គេហទំព័រ Hk01 នៅថ្ងៃទី២២ ខែកញ្ញា ឆ្នាំ២០២២ បានបញ្ចេញករណីដ៏ភ្ញាក់ផ្អើល ខណៈដែលអ្នកប្រើប្រាស់បណ្តាញសង្គម បានចែករំលែកព្រោងព្រាត ពីវីដេអូឃ្លីបនៃហេតុការណ៍ដ៏រន្ធត់មួយ ដែលបានកើតឡើងនៅ Tsim Sha Tsui ក្នុងទីក្រុងហុងកុង នៅពេលដែលស្ត្រីស្លៀកឈុតរាត្រីសិចសុីម្នាក់ កំពុងព្យាយាមតោងឡើងតាមសសៀជញ្ជាំងអគារ ដែលបង្កការភ័យស្លន់ស្លោដល់ប្រជាពលរដ្ឋក្នុងតំបន់ជាខ្លាំង។ ពួកគេទាំងអស់គ្នាឈរមើល ហើយស្រែកឆោឡោទាំងតក់ស្លុត។
តែទោះជាយ៉ាងណា បន្ទាប់មកពីព្យាយាមឡើងតាមសរសៀជញ្ជាំងដល់ជាន់ទី៣ ស្រីស្អាតរូបនោះ ក៏បានចុះមកវិញយឺតៗតាមបំពង់និងរហូតដល់ចុងបញ្ចប់ ព្យួរខ្លួនពីម៉ាស៊ីនត្រជាក់ ទៅកាន់ផ្លាកសញ្ញាចរាចរណ៍ ឡើងត្រដាបត្រដូស ហើយក៏បានទទួលការជួយទ្រពីប្រជាពលរដ្ឋរហូតចុះដល់ដីដោយសុវត្ថិភាព។
យោងតាមប៉ូលីសហុងកុង ហេតុការណ៍នេះបានកើតឡើងនៅម៉ោង ៤ រសៀល ថ្ងៃទី២២ ខែកញ្ញា នៅពេលដែលស្ត្រីរូបនោះកំពុងរត់គេចពីប៉ូលីស បន្ទាប់ពីមានប្រតិបត្តិការចាប់ខ្លួនក្រុមជនអន្តោប្រវេសន៍ខុសច្បាប់មួយក្រុមនិងធ្វើពេស្យាចារដោយសម្ងាត់នៅក្នុងអគារនោះ។
តែអ្វីដែលមិននឹកស្មានដល់នោះ មន្ត្រីបានលាតត្រដាងការពិតដ៏ភ្ញាក់ផ្អើលថា ក្រោយការស៊ើបអង្កេតបឋម បានរកឃើញថា “ស្ត្រី” នោះ តាមពិតមិនមែនជាស្ត្រីពិតនោះទេ ប៉ុន្តែជាបុរសអាយុ ៣០ ឆ្នាំ ជាជនជាតិថៃ។ ហើយបើទោះបីជាគាត់មិនរងរបួសធ្ងន់ធ្ងរ អំឡុងពេលរត់គេចខ្លួនក៏ដោយ ក៏ប៉ូលីសបានយកគាត់ទៅមន្ទីរពេទ្យដើម្បីព្យាបាល មុននឹងនាំទៅឃុំខ្លួនបណ្តោះអាសន្នតាមនីតិវិធីច្បាប់។
សូមបញ្ជាក់ថា ប្រតិបត្តិការចាប់ខ្លួនរបស់អាជ្ញាធរហុងកុងដែលគេស្គាល់ថាជា “Wind Rider” គឺសំដៅលើជនអន្តោប្រវេសន៍និងធ្វើពេស្យាចារដោយខុសច្បាប់។ ហើយក្នុងប្រតិបត្តិការនេះផងដែរ ប៉ូលីសបានចាប់ខ្លួនមនុស្សប្រុស ១៤ នាក់ និងស្ត្រី ១៨ នាក់ពីបទប្រព្រឹត្ត និងរៀបចំសកម្មភាពពេស្យាចារតាមគេហទំព័រ និងបណ្តាញសង្គមផ្សេងៗ ដោយមានជំនួយពីក្រុមឧក្រិដ្ឋជនក្នុងស្រុក ដែលផ្តល់ទាំងកន្លែងស្នាក់នៅ និងក៏ដូចជាការណាត់ជួបភ្លៀវ៕ រក្សាសិទ្ធិដោយ៖ លឹម ហុង
