ភ្នំពេញ៖ សេចក្តីព្រាងច្បាប់ស្តីពីវិសោធនកម្មច្បាប់ស្ដីពីការគ្រប់គ្រង និងការធ្វើអាជីវកម្មធនធានរ៉ែ មានសារសំខាន់ណាស់ ក្នុងការជំរុញកំណើនសេដ្ឋកិច្ចកម្ពុជា និងជាយន្តការមួយ សម្រាប់ទាក់ទាញ អ្នកវិនិយោគបរទេស មកបណ្ដាក់ទុន លើវិស័យរ៉ែនៅកម្ពុជា និងធានា ធ្វើឲ្យការគ្រប់គ្រង លើការធ្វើអាជីវកម្មធនធានរ៉ែ កាន់តែមានប្រសិទ្ធភាព ហើយក៏មានចែងច្បាស់លាស់ ពីការដាក់ទោសទណ្ឌ ដល់អ្នកប្រព្រឹត្តបទល្មើស ក្នុងការធ្វើអាជីវកម្មធនធានរ៉ែនេះ។
នៅក្នុងកិច្ចប្រជុំរវាងគណៈកម្មការជំនាញនៃរដ្ឋសភា ជាមួយតំណាងរាជរដ្ឋាភិបាល ដែលបានលើកយកសេចក្តីព្រាងច្បាប់ស្តីពីវិសោធនកម្ម មាត្រា៣ មាត្រា២៣ មាត្រា៣០ មាត្រា៣៣ មាត្រា៣៤ មាត្រា៣៥ មាត្រា៣៦ មាត្រា៣៧ មាត្រា៣៨ មាត្រា៣៩ និងមាត្រា៤០ នៃច្បាប់ស្តីពីការគ្រប់គ្រង និងការធ្វើអាជីវកម្មធនធានរ៉ែមកជជែកពិភាក្សាគ្នា នៅចុងបញ្ចប់ គណៈកម្មការជំនាញនៃរដ្ឋសភា បានសម្រេចបញ្ជូន សេចក្តីព្រាងច្បាប់ស្តីពីវិសោធនកម្មនេះ ទៅគណៈកម្មាធិការអចិន្ត្រៃយ៍រដ្ឋសភាវិញ ដើម្បីពិនិត្យដាក់បញ្ចូលក្នុងរបៀបវារៈសម័យប្រជុំពេញអង្គរដ្ឋសភានាពេលខាងមុខ។
កិច្ចប្រជុំនេះបានធ្វើឡើងនៅព្រឹកថ្ងៃទី២៨ ខែឧសភា ឆ្នាំ២០១៨ នៅវិមានរដ្ឋសភា ដឹកនាំដោយ លោកស្រី និន សាផុន ប្រធានគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ នៃរដ្ឋសភា និងមានការចូលរួមពីតំណាងនៃគណៈកម្មការផ្សេងៗទៀតនៃរដ្ឋសភា។ រីឯតំណាងរាជរដ្ឋាភិបាលដឹកនាំដោយ លោក ស៊ុយ សែម រដ្ឋមន្ត្រីក្រសួងរ៉ែ និងថាមពល និងសហការី។
លោកស្រី និន សាផុន បានមានប្រសាសន៍ថា កន្លងមកគណៈកម្មការបានប្រជុំផ្ទៃក្នុងគណៈកម្មការ ដើម្បីពិនិត្យ សិក្សា និងបានធ្វើការកែសម្រួលលើខ្លឹមសារ ពាក្យពេចន៍អក្ខរាវិរុទ្ធ នៃសេចក្តីព្រាងច្បាប់នេះខ្លះៗរួចមកហើយ ដើម្បីឲ្យមានលក្ខណៈសមស្របទៅតាមទម្រង់ច្បាប់។ រីឯជំនួបពិភាក្សាជាមួយតំណាងរាជរដ្ឋាភិបាលនាពេលនេះ គណៈកម្មការក៏បានស្ដាប់នូវការបកស្រាយរបស់តំណាងរាជរដ្ឋាភិបាលយ៉ាងក្បោះក្បាយ និងបានយល់ច្បាស់គ្រប់ជ្រុងជ្រោយ ទើបគណៈកម្មការឯកភាពគ្នាបញ្ជូនសេចក្តីព្រាងច្បាប់ស្តីពីវិសោធនកម្មនេះ ទៅគណៈកម្មាធិការអចិន្ត្រៃយ៍រដ្ឋសភា សម្រាប់ដាក់បញ្ចូលក្នុងរបៀបវារៈសម័យប្រជុំពេញអង្គរដ្ឋសភា។ លោកស្រីបញ្ជាក់ថា សេចក្តីព្រាងច្បាប់នេះមានសារសំខាន់ណាស់ ក្នុងការជំរុញកំណើនសេដ្ឋកិច្ចកម្ពុជា និងជាយន្តការមួយសម្រាប់ទាក់ទាញអ្នកវិនិយោគបរទេសមកបណ្ដាក់ទុនលើវិស័យរ៉ែនៅកម្ពុជាផងដែរ។
លោក ស៊ុយ សែមរដ្ឋមន្ត្រីក្រសួងរ៉ែ និងថាមពល បានមានប្រសាសន៍ បញ្ជាក់ពីមូលហេតុ ដែលនាំឲ្យមានការរៀបចំ សេចក្ដីព្រាងច្បាប់ស្ដីពីវិសោធនកម្មនេះឡើងថា ច្បាប់ស្តីពីការគ្រប់គ្រង និងការធ្វើអាជីវកម្មធនធានរ៉ែ ដែលរាជរដ្ឋាភិបាលបានអនុវត្តន៍ក្នុងការគ្រប់គ្រងវិស័យរ៉ែ ចាប់តាំងពីឆ្នាំ ២០០១មកនោះ គឺទទួលបានផ្លែផ្កាគួរជាទីកត់សម្គាល់។ ប៉ុន្តែទន្ទឹមនឹងនេះ បទពិសោធន៍ក៏បានបង្ហាញឲ្យឃើញថា ច្បាប់នេះនៅមានចំណុចខ្វះខាតមួយចំនួនដែលមិនទាន់បានឆ្លើយតបទៅនឹងការវិវឌ្ឍន៍នៃវិស័យរ៉ែ ក្នុងបរិបទនៃការរីកចម្រើនសេដ្ឋកិច្ចសង្គម និងបរិស្ថានរបស់ព្រះរាជាណាចក្រកម្ពុជានាពេលបច្ចុប្បន្ននេះនោះទេ។ លោកបន្ថែមថា ការរៀបចំសេចក្តីព្រាងច្បាប់នេះ មានគោលបំណងធានា ធ្វើឲ្យការគ្រប់គ្រង លើការធ្វើអាជីវកម្មធនធានរ៉ែ កាន់តែមានប្រសិទ្ធភាព ហើយក៏មានចែងច្បាស់លាស់ ពីការដាក់ទោសទណ្ឌ ដល់អ្នកប្រព្រឹត្តបទល្មើស ក្នុងការធ្វើអាជីវកម្មធនធានរ៉ែនេះផងដែរ៕ ដោយ៖បញ្ញាស័ក្តិ
