Tulsi ជាភូមិតូចមួយនៅក្នុងរដ្ឋ Chhattisgarh របស់ប្រទេសឥណ្ឌា ត្រូវបានគេស្គាល់ថាជា “ភូមិ Youtube” ដោយសារតែមួយភាគបីនៃចំនួនប្រជាជន គឺសុទ្ធសឹងជាអ្នកបង្កើតវីដេអូ ដើម្បីសាងប្រាក់ចំណូលសម្រាប់ការរស់នៅរបស់ពួកគេ។
ពិតណាស់ មនុស្សរាប់លាននាក់នៅជុំវិញពិភពលោក បានកំពុងប្រឹងប្រែងព្យាយាមបង្កើតអាជីពជាអ្នកបង្កើតវីដេអូ។ ប៉ុន្តែគ្មានកន្លែងណាដែលផ្តោតលើ YouTubers ជាងនៅភូមិ Tulsi ជាតំបន់ជនបទតូចមួយនៅ Chhattisgarh ដែលមានប្រជាជនជាងមួយភាគបី កំពុងធ្វើវីដេអូយ៉ាងសកម្ម និងបង្ហោះវាលើ YouTube ដើម្បីរកប្រាក់ចំចូល។ អ្នកបង្កើតទាំងនោះ គឺធ្លាប់ជាកសិករ ប៉ុន្តែ បានផ្លាស់ប្តូរជាអាជីព បន្ទាប់ពីបានឮថាមិត្តភក្ដិរបស់ពួកគេមួយចំនួនរកបានប្រាក់ចំណូលកើនឡើងទ្វេដង ក្នុងការបង្កើតវីដេអូ YouTube ពួកគេបានសម្រេចចិត្តថាវាដល់ពេលចាប់យកអាជីពនេះ។
រឿងរ៉ាវនៃភូមិ YouTube របស់ប្រទេសឥណ្ឌាមួយនេះ គឺបានចាប់ផ្តើមនៅពេលបុរសពីរនាក់គឺ Gyanendra Shukla និង Jai Verma ដែលបានចាកចេញពីការងាររបស់ពួកគេជាវិស្វករបណ្តាញ និងគ្រូបង្រៀនរៀងៗខ្លួន ដើម្បីធ្វើមាតិកាវីដេអូ។ មិនយូរប៉ុន្មាន ពួកគេបានចាប់ផ្តើមរកប្រាក់បានមួយកាក់ ពីកិច្ចខិតខំប្រឹងប្រែងថ្មីរបស់ពួកគេ ហើយពាក្យនៃភាពជោគជ័យរបស់ពួកគេ បានសាយភាយពេញភូមិ ហើយក៏បានបំផុសគំនិតអ្នកដទៃឱ្យដើរតាមគន្លងរបស់ពួកគេ។
Shukla បានប្រាប់ទីភ្នាក់ងារព័ត៌មាន ANI ថា៖ «ខ្ញុំបានធ្វើការនៅ SBI កាលពីមុន ជាវិស្វករបណ្តាញ។ ការិយាល័យរបស់ខ្ញុំមានអ៊ីនធឺណិតល្បឿនលឿន ហើយខ្ញុំធ្លាប់មើលវីដេអូ YouTube នៅទីនោះ។ ខ្ញុំចូលចិត្តភាពយន្ត។ នៅក្នុងឆ្នាំ 2011-12 កំណែថ្មីរបស់ YouTube ត្រូវបានបើកដំណើរការ នៅពេលនោះមានឆានែលយូធូបតិចណាស់ ខ្ញុំមិនពេញចិត្តនឹងការងារ 9 ទៅ 5 របស់ខ្ញុំទេ។ ដូច្នេះហើយខ្ញុំបានចាកចេញពីការងារ ហើយចាប់ផ្ដើមជាមួយ YouTube»។
គួរបញ្ជាក់ថា ប្រហែល ៤០ ភាគរយនៃប្រជាជនក្នុងភូមិឥឡូវនេះ បានកំពុងចូលរួមក្នុងការបង្កើតមាតិកាវីដេអូ នៅលើបណ្តាញសង្គមដូចជា YouTube, TikTok ឬ Instagram ដោយមានទាំងក្មេងៗអាយុ ១៥ ឆ្នាំ និងចាស់ជាងគេគឺជាជីដូនអាយុ ៨៥ ឆ្នាំ។ ឆាណែលធំៗចំនួន ៤០ ដែលមានមូលដ្ឋាននៅក្នុងភូមិ Tulsi គឺធ្វើចាប់ពីរឿងកំប្លែង និងតន្ត្រី រហូតដល់ការអប់រំ និង DIY ជាមួយនឹងចំនួនអ្នកជាវ (subcribe) ច្រើនជាង 100,000 នាក់ ដែលមានប្រជាប្រិយបំផុតនៅលើ YouTube តែមួយ៕ រក្សាសិទ្ធិដោយ៖ លឹម ហុង
