រឿងរ៉ាវរត់ម៉ូតូកង់បីជនជាតិថៃ ដែលរកវាយអ្នកទេសចរប្តីប្រពន្ធមួយបន្ទាប់ពីពួកគេបដិសេធមិនព្រមឲ្យថ្លៃជិះដែលទារច្រើនពេកបានកំពុងល្បីពេញប្រទេសសិង្ហបុរី។ គួរបញ្ជាក់ឲ្យដឹងថា នេះជារឿងធម្មតានៅក្នុងប្រទេសថៃ ដែលរត់ម៉ូតូកង់បី និងអ្នករត់តាក់ស៊ី ត្រូវបានដឹងថា នឹងព្យាយាមគិតប្រាក់ច្រើនជាងតម្លៃក្នុងស្រុកធម្មតា ប្រសិនបើពួកគេដឹងថា អ្នកដំណើរនោះជាជាភ្ញៀវទេសចរ។
តែទោះជាយ៉ាងណា អាកប្បកិរិយាមិនល្អបែបនេះ ពុំត្រូវបានគាំទ្រ ដោយជនជាតិថៃផ្សេងទៀតទេ។ អ្នកទេសចរមកពីប្រទេសសិង្ហបុរី បានចែករំលែកបទពិសោធន៍របស់គាត់ បន្ទាប់ពីគាត់ត្រូវបានអ្នកបើកម៉ូតូកង់បីជនជាតិថៃម្នាក់នោះ ស្រែកសម្លុតគំរាមវាយ ដោយបានចង្អុលមុខគាត់ ជាមួយកំហឹងយ៉ាងខ្លាំង។
អ្នកទេសចរជនជាតិសិង្ហបុរីនោះ ដែលមានឈ្មោះ John Chen បានអះអាងថា គាត់ជាជនរងគ្រោះ ដោយសារតែអ្នកបើកម៉ូតូកង់បីម្នាក់ បានព្យាយាមដំឡើងថ្លៃ បន្ទាប់ពីការធ្វើដំណើរបានចាប់ផ្តើមរួចហើយ។ វីដេអូមួយត្រូវបានចែករំលែកដោយអ្នកប្រើប្រាស់ tiktok ដែលមានឈ្មោះថា “BKKdiaries” ដោយនិយាយថា “អ្នកបើកម៉ូតូកង់បីព្យាយាមគិតថ្លៃបន្ថែម លើសពីតម្លៃជិះធម្មតា។ ខ្ញុំមិនយល់ស្របនឹងរឿងនេះទេ ហើយគាត់បានឈប់លើផ្លូវ ហើយចាប់ផ្តើមវាយខ្ញុំតែម្តង។ ហើយបន្ទាប់មក ខ្ញុំក៏បានរាយការណ៍ទៅប៉ូលិស»។
John Chen ក៏បានបញ្ជាក់ថា៖ «មុននេះ ក៏មានករណីអ្នកបើកតាក់ស៊ីប្រើអំពើហិង្សាលើអ្នកទេសចរផងដែរ ដោយសាររឿងទារថ្លៃជិះស្រដៀងគ្នានេះ។ ខ្ញុំសង្ឃឹមថា ក្រុមអ្នករត់កង់បី ឬ តាក់សុី នៅទីក្រុងបាងកក នឹងកែលម្អស្ថានភាពមិនល្អនេះ។ សូមអ្នកទេសចរប្រុងប្រយ័ត្ន មុនឡើងជិះ។ ហេតុការណ៍នេះបានកើតឡើងកាលពីថ្ងៃទី២ ខែកញ្ញា ឆ្នាំ២០២២ វេលាម៉ោង១៤និង៤៥នាទី»។
John បានប្រាប់ AsiaOne អំពីរឿងហេតុនេះឲ្យដឹងថា គាត់បានហៅម៉ូតូកង់បីពី Central World មកបន្ទប់របស់គាត់នៅជិតស្ថានីយ៍ BTS Surasak ។ តម្លៃត្រូវបានយល់ព្រម ១៦០ បាត ប៉ុន្តែអ្នកបើកបរបានព្យាយាមដំឡើងតម្លៃដល់ ៣០០ បាត បន្ទាប់ពីការជិះបានចាប់ផ្តើម ស្រាប់តែអ្នកបើកបរបានអះអាងថា ខុនដូនៅឆ្ងាយពេក ហើយអ្នកដំណើរបានបដិសេធមិនបង់ថ្លៃតម្លើងថ្មីនោះទេ។ អ្នកបើកបរត្រូវបានគេឃើញក្នុងវីដេអូ ស្រែកដាក់អ្នកដំណើរជាភាសាថៃ និងអង់គ្លេស ដ៏មិនសមរម្យ។ គាត់បានបញ្ចប់រឿង ជាមួយការបង់ប្រាក់ 100 បាត ដល់អ្នកបើកបរ។ John ក៏បានអះអាងដែរថា អ្នកបើកបរបានរុញគាត់ ហើយព្យាយាមវាយគាត់ថែមទៀត។ John បានដើរចេញទៅរាយការណ៍ប្រាប់ប៉ូលិស។
ក្រោយទទួលបានអំពីករណីនេះ អ្នករត់កង់បីរូបនោះឈ្មោះ Thongkham Cherdchai អាយុ ៥៧ ឆ្នាំ ត្រូវបានប៉ូលីសហៅចូលប៉ុស្តិ៍កាលពីថ្ងៃច័ន្ទ ចំពោះទង្វើបញ្ចេញអាកប្បកិរិយាកោងកាច និងឆេវឆាវ ទៅលើគូស្នេហ៍សិង្ហបុរី ក្នុងការទារប្រាក់លើសពីការព្រមព្រៀងគ្នាសម្រាប់ការជិះ និងធ្វើការផាកពិន័យប្រាក់ចំនួន ១,០០០ បាត ពីបទប្រើប័ណ្ណបើកបរ (ពែកមី) ខុស ក្នុងការបើកបរសាធារណៈ។
ជាមួយគ្នានេះ អ្នកនិយមលេងអ៊ីនធឺណិត ក៏បានណែនាំអ្នកទេសចរផ្សេងទៀតឲ្យជិះរថភ្លើងលើអាកាស ឬប្រើសេវាតាក់ស៊ីម៉ែត្រ ដើម្បីសុវត្ថិភាពផ្ទាល់ខ្លួន៕ រក្សាសិទ្ធិដោយ៖ លឹម ហុង