សេចក្តីស្រឡាញ់របស់ម្តាយចំពោះកូន គឺមិនដូចអ្វីផ្សេងឡើយ។ ជាក់ស្តែង ស្ត្រីអាយុ ២៥ ឆ្នាំ ម្នាក់ មកពីប្រទេសឥណ្ឌា ត្រូវបានគេសរសើរថាជាវីរៈនារី បន្ទាប់ពីនាងត្រូវបានគេរាយការណ៍ថា បានប្រយុទ្ធជាមួយខ្លាដោយដៃរបស់នាងផ្ទាល់ ដើម្បីជួយសង្រ្គោះកូនប្រុសដែលទើបចេះដើរតេះតះ។
ថ្មីៗនេះ ស្រ្តីជនជាតិឥណ្ឌាម្នាក់ នាង Archana Choudhary ស្ត្រីវ័យក្មេងមកពីជនបទ Madhya Pradesh បានបង្ហាញពីខណៈពេលដែលនាងបានប្រថុយជីវិតខ្លួនឯង ដើម្បីជួយសង្រ្គោះកូនប្រុសអាយុជាង១ឆ្នាំ។ ប្រភពព័ត៌មានបានឲ្យដឹងថា ម្តាយនិងកូនទាំងពីរ កំពុងដើរកាត់វាលស្រែមួយនៅជាយតំបន់ព្រៃសត្វខ្លា Bandhavgarh កាលពីថ្ងៃអាទិត្យ ហើយនៅពេលនោះ ខ្លាពេញវ័យមួយក្បាលបានស្ទុះចេញពីគុម្ពោតព្រៃ និងបានវាយប្រហារ អូសកូនប្រុសរបស់នាងចូលព្រៃ។ ដោយមិនគិតចំពោះសុវត្ថិភាពផ្ទាល់ខ្លួន ស្រ្តីជាម្តាយរូបនេះ បានប្តូរជីវិតវាយប្រយុទ្ធជាមួយខ្លាដ៏ធំដោយដៃទទេរបស់នាងដើម្បីសង្គ្រោះកូនប្រុស។
ស្ត្រីជាម្តាយវ័យក្មេងរូបនេះ ត្រូវបានគេរាយការណ៍ថា បានគ្រប់គ្រងសត្វខ្លាឲ្យនៅឆ្ងាយពីកូនប្រុស បន្ទាប់ពីនាងបានតស៊ូប្រយុទ្ធ ជាមួយរបួសយ៉ាងធ្ងន់ធ្ងរទៅលើខ្នង ចង្កេះ និងដៃ។ ប៉ុន្តែ ពិតជាសំណាងល្អហើយ ដែលសម្រែករបស់នាងក្នុងអំឡុងពេលតស៊ូ បានលេចឮដល់អ្នកភូមិផ្សេងទៀត ដែលបានមកជួយបណ្តេញសត្វខ្លាដ៏ធំនោះ ដោយប្រើដំបង។ Archana និងកូនរបស់នាងទាំងពីរនាក់ត្រូវការការព្យាបាល ហើយត្រូវបានបញ្ជូនទៅសង្គ្រោះនៅមន្ទីរពេទ្យបង្អែកស្រុក។
កូនប្រុសរបស់នាង ត្រូវបានដឹងថា បានត្រឹមតែរងរបួសក្បាលបន្តិចបន្តួចប៉ុណ្ណោះ ខណៈម្តាយគឺធ្ងន់ធ្ងរទាំងរបួសជ្រៅនៅលើដងខ្លួន និងសូម្បីរបួសប៉ះពាល់ដល់សួត។ ពួកគេទាំងពីរបានទទួលការចាក់ថ្នាំប្រឆាំងនឹងជំងឺឆ្កែឆ្កួត ហើយត្រូវបានគេរំពឹងថានឹងជាសះស្បើយ មានសុខភាពល្អប្រសើរឡើងវិញ។
ភាពក្លាហានរបស់ Archana ក៏បានឲ្យគេនឹកឃើញដល់ករណីស្រដៀងគ្នានេះ ដែលបានកើតឡើងកាលពីឆ្នាំមុន នៅពេលដែលស្ត្រីម្នាក់បានដេញខ្លារខិនជាងមួយម៉ាយ បន្ទាប់ពីបានតស៊ូប្រយុទ្ធ ដើម្បីសង្គ្រោះកូនតូចរបស់នាង៕ រក្សាសិទ្ធិដោយ៖ លឹម ហុង
