គេទំព័រ taiwannews បានចុះផ្សាយនៅថ្ងៃទី១៨ ឧសភា ថា នាង Grace Lee ដែលជាជននិរទេសមកពីកូរ៉េខាងត្បូង និងជាបុគ្គលិកព័ត៌មានទូរទស្សន៍ម្នាក់ នៅក្នុងប្រទេសហ្វីលីពីន បានសារភាពថា បានណាត់ជួបជាមួយអតីតប្រធានាធិបតីប្រទេសនេះ លោក Benigno Aquino III ។
Grace Lee អាយុ ៣៦ ឆ្នាំ ដែលមានឈ្មោះជាជនជាតិកូរ៉េគឺ Lee Kyung-hee បានបង្ហើបឲ្យដឹងនៅក្នុងកម្មវិធីជជែកកម្សាន្តកូរ៉េ “Video Star” កាលពីថ្ងៃអង្គារថា នាង និងអតីតប្រធានាធិបតីហ្វីលីពីនវ័យ ៥៨ ឆ្នាំ រូបនេះ បានជួបគ្នាអស់រយៈពេលប្រហែល ៤ ខែ ក្នុងឆ្នាំ២០១២ ។ នេះបើយោងតាម Liberty Times ។
នាងនិយាយថា ទំនាក់ទំនងនេះរបស់ពួកគេ ពុំទាន់គ្រប់គ្រាន់ ដើម្បីឲ្យសាធារណជនដឹងលឺនោះទេ ។ ហើយនាងបន្ថែមថា វាគឺជាបទពិសោធន៍មិនធម្មតាមួយ ក្នុងការទៅណាត់ជួបជាមួយនរណាម្នាក់ ដែលមានឋានៈខ្ពង់ខ្ពស់នៅក្នុងសង្គម ។
យោងតាម Lee ឧទាហរណ៍ ការត្រួតពិនិត្យសន្តិសុខនៅកន្លែងភោជនីយដ្ឋានផ្សេងៗ គឺត្រូវតម្រូវអនុវត្ត មុនពេលការណាត់ជួបសម្រាប់អាហារពេលល្ងាចរបស់ពួកគេ ដែលជូនកាល ពាក់ព័ន្ធនឹងវិធានការ ដាក់ «អ្នកការពារ» នៅតាមអគារជិតៗនោះ ដើម្បីធានាសុវត្ថិភាពមេដឹកនាំប្រទេស ។
កាសែត Liberty Times បានរាយការណ៍ថា ទំនាក់ទំនងខ្លីរបស់អ្នកទាំងពីរបានបញ្ចប់ភ្លាមៗ បន្ទាប់ពីសារព័ត៌មានបានផ្ទុះឡើងអំពីសម្ពន្ធភាពដ៏ពិសេសនេះ ប៉ុន្តែ នាង Lee បានកោតសរសើរលោក Benigno Aquino III ជាមនុស្សឆ្លាត និងចិត្តល្អ ដែលនៅតែរក្សាទំនាក់ទំនង ៕ ចន្ទី