នៅថ្ងៃទី៧ ខែតុលា ឆ្នាំ២០២២ គេហទំព័រ O.T.C បានបង្ហាញពីរឿងរ៉ាវរបស់បងប្អូនស្រីភ្លោះ Chie និង Shika Yoshikawa មកពីប្រទេសជប៉ុន ដែលកំពុងល្បីយ៉ាងខ្លាំងនៅលើអ៊ីនធើរណែត ព្រោះថា បើទោះជាអ្នកទាំងពីរជាកូនភ្លោះមែន ប៉ុន្តែ ពួកគេមានទម្រង់មុខខុសគ្នាឆ្ងាយ តាំងពីក្មេងមកម្ល៉េះ ហើយគេតែងតែប្រៀបធៀបគ្នាទៅវិញទៅមក អ្នកណាស្អាតជាង!។
ដោយសារមុខផ្សេងគ្នា ធ្វើឲ្យកូនស្រីភ្លោះទាំងពីរនាក់ ពួកនាងត្រូវបានគេប្រៀបធៀបដូចជានិយាយថា «ម្នាក់ស្អាតជាងម្នាក់ទៀត បើម្នាក់បានពិន្ទុល្អជាងបន្តិច គេនឹងនិយាយថាម្នាក់ឆ្លាតជាងម្នាក់ទៀត ហើយបើម្នាក់លេងកីឡាបានល្អជាង គេនឹងនិយាយថាម្នាក់ខ្លាំងជាងម្នាក់ទៀត»។
ការប្រៀបធៀបទាំងអស់នេះ គឺពិតជាបានជះឥទ្ធិពលអវិជ្ជមានដល់ផ្លូវចិត្តរបស់ Chie និង Shika ជាខ្លាំង។ ដូច្នេះហើយ ពួកគេបន្តសង្កេត និងវិភាគមុខរបស់ពួកគេក្នុងកញ្ចក់ ដើម្បីស្វែងរកចំណុចខ្វះខាតរបស់គ្នារហូតដល់ធំពេញវ័យ ហើយចុងក្រោយ អ្នកទាំងពីរក៏បានសម្រេចចិត្តធ្វើការវះកាត់ ដោយជឿថា វាជាវិធីងាយស្រួលបំផុត ក្នុងការផ្លាស់ប្តូររូបរាងរបស់ពួកគេឲ្យដូចគ្នា។
ដូច្នេះ ពួកនាងក៏ចាប់ផ្តើមដើរតាមគន្លងរបស់បងស្រី។ កូនភ្លោះស្រីមួយគូនេះ បានធ្វើការវះកាត់ដូចគ្នា សម្រាប់គ្រប់នីតិវិធីក្នុងនោះ ត្របកភ្នែកពីរជាន់ ច្រមុះ និងរួមទាំងការលើកមុខ ចាក់ filler ដោយសារពួកគេស្អប់ការប្រៀបធៀប ដូច្នេះ ពួកគេចង់ឱ្យវាចេញមកដូចគ្នា ហើយលទ្ធផល មុខមាត់អ្នកទាំងពីរ គឺពិតជាគួរអោយចាប់អារម្មណ៍។
Chie និង Shika សុខចិត្តចំណាយលើភាពស្រស់ស្អាតរបស់ពួកគេ ដើម្បីបំពេញចិត្តនេះ ជាមួយនឹងប្រាក់ប្រហែល 40 លានយ៉េន (ស្មើ 275,000 $) ។ ពួកគេឥឡូវនេះ មានអាយុ ៣៤ ឆ្នាំហើយ ជាមួយនឹងមុខស្អាតដូចតុក្កតា។ ហើយបើប្រៀបធៀបនឹងរូបភាពពីមុនក្នុងវ័យ២០ឆ្នាំ ដែលស្រស់ស្អាតរួចទៅហើយ គឺមើលទៅខុសប្លែកខ្លាំងតែម្តង៕ រក្សាសិទ្ធិដោយ៖ លឹម ហុង
