រក្សាសិទ្ធិដោយ៖ លឹម ហុង
