ភ្នំពេញ ៖ ករណីថៅកែស្រីចិត្តខ្មៅធ្វើទារុណកម្មលើក្មេងស្រីជាកូនឈ្នួល កម្លាំងនគរបាលព្រហ្មទណ្ឌខណ្ឌពោធិ៍សែនជ័យ នៅព្រឹកថ្ងៃទី៣០ ខែឧសភា ឆ្នាំ២០១៨នេះ បានបញ្ជូនខ្លួនថៅកែស្រីចិត្តកំណាចទៅតុលាការ ដើម្បីបន្តនីតិវិធីច្បាប់។
នគរបាលព្រហ្មទណ្ឌខណ្ឌពោធិ៍សែនជ័យ បានឲ្យដឹងថា ជនសង្ស័យឈ្មោះ ម៉េង រ័ត្នពិសី ហៅ សុភា អាយុ៣៣ឆ្នាំ មុខរបរលក់សម្លៀកបំពាក់ ជាជនជាតិវៀតណាមកាត់ចិន ដែលបានធ្វើទារុណកម្មក្មេងស្រីជាកូនឈ្នួល អស់រយៈពេល៤ឆ្នាំ មកហើយនោះ មកកាន់សាលាដំបូងរាជធានីភ្នំពេញ ដើម្បីចាត់ការតាមនីតិវិធីច្បាប់ហើយ។ ចំណែកក្មេងស្រីរងគ្រោះឈ្មោះ ជា ស្រីនូ ហៅស្រីពៅ អាយុ១៦ឆ្នាំ មករស់នៅផ្ទះកើតហេតុខាងលើរយៈពេល៤ឆ្នាំហើយ ជាអ្នកធ្វើការងារផ្ទះ មានស្រុកកំណើតភូមិទំនប់ថ្មី ឃុំត្រពាំងតាវ ស្រុកអន្លង់វែង ខេត្តឧត្តរមានជ័យ។
សូមជម្រាបថា កាលពីវេលាម៉ោង៥ល្ងាចថ្ងៃទី២៧ ខែឧសភា ឆ្នាំ២០១៨ កម្លាំងសមត្ថកិច្ចបានចុះទៅអន្តរាគមន៍រំដោះក្មេងរងគ្រោះ នៅផ្ទះអ្នកលក់សម្លៀកបំពាក់មួយកន្លែង លេខ១៧អា ខាងត្បូងជាប់ផ្សារបុរីសន្តិភាព២ ភូមិតំណាក់ត្រយឹង សង្កាត់ចោមចៅ២ ខណ្ឌពោធិ៍សែន រាធានីភ្នំពេញ៕ ដោយ៖បញ្ញាស័ក្តិ