ផ្ទះតម្លៃជាង ៤០០លានដុង (ជាង ១៦០០០ ដុល្លារ) របស់អ្នកគ្រូបង្រៀនម្នាក់ ដែលក៏ត្រូវបានដឹងថា ជាផ្ទះខ្ចីលុយគេធ្វើចំនួន ៣០០ លានដុង (ជាង ១២០០០ ដុល្លារ) និងទើបតែចូលនៅបានប៉ុន្មានខែប៉ុណ្ណោះ ត្រូវទឹកជំនន់ជន់លិច បំផ្លាញគ្មានសល់ ខណៈទ្រព្យសម្បត្តិ ក៏ហូរតាមទឹកអស់ទៀត។
អ្នកស្រី La Thi Van (ឡា ធីវ៉ាន់) អាយុ ៣៦ ឆ្នាំ រស់នៅក្នុងភូមិ Hoa Son (ហោសុន) ឃុំ Ta Ca (តាកា) ស្រុក Ky Son (គីសុន) ខេត្ត Nghe An (ងឺអាន់) បានរៀបរាប់ទាំងទឹកមុខក្រៀមក្រំថា ផ្ទះរបស់អ្នកស្រី និងសម្ភារៈប្រើប្រាស់ទាំងអស់ ត្រូវបានទឹកជំនន់ដ៏ខ្លាំងក្លា ដែលបានកើតឡើងនៅព្រឹកព្រលឹមថ្ងៃទី២ ខែតុលា ឆ្នាំ២០២២ បំផ្លាញអស់ហើយ ដោយបន្សល់ទុកដីភក់ និងសំរាមមែកឈើប៉ុណ្ណោះ។
អ្នកស្រី វ៉ាន់ បានបន្តថា៖ «ឥឡូវនេះ មិនមានអ្វីនៅសល់ទៀតទេ វាពិតខ្លោចផ្សារណាស់ ពេលឃើញផ្ទះបែកបាក់ខ្ទេចខ្ទីបែបនេះ ខ្ញុំមិនដឹងថា ពេលណាខ្ញុំអាចមានលទ្ធភាពសង់ផ្ទះឲ្យកូនខ្ញុំរស់នៅជាថ្មីបានទៀតទេ»។
អ្នកស្រីក៏បានឲ្យដឹងថា អ្នកស្រីជាគ្រូមត្តេយ្យនៅឃុំ Bao Nam (ស្រុក Ky Son, Nghe An)។ អ្នកស្រីមានកូន២នាក់ ដែលម្នាក់រៀនថ្នាក់មធ្យមសិក្សា និងម្នាក់ទៀតរៀននៅបឋមសិក្សា។ កាលពី៦ឆ្នាំមុន ប្តីរបស់គាត់បានស្លាប់ភ្លាមៗ ដោយជំងឺដាច់សរសៃឈាមខួរក្បាល។ ចាប់តាំងពីពេលនោះមក អ្នកស្រីត្រូវធ្វើការរកស៊ីចិញ្ចឹមកូនៗតែម្នាក់ឯងប៉ុណ្ណោះ។
អ្នកស្រីបន្តថា ដើម្បីបានផ្ទះឲ្យកូនរស់នៅបានសមរម្យ អ្នកស្រី វ៉ាន់ បានសម្រេចចិត្តខ្ចីប្រាក់គេ ៣០០ លានដុង និងប្រាក់បន្តិចបន្តួចដែលនាងបានសន្សំ ដើម្បីសាងសង់ផ្ទះដ៏រឹងមាំមួយសម្រាប់កូនៗ។
អ្នកស្រី និងកូនៗ ពិតជារំភើបរីករាយណាស់ ដោយលែងបានរស់នៅក្នុងផ្ទះដ៏ទ្រុឌទ្រោមទៀតហើយ បន្ទាប់ពីបានផ្ទះថ្មីនៅដ៏សមរម្យ ដែលទើបត្រូវបានសង់រួច កាលពីអំឡុងខែឧសភា ឆ្នាំ២០២២។ ប៉ុន្តែ អ្វីដែលឈឺចាប់បំផុតនោះ គឺភាពរីករាយរបស់ម្តាយកូនទាំងបី មិនបានប៉ុន្មានខែផង ស្រាប់តែផ្ទះថ្មីត្រូវរលាយទៅវិញ ដោយសារតែទឹកជំនន់ដ៏ខ្លាំងនៅដើមខែតុលា នេះ បានបំផ្លាញគ្មានសល់។
