ពិតជារឿងដ៏ហួសហេតុ និងខ្លោចចិត្តខ្លាំងណាស់ នៅពេលដែលបានដឹងថា រថយន្តសង្គ្រោះរបស់គ្លីនិកឯកជនមួយ ដែលគិតលុយជាធំ តែគ្មានគុណធម៌ជាមនុស្ស បានដឹកជនរងគ្រោះទៅសង្គ្រោះ ប៉ុន្តែ ពេលដឹងថា ជនរងគ្រោះបានស្លាប់ ក៏ដឹកសពយកមកទុកចោលនៅកន្លែងកើតហេតុវិញ ដែលធ្វើឲ្យក្រុមគ្រួសារ ស្វែងរកឡើងវិលក្បុង ដោយមិនដឹងដឹកយកទៅទីណា ព្រោះរថយន្តគ្មានផ្លាកសម្គាល់គ្លីនិក និងសូម្បីលេខទូរស័ព្ទក៏គ្មាន។
នេះបើតាមប្រភពពីអ្នកប្រើប្រាស់ហ្វេសប៊ុក បានប្រាប់ឲ្យដឹងពីករណីដ៏ហួសចិត្តមួយនេះថា៖ ដេីររកសពរាប់ម៉ោងដោយសាររថយន្តសង្គ្រោះបន្ទាន់គ្មានផ្លាកសម្គាល់គ្លីនិក និងលេខទូរស័ព្ទ បានដឹកសាកសពស្រ្តីម្នាក់ដែលស្លាប់ដោយសារករណីគ្រោះថ្នាក់ចរាចរណ៍នៅចំណុចរង្វង់មូលព្រែកសំរោង ក្រុងតាខ្មៅខេត្តកណ្ដាល មិនដឹងដឹកយកទៅទីណា ក្រុមគ្រួសារសពដេីររកសពរាប់ម៉ោងទម្រាំឃេីញ បែរជាមកឃើញនៅកន្លែងកេីតហេតុទៅវិញ ពេលសួរនាំទេីបដឹងថា មានរថយន្ដសង្គ្រោះបន្ទាន់មួយ បានដឹកអ្នករបួសទៅ តែក្រោយពេលដឹងថា ជនរងគ្រោះបានផុតដង្ហើមស្លាប់ក៏ដឹកយកមកកន្លែងកេីតហេតុវិញ ។ តេីរឿងរញ៉េរញ៉ៃបែបនេះ ពេលណាអាចគ្រប់គ្រងបាន?។
តែដោយឡែក បើតាមគណនីហ្វេសប៊ុកឈ្មោះ SE NG ដែលបានដឹងពីកន្លែងកើតហេតុ បានប្រាប់ឲ្យដឹងផងថា សពស្រ្តីជនរងគ្រោះ ត្រូវបានឡានពេទ្យនោះ បានដឹកទៅមិនទាន់ផុតពីកន្លែងកើតហេតុផង (ប្រហែលជា៥០០ម៉ែត្រ) និងបូករួមស្ទះផ្លូវខ្លាំងផងដែរ ក៏បានឃើញឡានពេទ្យបានបើកត្រលប់មកកន្លែងកើតហេតុវិញភ្លាមៗ ដោយបុគ្គលិកពេទ្យ បានប្រាប់ថា ជនរងនោះបានស្លាប់ហើយ ព្រោះឡានបានកិនចំខ្លួនស្ត្រីនោះបាក់ចង្កេះ និងបែកផ្លោកនោមអស់ហើយ»។
ទាក់ទងករណីដ៏ហួសចិត្តខ្លាំងបំផុតនេះផងដែរ គេក៏បានលើកឡើងចំៗថា៖ «អ្នករបួស ៦០ ទៅ ៨០ ដុល្លារ ដល់ពេលស្លាប់ ដឹកហ្វី្រ មកទុកកន្លែងដដែល ព្រោះមិនដឹងទារលុយម៉េច បើគាត់ស្លាប់បាត់ ទាន់ ???, មានវីដេអូមួយទើបផុស ៤, ៥ ឡាន ដណ្តើមអ្នករបួស បំពានប្រកាសក្រសួងសុខាភិបាល, ពេលខ្លះឈ្លោះគ្នាក៏មានដែរ ព្រោះរឿងដណ្តើម «ម៉ូយ» ជនរងគ្រោះ, សូម្បីតែរឿងដ៏គួរឲ្យខ្លាចផ្សារបែបនេះ ក៏អាចបង្កើតទៅជាឆាកកប្លែងបានដែរ ឱ..មនុស្សអើយ? បានន័យថាម៉េច ដឹកមនុស្សទៅសង្រ្គោះ ពេលដឹងថាស្លាប់ហើយ ក៏ដឹកមកកន្លែងកើតហេតុវិញ បើសិនអ្នកជាសាច់ញាតិរបស់សព តើអ្នកមានអារម្មណ៍យ៉ាងណា?,….»។
សូមបញ្ជាក់ថា កាលពីវេលាម៉ោង៤ និង៣០នាទី រសៀលថ្ងៃទី២១ ខែកញ្ញា ឆ្នាំ២០២២ មានករណីគ្រោះថ្នាក់ចរាចរណ៍មួយបានកើតឡើង ដោយស្រ្តីម្នាក់ទើបនឹងរៀបការហើយបាន២ ទៅ ៣ខែ ជិះម៉ូតូធូដេ១គ្រឿង ពាក់ស្លាកលេខភ្នំពេញ 1BY-1366 ត្រូវរថយន្តកុងតឺន័រមួយគ្រឿង ពាក់ស្លាកលេខភ្នំពេញ 4A-9987 បើកបរបុក និងកិន បណ្តាលឲ្យស្លាប់បាត់បង់ជីវិតចោលប្តី គួរឲ្យអាសូរ។ ហេតុការណ៍នេះ បានកើតឡើងនៅត្រង់ចំណុចម្តុំរង្វង់មូលស្ពានព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល ៕ រក្សាសិទ្ធិដោយ៖ លឹម ហុង