ឃាតករជាអតីតមន្រ្តីយោធាវ័យក្មេង ដែលបានបាញ់សម្លាប់គូដណ្តឹងរបស់ខ្លួនជានិស្សិតពេទ្យ ដែលបានគេចរួចពីសំណាញ់ច្បាប់អស់រយៈពេលជាច្រើនឆ្នាំ ខណៈមហាជនក៏បានរិះគន់ថា សមត្ថកិច្ចអសមត្ថភាពចាត់ការលើសំណុំរឿងនេះ ព្រោះតែឃាតករមានខ្នងអំណាចធំ តែនៅពេលនេះ ត្រូវបានចាប់ខ្លួនហើយ នៅក្នុងប្រទេសថៃ ខណៈរូបគេកំពុងសម្ងំលាក់ខ្លួនធ្វើជាកម្មករខុសច្បាប់នៅទីនោះ។
នេះបើតាមគណនីហ្វេសប៊ុកឈ្មោះ រាជ សីហ៍ បានបង្ហោះដំណឹងក្តៅៗនេះឲ្យដឹងថា៖ ករណីឃាតកម្មដែលល្បីកក្រើករាជធានីភ្នំពេញ កាលពីឆ្នាំ ២០២០ នោះ ដោយខាងកម្ពុជាបានសហការផ្តល់ព័ត៌មានទៅកាន់សមត្ថកិច្ចថៃ បច្ចុប្បន្នសមត្ថកិច្ចថៃបានឃាត់ខ្លួនជនដៃដល់បានហើយ និងកំពុងតែអនុវត្តតាមច្បាប់អន្តោប្រវេសន៍ មុននឹងប្រគល់មកកម្ពុជា ដើម្បីចាត់ការតាមផ្លូវច្បាប់បន្ត ដោយជនដៃដល់បានសម្ងំលាក់ខ្លួនធ្វើជាកម្មករខុសច្បាប់នៅខេត្តចន្ទបូរី ប្រទេសថៃ ។
គួររំម្លឹកផងដែរថា ជនដៃដល់ដែលបាញ់នារីជាគូដណ្ដឹងនេះ គឺជាមន្ដ្រីយោធាពាក់ស័ក្ដិ៤ មានឈ្មោះ យឺន វ៉ាន់ដេត ហើយដើមចមដែលនាំឲ្យមានការបាញ់ប្រហារនេះ ត្រូវបានគេដាក់ការសង្ស័យជំនាញដំបូងថា គឺផ្ដើមចេញពីភ្លើងប្រចណ្ឌ។
ចំណែកនារីរងគ្រោះមានឈ្មោះ ជុន ឌីណា អាយុ ២៦ ឆ្នាំ ជានិស្សិតពេទ្យផ្នែកឡាបូ និងជាអ្នកលក់ផលិតផលថែរក្សាសម្រស់តាមអនឡាញ និងមានទីកន្លែងស្នាក់នៅផ្ទះល្វែង ក្នុងបុរីរំចេកអូឌឹម តាមបណ្ដោយផ្លូវលំ BT សង្កាត់កន្ទោក ខណ្ឌកំបូល រាជធានីភ្នំពេញ៕ រក្សាសិទ្ធិដោយ៖ លឹម ហុង
