ការក្លាយជាមនុស្សពូកែ មិនមែនជាភាពសំណាងល្អមកពីកំណើតនោះទេ វាស្ថិតនៅលើការហ្វឹកហាត់ដុសខាត់ខួរក្បាល និងបេះដូងរបស់យើងទៅវិញទេ បន្ទាប់ពីនោះ អ្នកនឹងមានភាពវាងវៃ ក្នុងបែបរបស់អ្នក ដែលអាចចាត់ការរៀបចំជីវិតរបស់ខ្លួនឯងបានយ៉ាងល្អប្រសើរ។
១-គិតវិជ្ជមាន
សម្លឹងពិភពលោកក្នុងន័យវិជ្ជមាន និងធ្វើអ្វីគ្រប់យ៉ាង យ៉ាងពេញកម្លាំង ដោយស្នាមញញឹម និងភាពរីករាយ ធ្វើឱ្យស្រស់ស្រាយ មានជីវិតជីវ៉ា និងក្លៀវក្លាស្វាហាប់ជាប់ជានិច្ច ត្រៀមរួចជាស្រេចក្នុងការប្រឈមគ្រប់ស្ថានការណ៍ ដែលនឹងជួយឱ្យអ្នកអាចចាត់ការបានគ្រប់រឿងដែលដើរចូលមកក្នុងជីវិតបានយ៉ាងរលូន។
២-មានជំនឿលើខ្លួនឯង
បើសូម្បីតែខ្លួនឯង មិនទាំងមានជំនឿ និងទុកចិត្តលើខ្លួនឯងផងនោះ តើនឹងមានមនុស្សម្នាក់ណា គេមកជឿលើភាពខ្លាំងពូកែរបស់អ្នក? ដូច្នេះ បើចង់ឱ្យគេចូលចិត្ត និងស្ងើចសរសើរចំពោះខ្លួនអ្នក អ្នកត្រូវជឿជាក់លើខ្លួនឯងជាមុនសិន។
៣-ហ៊ានសាកល្បងនឹងក្ដីស្រមៃ
គ្មានអ្វីដែលមានថាមពលខ្លាំងស្មើនឹងការតាំងចិត្ត និងការប្រឹងប្រែងអស់ពីកម្លាំងកាយចិត្តនោះទេ។ ភាពស្រេកឃ្លានដ៏ខ្លាំងក្លា ក្នុងការនាំខ្លួនឯងឆ្ពោះទៅរកគោលដៅ ហ្នឹងហើយ គឺជាកម្លាំងរុញច្រាន ដែលនឹងធ្វើឱ្យអ្នកភ្ជាប់ក្ដីស្រមៃ ឆ្ពោះទៅរកការពិតបាន។
៤-ស្វែងរកបុគ្គលធ្វើជាគំរូ
អ្នកណាក៏ដោយ ដែលអ្នកចូលចិត្ត និងកោតសរសើរ ដើម្បីយកធ្វើជាស្តង់ដាមួយដ៏ល្អ ក្នុងការដើរតាម សិក្សាពីផ្នត់គំនិត វិធីការធ្វើការងារ និងចំណុចលេចធ្លោក្នុងខ្លួនគេ ដើម្បីយើងអាចទទួលបានអៃឌៀល្អៗ មកកែសម្រួលប្រើ ឱ្យជីវិតឈានទៅមុខ ឆ្ពោះទៅរកភាពជោគជ័យដូចគេដែរ។
៥-ចាប់ផ្ដើមការងារថ្មីរាល់ថ្ងៃដោយស្នាមញញឹមស្រស់ស្រាយ
មនុស្សដែលមានស្នាមញញឹមរីកនៅលើផ្ទៃមុខ ប្រៀបដូចជាមាត់ទ្វារដែលបើកចំហធំ ឱ្យអ្នកណាៗក៏ចង់ចូលមកសេពគប់រាប់អានដែរ ការចរចាទំនាក់ទំនងការងារ ក៏នឹងច្រើនតែបញ្ចប់ដោយជោគជ័យ ខ្លាំងជាអ្នកដែលទឹកមុខដូចមនុស្សទូលទុក្ខធំដែរ។ ក្រៅពីនេះ ស្នាមញញឹម និងសំឡេងសើច នៅបានសាងភាពរីករាយ និងរំសាយទុក្ខ និងថែមទាំងជាឱសថអាយុវឌ្ឍនៈដ៏អស្ចារ្យ ដែលធ្វើឱ្យយើងនៅតែមើលឃើញនៅក្មេងគ្រប់ពេលជានិច្ចទៀតផង។ បានដឹងអ៊ីចឹងហើយ ហាត់ដាក់ស្នាមញញឹមនៅលើបបូរមាត់ជាប្រចាំខ្លះផងណា៎ប្អូនៗ។
៦-រៀនយល់ដឹងពីភាពខុសឆ្គង
សត្វជើង៤ម៉េចនៅមានភ្លាត់ អ្នកប្រាជ្ញចេះស្ទាត់ម៉េចនៅមានភ្លេច? វាទៅកើតអី បើគ្រាន់តែយើងធ្វើអ្វីមួយ ហើយមិនទាន់ជោគជ័យដូចដែលនឹកសង្ឃឹមនោះ? គ្រាន់តែសុំ ឱ្យធ្វើឱ្យអស់ពីកម្លាំងកាយចិត្ត និងបើកចិត្តឱ្យទូលាយ ទទួលយកការពិត ងាកមករំឭកមើលឡើងវិញថា តើមានដំណាក់កាលណាមួយដែលយើងខុសឆ្គង? ដើម្បីនឹងបានចាប់ផ្ដើមជាថ្មីម្ដងទៀត ឱ្យល្អជាងមុន។
៧-ថ្នមថែសម្ព័ន្ធមិត្តចាស់ៗ
ប្រហែលជាគ្មានអ្នកណាម្នាក់រស់នៅយ៉ាងមានសេចក្ដីសុខ ដោយប្រាសចាកមិត្តសម្លាញ់ ឬមនុស្សដែលដឹងចិត្តនោះឡើយ។ ទោះជាជីវិតក្នុង ១ថ្ងៃៗរបស់អ្នក វារញ៉េរញ៉ៃប៉ុនណាក៏ដោយ អ្នកគួរតែមានពេលវេលាជួបជាមួយមិត្តភក្តិជិតស្និទ្ធ ដែលស្គាល់ចិត្តស្និទ្ធស្នាលគ្នាយូរមកហើយខ្លះផង។ ឆ្លៀតពេលទៅជួបគ្នា ពេលមានឱកាសអំណោយផល នៅថ្ងៃឈប់សម្រាក ផ្ញើសារជូនពរឆ្នាំថ្មី ឬជូនពរថ្ងៃខួបកំណើត ដើម្បីនៅថ្ងៃណាមួយ ដែលអ្នកកម្សត់ឯកា កើតទុក្ខចិន្តា ក៏នៅមានមិត្តជំនិត គ្រាន់ពឹងពាក់ និងផ្ដល់កម្លាំងចិត្តគ្នាបានដែរ៕
