កាលពីថ្ងទី៥ ខែតុលា ឆ្នាំ២០២២ កងទ័ពជើងទឹកថៃ បានប្រទះឃើញសាកសពស្រ្តីម្នាក់ ដែលត្រូវបានគេសម្លាប់យ៉ាងព្រៃផ្សៃ ដោយញាត់ចូលក្នុងវ៉ាលីធំមួយ រួចទម្លាក់ចូលក្នុងទឹកទន្លេមេគង្គ ប៉ុន្តែ ក៏បានរសាត់អណ្តែតមកដល់ប្រទេសថៃ ស្ថិតក្នុងភូមិលេខ ១០ ឃុំណាក់ផានម ស្រុកថាផាន់ ខេត្ត ណាខនផាន។
ស្នងការនគរបាល ថា ផាន់ បានឲ្យដឹងថា នៅពេលចុះពិនិត្យ សមត្ថកិច្ចបានរកឃើញវ៉ាលីពណ៌ខ្មៅធំមួយ (ប្រហែល ៩០ សង់ទីម៉ែត្រ ទទឹងប្រវែងប្រហែល ៦០ សង់ទីម៉ែត្រ)។ នៅខាងក្នុង រកឃើញសាកសពស្ត្រីសក់វែង អាយុប្រហែល ៣០-៤០ ឆ្នាំ កម្ពស់ប្រហែល ១៦០ សង់ទីម៉ែត្រ ស្បែកស ពាក់អាវយឺតដៃវែងពណ៌ខៀវ ខោខូវប៊យពណ៌ខៀវ អាវទ្រនាប់ពណ៌ខ្មៅ រុំជាមួយថង់ពណ៌ខ្មៅយ៉ាងតឹង។ មុខរបស់ជនរងគ្រោះហាក់ដូចជាត្រូវបានវាយកម្ទេចដោយវត្ថុរឹង។ លើសពីនេះ សមត្ថកិច្ចក៏បានរកឃើញដុំថ្មធំមួយ (ប្រវែងប្រហែល 30 សង់ទីម៉ែត្រ ទទឹង 30 សង់ទីម៉ែត្រ) ដាក់ក្នុងវ៉ាលីនោះ ដោយគេរំពឹងថា នឹងលិចចូលក្នុងទឹកបាត់ ប៉ុន្តែ ពុំបានរកឃើញភស្តុតាងឯកសារផ្ទាល់ខ្លួនរបស់ស្រ្តីជនរងគ្រោះនោះទេ។
បើតាមស្លាកស្នាមរបួសលើផ្នែកផ្សេងទៀតនៃសព គឺមិនអាចធ្វើកោសល្យវិច័យបានទេ ដោយសារសភាពសព ដែលតាមការប៉ាន់ស្មានថា អាចត្រូវបានគេសម្លាប់យ៉ាងហោច៥ថ្ងៃហើយ។ ប៉ុន្តែ សមត្ថកិច្ចបានបញ្ជូនសពទៅតម្កល់នៅវិទ្យាស្ថានកោសល្យវិច្ច័យ នៅខេត្តខនកែន ដើម្បីប្រមូលភស្តុតាងលម្អិត និងរង់ចាំលទ្ធផលតេស្ត DNA និងក៏ដូចព័ត៌មានបន្ថែមពីសាច់ញាតិ។
លទ្ធផលធ្វើកោសល្យវិច័យ បានរកឃើញមានស្នាមរបួសត្រូវវាយលើពេញផ្ទៃមុខ។ ក្នុងនោះដែរ ក៏មានស្លាកស្នាម បាញ់ដោយអាវុធមិនស្គាល់ម៉ាក និងគ្រាប់ចំនួន២គ្រាប់ មិនស្គាល់ទំហំ ចំក្បាល។
បន្ទាប់មក សពនោះត្រូវបានគេស្គាល់ថា គឺជាស្ត្រីជនជាតិឡាវ អាយុប្រហែល ៤០ ឆ្នាំ មាន Wipaporn (មិនបញ្ចេញឈ្មោះទាំងស្រុង) ដែលកាន់តំណែងជាប្រធានក្រុមហ៊ុនឯកជន ធ្វើអាជីវកម្មលើគម្រោងសំណង់ធំៗ នៅរដ្ឋធានីវៀងច័ន្ទ ប្រទេសឡាវ។ រថយន្តរបស់ជនរងគ្រោះ ក៏ត្រូវបានគេប្រទះឃើញបោះចោលទៅក្នុងទន្លេមេគង្គ ជាតម្រុយមួយដែលគេជឿថា ហេតុការណ៍នេះ បានកើតឡើងនៅប្រទេសជិតខាងឡាវ ហើយក៏មានកូនស្រីអាយុ៥ឆ្នាំម្នាក់ របស់ជនរងគ្រោះ ក៏មិនទាន់រកឃើញនៅឡើយ។ តែទោះជាយ៉ាងណា សមត្ថកិច្ចថៃបានបញ្ជាក់ថា សាកពស្រ្តីនោះ ត្រូវបានរក្សាទុកនៅបន្ទប់បញ្ចុះសព នៅមន្ទីរពេទ្យខេត្ត Nakhon Phanom ដើម្បីរង់ចាំសាច់ញាតិមកបញ្ជាក់ និងទទួលយកទៅធ្វើបុណ្យតាមប្រពៃណី។
តែអ្វីដែលភ្ញាក់ផ្អើលខ្លាំងនោះ គឺស្របពេលហេតុការណ៍នេះបានកើតឡើងផ្អើលក្នុងប្រទេសថៃ គេក៏បានប្រទះឃើញទំព័រហ្វេសប៊ុកឡាវមួយ នៅថ្ងៃទី៤ ខែតុលា ឆ្នាំ២០២២ ស្រាប់តែបានបញ្ចេញរូបភាពស្រ្តីរងគ្រោះ និងកូនស្រីបាត់ខ្លួន គឺជាប្រពន្ធកូនរបស់នាយករដ្ឋមន្រ្តីឡាវតែម្តង ដោយបានសរសេរបញ្ជាក់បែបនេះថា៖ «ករណីឃាតកម្មប្រពន្ធក្មេង! ការស្លាប់របស់ភរិយានាយករដ្ឋមន្ត្រី នឹងបញ្ចប់ដោយសាមញ្ញ ដូចជាមិនដឹង មិនឃើញ មិនឮ ឬបដិសេធអ្វីសោះ បិទព័ត៌មានដោយស្ងប់ស្ងាត់ល្អណាស់។ ប្រពន្ធនាយករដ្ឋមន្ត្រីស្លាប់ហើយ លាតត្រដាងច្រើន ឈ្មោះជានាយករដ្ឋមន្ត្រីមិនខ្មាស អ្នកកាសែតឡាវមិនហ៊ានផ្សាយព័ត៌មានទេ ប៉ុន្តែ អ្នកកាសែតថៃចុះផ្សាយព័ត៌មានព្រោងព្រាត។ សូមតាមដានភាគបន្ត»៕ រក្សាសិទ្ធិដោយ៖ លឹម ហុង
