យោងតាមសារព័ត៌មាន News18 បានឲ្យដឹងថា ប្តីប្រពន្ធមួយគូ បានរៀបការជាមួយគ្នាអស់រយៈពេល ១០ ឆ្នាំ និងថែមទាំងមានកូនស្រីម្នាក់ផងដែរ។ តែទោះបីជាយ៉ាងណា ខណៈកំពុងរស់ឃើញមានសេចក្តីសុខនឹងគ្នាសុខៗ ស្រាប់តែបុរសជាប្ដីបានរកឃើញថា ប្រពន្ធរបស់គាត់កំពុងផិតក្បត់ ជាមួយបុរសអ្នកជំនួញម្នាក់ ហើយអ្នកទាំងពីរ ក៏បានចាប់ផ្តើមឈ្លោះគ្នាមិនឈប់ឈរ។
លុះដល់ថ្ងៃទី១១ ខែកញ្ញា អ្នកទាំងពីរបានឈ្លោះប្រកែកគ្នាដូចសព្វដង ហើយប្រពន្ធក៏បានដើរចេញពីផ្ទះ ដោយមិនប្រាប់កូនស្រីឲ្យដឹងឡើយ។ ដោយព្រួយបារម្ភថា អាចនឹងមានរឿងហេតុអ្វីកើតឡើងលើប្រពន្ធ បុរសជាប្តី និងកូនស្រី ក៏បានជិះម៉ូតូដើរស្វែងរក។
តែអ្វីគួរឱ្យភ្ញាក់ផ្អើល និងស្លុតចិត្តខ្លាំងនោះ គឺទីបំផុត ឪពុក និងកូនស្រី បានរកឃើញស្ត្រីជាប្រពន្ធស្ថិតក្នុងសម្លៀកបំពាក់ប្រពៃណីមានផ្កាពណ៌ស កំពុងជិះម៉ូតូយ៉ាងស្និទ្ធជាមួយបុរសម្នាក់ជាគូស្នេហ៍ នៅលើផ្លូវ Kailash Mandir ខណៈមុខរបស់នាងក៏ត្រូវបានគ្របដោយដាវប៉ាតា ហើយពាក់វ៉ែនតាខ្មៅធំ។
ឃើញទិដ្ឋភាពហួសចិត្តនេះ បុរសជាប្តីទប់កំហឹងមិនបាន ក៏បានជេរប្រពន្ធ និងជនទី៣ យ៉ាងចាស់ដៃ។ មួយសន្ទុះក្រោយមក បុរសជាប្តីបង្ខំឱ្យគូស្នេហ៍នេះឈប់ម៉ូតូនៅចិញ្ចើមផ្លូវ រួចរត់សំដៅទៅរកទាំងកំហឹងឈឺចាប់។ បុរសជាប្តីបានឈ្លោះជាមួយប្រពន្ធ និងព្រមទាំងទះកំផ្លៀងជនទី៣ជាច្រើនដៃ។ ទិដ្ឋភាពដ៏ភ្ញាក់ផ្អើលនេះ បានទាក់ទាញចំណាប់អារម្មណ៍អ្នកធ្វើដំណើរ សម្លឹងមើលព្រោងព្រាត។
ទន្ទឹមនឹងនោះ រូបភាពកូនស្រីអាយុ១០ឆ្នាំ ក៏លេចមុខនៅមុខកាមេរ៉ាដែរ។ គេអាចមើលឃើញថា ក្មេងស្រីរូបនោះមានការភ័យខ្លាច និងច្របូកច្របល់ដោយមិនដឹងថាត្រូវធ្វើយ៉ាងម៉េច។ តែទីបំផុត សមត្ថកិច្ចបានចុះអន្តរាគមន៍ ហើយបុរសទាំង២នាក់ ត្រូវបានប៉ូលិសចាប់ខ្លួន និងបញ្ជាឱ្យបង់ប្រាក់ពិន័យ ពីបទបង្កបញ្ហានៅកន្លែងសាធារណៈ ខណៈស្រ្តីជាប្រពន្ធផិតក្បត់ ពុំទទួលទោសទណ្ឌអ្វីនោះទេ។
គេក៏មិនបានដឹងច្បាស់ថា តើប្តីប្រពន្ធនេះនឹងដោះស្រាយគ្នាដោយរបៀបណានោះទេ ។ តែទោះជាយ៉ាងណា រឿងនេះវានឹងបន្សល់ទុកនូវស្លាកស្នាមផ្លូវចិត្តសម្រាប់កូនស្រី នៅពេលដែលនាងជួបរឿងអាក្រក់នៅចំពោះមុខនាង។ បន្ទាប់ពីរឿងរ៉ាវនេះ ត្រូវបានចែករំលែកនៅលើបណ្តាញសង្គម អ្នកនិយមលេងអ៊ីនធឺណិតជាច្រើនបានបញ្ចេញមតិជុំវិញហេតុការណ៍នេះ។
អ្នកមលេងអ៊ីនធឺណិតម្នាក់ បាននិយាយថា៖ «ខ្ញុំនឹងត្រូវធ្វើយ៉ាងណា ប្រសិនបើខ្ញុំធ្លាក់ក្នុងស្ថានភាពដូចបុរសជាប្តី គឺវាពិតជាឈឺចាប់ណាស់»។ អ្នកលេងម្នាក់ ក៏បានផ្តល់ជាយោបល់ថា “ប្តីគួរតែក្លាហាន និងត្រូវតែលែងលះ ឈប់រវីរវល់នឹងប្រពន្ធលែងខ្វល់ពីគ្រួសារបែបនេះ សុខចិត្តរត់តាមប្រុស មិនគិតពីកូនស្រី”។
រីឯអ្នកខ្លះទៀត ក៏បានសរសេរថា៖ «មិនដឹងអារម្មណ៍កូនក្មេងស្រីបែបណាទេ ខណៈឃើញទិដ្ឋភាពម្តាយមានប្រុសថ្មី ហើយឪពុកវាយតប់គ្នាតាមផ្លូវបែបនេះ, នៅពេលមនុស្សចាស់ប្រព្រឹត្តអំពើអសីលធម៌បែបនេះ ក្មេងនឹងក្លាយជាអ្នកដែលរងទុក្ខខ្លាំងបំផុត»៕ រក្សាសិទ្ធិដោយ៖ លឹម ហុង
प्रेमी के साथ स्कूटी पर घूम रही पत्नी को पति ने पकड़ा, बीच सड़क पर हुआ हंगामा
— Rahul Ahir (@rahulahir) September 12, 2022
मामला आगरा के सिकंदरा थाना क्षेत्र का है। पुलिस ने किया प्रेमी का 151 में चालान किया है। pic.twitter.com/I8uVwa3FpB
