វីដេអូមួយ ដែលត្រូវបានបង្ហោះកាលពីពេលថ្មីៗនេះ បានធ្វើឲ្យមនុស្សជាច្រើនភ្ញាក់ផ្អើល និងព្រឺក្បាលខ្លាំងតែម្តង បន្ទាប់ពីបានឃើញនូវអ្វីហោះស្តែងៗ ដែលគេអះអាងថាជា «អាប» តែម្តង។
បើតាមបុរសម្នាក់រស់នៅជាយក្រុងសៀមរាប បានប្រាប់ឲ្យដឹងថា ដោយសារតែមានអារម្មណ៍ចម្លែកនឹងសំឡេងឆ្កែព្រួសមិនឈប់ឈរ ក្នុងអំឡុងម៉ោង ១១ ទៅ ១២ យប់ ម្ចាស់ផ្ទះជាអ្នកជិតខាងគាត់ បានឆែកកាមេរ៉ាមើល ស្រាប់តែព្រឺក្បាលខ្លាំងតែម្តង នៅពេលរកឃើញមិនដឹងជាស្អីទេ សៗបានហោះចុះហោះឡើង និងចុងក្រោយ បានរកឃើញក៏មិនដឹងថាជាស្អីទៀត (សត្វមិនចំជាសត្វ) ជាមួយភ្លើងពណ៌ខៀវយ៉ាងច្បាស់ ប៉ុន្តែ សម្រាប់គាត់ គឺគិតថាជាអាប។
តែយ៉ាងណាមិញ កាន់តែព្រឺក្បាលខ្លាំង និងសឹងតែមិនហ៊ានចង់ចេញក្រៅផ្ទះពេលយប់នោះ គឺបន្ទាប់វីដេអូនៃហេតុការណ៍ដ៏ចម្លែកនេះ បានសាយភាយបង្កការវែកញែក ខណៈអ្នកខ្លះមិនជឿ ដោយចោទថា អ្នកបង្ហោះកាត់ត ស្រាប់តែអ្នកដែលបានយល់ដឹងពីពពួកអមនុស្ស បានចេញពន្យល់ថា នេះគឺជាអាប ដែលហៅថាកម្មបណ្តាលមកពីររៀនមន្តអាគមន៍ដែលមិនល្អ ប្រើទៅលើផ្លូវអាក្រក់ផ្សេងៗ ឬ ប្រើដើម្បីលាភសក្ការៈ ពពួកបែបនេះហៅថាខ្លួនជាមនុស្ស តែក្នុងជាតិជាសត្វនរកទាំងរស់។ គ្រប់កម្មដែលបានសាង គឺគ្រងដោយកម្មជាអ្នកអោយផលតាមហេតុដ៏សមគួរ ចូរកុំប្រមាថ។
ដោយឡែកអ្នកធ្លាប់ជួបកាលពីអំឡុង ១៥ ឆ្នាំ មុន ក៏បានចែករំលែកគួរឲ្យព្រឺក្បាលថា៖ «ខ្ញុំហ្នឹងហើយ អ្នកចាប់ក្បាលអាបចេញពីអន្លង់ត្រីរបស់ខ្ញុំ ពីរអ្នកបងថ្លៃខ្ញុំ ដល់មើលមុខ គឺជាអ្នកនៅក្នុងភូមិជាមួយគ្នា សុំអង្វរផងយំផងអោយលែងគាត់ ណាមួយគាត់ក៏មិនមែនជាមនុស្សអាក្រក់ដែរ ចឹងបងថ្លៃខ្ញុំក៏លែងទៅ ហើយគាត់មិនដែលហ៊ានធ្វើអោយអ្នកណាក្តៅក្រហាយដោយសារគាត់ទេ។ នេះជារឿងពិតដែលខ្ញុំបានជួបកាលអាយុ ១៥ ឆ្នាំ នៅស្រុកត្រពាំងក្រឡឹង ខេត្តកំពុងស្ពឺ, បើនិយាយរឿងអាប គ្មានអ្នកណាច្បាស់ជាងខ្ញុំទេ ខ្ញុំហ៊ានស្បថ ថាអាបពិតជាមានមែន ព្រោះអីខ្ញុំជួបផ្ទាល់ទល់មុខតែម្ដង កាលខ្ញុំនៅអាយុ ១៥ ឆ្នាំ រឿងដែលខ្ញុំចាំមិនភ្លេច វេលាប្រហែលម៉ោង១:២០ ពេលខ្ញុំដើរទៅមើលសន្ទូច ហើយពេលនោះខ្ញុំមានយួរស្បៃដាក់កូនកង្កែបហើយនិងត្រី ខ្ញុំដើរឱនងើបៗ ហើយក៏ឃើញហោះមកនៅទល់មុខខ្ញុំតែម្ដង ចម្ងាយមិនដល់ពីរម៉ែតផង ភ្លាមៗដៃជើងខ្ញុំកម្រើកលែងរួចហ្មង បានត្រឹមបើកភ្នែកមើលអាបនៅពីរមុខ ពេលនោះខ្ញុំមើលមុខមិនសូវច្បាស់ទេ ព្រោះថាមានសក់បិទមុខ តែបើពោះវៀន និងភ្លើងខៀវ ឃើញច្បាស់ណាស់ ខ្ញុំបោះចោលទាំងអស់រកតែកម្លាំងរត់មិនចង់រួចទេ ជឿខ្ញុំទៅអាបនៅមានពិត ហ៊ានស្បថជូន,…៕ រក្សាសិទ្ធិដោយ៖ លឹម ហុង