ឆ្កែគឺជាសត្វដែលលេងច្រើន និងចូលចិត្តរត់ទៅវិញទៅមក រត់ខាំគ្នាលេង និងកាយដីជាដើម។ ឆ្កែខ្លះចូលចិត្តពាំរបស់ផ្សេងៗមកផ្ទះ ដែលធ្វើឲ្យម្ចាស់ខឹង ឬភ័យជាដើម ប៉ុន្តែឆ្កែប្រេស៊ីលមួយក្បាលនេះពាំរបស់មួយនេះមកផ្ទះ ដែលធ្វើឲ្យម្ចាស់របស់វាអស់សំណើចយ៉ាងខ្លាំង។
ឆ្កែញីមួយក្បាលនោះឈ្មោះ Pandora។ វាបានទៅលេងក្រោយផ្ទះមួយភ្លែត ហើយបានពាំធ្មេញសិប្បម្មិតមួយក្រាស ដែលមើលទៅត្រូវនឹងមាត់របស់វាតែម្តង ហើយនៅពេលម្ចាស់វាហៅវាមកជិត និងបើកមាត់វាមើល ម្ចាស់វាអស់សំណើចយ៉ាងខ្លាំង។
ម្ចាស់វាឈ្មោះ Lucas Alves Magalhães និយាយថា ទំនងឆ្កែរបស់គាត់ទៅក្រោយផ្ទះ ហើយកាយដីលេង។ ដំបូងគាត់មិនដឹងទេ តែពេលហៅវាមកជិត និងបើកមាត់វាមើល គាត់ទប់សំណើចមិនបាន។
លោក Lucas Alves Magalhães បានបញ្ជាក់ថា ធ្មេញសិប្បនិម្មិតមួយក្រាសនោះទំនងជារបស់ម្ចាស់ផ្ទះមុន ដែលពួកគេមានវ័យចំណាស់។ ម្ចាស់ផ្ទះមុន ទំនងប្តូរធ្មេញសិប្បិនិម្មិតរបស់ពួកគេរួចហើយកប់វានៅខាងក្រោយផ្ទះ៕ សុភ័ក្ត្រ
