ខណៈពេលដែលប្រទេសវៀតណាម ថៃ កំពុងប្រឈមនឹងគ្រោះធម្មជាតិព្យុះទីហ្វុង Noru, នៅសហរដ្ឋអាមេរិក ឯណោះវិញ ក៏បានកំពុងជួបព្យុះ Hurricane Ian ដែលបង្កឱ្យមានភ្លៀងធ្លាក់ខ្លាំង និងទឹកជំនន់ជន់លិចតំបន់រស់នៅរបស់ប្រជាជន បង្កការខូចខាតយ៉ាងធ្ងន់ធ្ងរ។
តែអ្វីដែលធ្វើឲ្យចាប់អារម្មណ៍ និងភ្ញាក់ផ្អើលខ្លាំងនោះ គឺនៅថ្ងៃទី១៩ ខែកញ្ញា ឆ្នាំ២០២២ កាសែតញូវយ៉កប៉ុស្តិ៍ បានរាយការណ៍ថា ជនជាតិអាមេរិកវ័យក្មេងម្នាក់ឈ្មោះ Ernie ដែលប្រើគណនី Instagram lambo9286 បានចែករំលែករូបថតដ៏ភ្ញាក់ផ្អើលមួយ ដោយបានបង្ហាញខណៈពេលដែលរថយន្តទំនើបម៉ាក McLaren P1 ពណ៌លឿងដ៏ប្រណីតរបស់គាត់ ដែលទើបនឹងទិញក្នុងតម្លៃជាង ១ លានដុល្លារ ត្រូវអណ្តែតតាមទឹក ដែលកំពុងជន់លិចខ្លាំង ដោយមិនអាចធ្វើអ្វីបាន។
លោក Ernie ដែលជាម្ចាស់រថយន្តទំនើបមួយគ្រឿង បានបង្ហោះរូបភាពជាបន្តបន្ទាប់ ដោយបង្ហាញពីព្រឹត្តិការណ៍ដ៏តក់ស្លុត នៅពេលរថយន្ត McLaren P1 ដែលត្រូវបានចតនៅក្នុងយានដ្ឋាន បន្ទាប់មក ក៏ត្រូវបានទឹកជន់លិចស្ទើរដល់ដំបូលរថយន្ត មុនពេលទឹកហូរបោកបក់នាំមកខាងក្រៅ ទៅផ្ទប់នឹងដើមឈើបាក់រលំ។
ក្រៅពី McLaren P1 ពណ៌លឿង គឺនៅមានរថយន្តទំនើបៗរបស់គាត់ដទៃទៀត ក៏ត្រូវបានក្រឡាប់ផ្ងារជើង ក្នុងនោះមិនថាជាឡាន Lamborghini ពណ៌ខៀវ និង Rolls Royce ពណ៌ស នោះទេ។
រូបភាពនេះ បានទាក់ទាញចំណាប់អារម្មណ៍យ៉ាងខ្លាំង ពីអ្នកប្រើប្រាស់សង្គម ដែលបានបញ្ចេញមតិផ្សេងៗ ដោយក្នុងនោះមានការសម្តែងក្តីអាណិតថា “ឡានអាចជួសជុលបាន សូមឲ្យអ្នក និងគ្រួសាររបស់អ្នកមានសុវត្ថិភាព, “សោកស្តាយណាស់”, “នេះជាការលំបាករបស់ក្រុមហ៊ុនធានារ៉ាប់រង”៕ រក្សាសិទ្ធិដោយ៖ លឹម ហុង