ជាក់ស្តែង ពីផ្ទះស្អាតដ៏ធំទូលាយ បន្ទាប់ពីទឹកជំនន់ គឺនៅសល់តែជញ្ជាំងប្រេះពីរ និងដំបូលប្រក់ក្បឿង រង់ចាំការដួលរលំបន្តទៀតប៉ុណ្ណោះ ខណៈទ្រព្យសម្បត្តិ សម្ភារៈប្រើប្រាស់ ក៏ត្រូវបានទឹកហូរនាំទៅអស់។
អ្នកស្រី វ៉ាន់ បន្តថា នៅរសៀលថ្ងៃទី១ ខែតុលា មានភ្លៀងធ្លាក់យ៉ាងខ្លាំង។ លុះដល់ល្ងាចថ្ងៃដដែល ភ្លៀងបានធ្លាក់កាន់តែខ្លាំង ហើយទឹកស្ទឹងក៏បានហក់ឡើង។ អ្នកស្រី ពិតជាមានការព្រួយបារម្ភយ៉ាងខ្លាំង ព្រោះផ្ទះស្ថិតនៅមាត់អូរ ដូច្នេះហើយអ្នកស្រីបានឱបកូនពេញមួយយប់ គេងមិនលក់ទេ។ អ្នកស្រីនិងកូនស្រី បានត្រៀមខ្លួនជាស្រេចដើម្បី “រត់ពីទឹកជំនន់”។
នៅម៉ោង ៧ ព្រឹក ទឹកជំនន់បានហក់ចូលមកវិញយ៉ាងលឿន។ ឃើញដូច្នេះ អ្នកស្រី វ៉ាន់ បានជិះម៉ូតូមករកកូនស្រី និងប្រញាប់ប្រញាល់ដឹកកូនទៅកន្លែងខ្ពស់ ដើម្បីបញ្ចៀសទឹកជំនន់។ ប៉ុន្តែ ពេលចេញពីផ្ទះបានប៉ុន្មានម៉ែត្រ ទឹកក៏ហក់យ៉ាងលឿន ហើយក្រឡេកទៅផ្ទះ ឃើញទឹកហូរចូល ផ្ទះក៏លិចបាត់អស់តែម្តង។
នៅពេលដែលទឹកជំនន់ចាប់ផ្តើមថយចុះ ហើយទឹកបានស្រកអស់ អ្នកស្រី វ៉ាន់ ក៏បានប្រញាប់ប្រញាល់រត់មកមើលផ្ទះ និងទ្រព្យសម្បត្តិ ប៉ុន្តែ អ្វីៗស្ទើតែមិនជឿនឹងភ្នែក ព្រោះថា ផ្ទះបានបន្សល់ទុកតែជញ្ជាំងឥដ្ឋប្រេះចំនួន២។ នៅខាងក្នុង តុ កៅអី គ្រែ ទូរទស្សន៍ និងគ្រឿងសង្ហារិមទាំងអស់ ត្រូវបានទឹកជន់លិច។ ហើយជំនួសឱ្យទ្រព្យសម្បត្តិទាំងអស់នោះ គឺមានតែដីភក់ សំរាម (ដើមឈើ និងថ្ម)។
ជាលទ្ធផលនេះ អ្នកស្រី វ៉ាន់ បានរៀបរាប់ទាំងអួលដើមកថា ទឹកជំនន់ហក់ឡើងយ៉ាងលឿន មិនអាចយកអ្វីមកជាមួយបានទេ គ្រាន់តែរត់យកតែជីវិតក៏សឹងតែមិនចង់រួច ឥឡូវ អត់ដឹងទៅណាទៀតហើយ ខ្ញុំពិតជាពិបាកចិត្តខ្លាំង មានតែស្រែករកព្រះជួយប៉ុណ្ណោះ។
គួរបញ្ជាក់ថា ក្រៅពីផ្ទះអ្នកស្រី វ៉ាន់ គឺនៅមានផ្ទះអ្នកជិតផ្សេងទៀត ក៏ត្រូវទឹកជំនន់បំផ្លាញគ្មានសល់ផងដែរ៕ រក្សាសិទ្ធិដោយ៖ លឹម ហុង
