តាម Gulf News ឲ្យដឹងថា បុរសម្នាក់នៅឌូបៃ បានលែងលះជាមួយភរិយាក្រោយរៀបការ ១៥ នាទី ប៉ុណ្ណោះ ព្រោះតែមានអារម្មណ៍ត្រូវរំលោភបំពានដោយឪពុករបស់កូនក្រមុំ ។
អាពាហ៍ពិពាហ៍អូសបន្លាយពេលតែ ១៥នាទី ព្រោះតែឪពុកក្មេកស្រឡាញ់លុយជ្រុល ។
ជាក់ស្តែងមុនពេលរៀបការប្រព្រឹត្តទៅបុរសនេះបានយល់ព្រមនឹងកាដូជូនអនាគតឪពុកក្មេកទឹកប្រាក់ ១០០.០០០Dh (ប្រមាណជាង ៣ម៉ឺនដុល្លារ) ប្រៀបដូចជាបណ្តាការ។
គាត់បានប្រគល់ឲ្យឪពុកក្មេកចំនួនលុយនេះពាក់កណ្តាលហើយសន្យាថា នឹងប្រគល់បង្គ្រប់ចំនួនដែលនៅសល់ក្រោយពេលរៀបចំបែបបទអាពាហ៍ពិពាហ៍នៅតុលាការអ៊ីស្លាម Sharia ។
ក្រោយពេលពិធីជប់លៀងនិងធ្វើក្រដាសស្នាមរួចរាល់ ភ្ញៀវចូលរួមបានវិលត្រឡប់ទៅវិញអស់ បុរសជាឪពុកក្មេកបានឲ្យកូនប្រសារសងលុយដែលនៅសល់ភ្លាមៗ ។ កូនប្រសារនិយាយថា សូមចាំបន្តិចទៅលុយទុកនៅក្នុងរថយន្តក្រៅផ្ទះ ។
ក៏ប៉ុន្តែបុរសជាឪពុកនៅតែចចេះទាមទារឲ្យប្រគល់លុយភ្លាមៗជាហេតុធ្វើឲ្យកូនប្រសាររូបនេះទទួលអារម្មណ៍ថា ប្រៀបដូចខ្លួនគាត់កំពុងជំពាក់បំណុលគេអីចឹង ។
កូនកម្លោះផ្ទុះកំហឹងព្រោះមានអារម្មណ៍ថា ខ្លួនត្រូវទារយកលុយដូចជំពាក់បំណុលគេ។
ព្រោះតែខឹងខ្លាំងពេកបុរសនោះសុំលែងលះភរិយាភ្លាម ព្រោះតែទ្រាំទ្រលែងបាន ។
គិតទៅអ្នកទាំងពីរក្លាយជាប្តីប្រពន្ធលើក្រដាសបានត្រឹម ១៥នាទី ប៉ុណ្ណោះ ពិតជាអាណិតកូនក្រមុំដែលមានឪពុកស្រឡាញ់លុយងប់បែបនេះ ៕ ចន្ទ្រា