នៅថ្ងៃទី១៥ ខែតុលា ឆ្នាំ ២០២២ Odishatv បង្ហាញពីរឿងរ៉ាវដ៏គួរឱ្យភ្ញាក់ផ្អើលមួយរបស់គូស្នេហ៍មួយគូ ដែលទើបនឹងរៀបការថ្មីថ្មោង នៅក្នុងប្រទេសឥណ្ឌា។ នោះគឺនៅពេលដែលកូនក្រមុំ បាននាំកូនកំលោះទៅថតបទចម្រៀង ដែលធ្វើឲ្យគេយល់ឃើញថា នឹងប្រហែលជាបទមនោសញ្ចេតនាផ្អែមល្ហែម ដើម្បីអបអរសាទរអ្នកទាំងពីរហើយមើលទៅ ប៉ុន្តែ អ្វីៗគឺផ្ទុយស្រឡះ ព្រោះថាកូនក្រមុំស្រាប់តែច្រៀងរហូតស្រក់ទឹកភ្នែក នោះគឺជាបទនាងច្រៀងផ្ញើជូន “អតីតសង្សារ”។
បើតាមរបាយការណ៍បានឲ្យដឹងថា ហេតុការណ៍នេះបានកើតឡើងនៅរដ្ឋ Uttar Pradesh ភាគខាងជើងនៃប្រទេសឥណ្ឌា គឺក្រោយពីបញ្ចប់ពិធីរៀបការ មុនពេលទៅកាន់ផ្ទះខាងម្តាយក្មេក កូនក្រមុំបានសុំកូនកំលោះទៅកាន់ស្ទូឌីយោថតចម្រៀង ហើយកូនកំលោះក៏មិនមានហេតុផលដើម្បីបដិសេធនោះដែរ ដោយបានធ្វើតាមសំណូមពររបស់ភរិយា។
តាមរយៈវីដេអូឃ្លីបនៅលើបណ្តាញសង្គម គេអាចឃើញកូនក្រមុំកូន-កំលោះនៅក្នុងបន្ទប់ថតសំឡេង ដោយមានមនុស្សមួយចំនួនជួយថតសំឡេងផងដែរ។ ប៉ុន្តែ អ្វីដែលធ្វើឲ្យពួកគេភ្ញាក់ផ្អើលខ្លាំងនោះ គឺនៅពេលសួរកូនក្រមុំថា តើនឹងច្រៀងបទអ្វី? ស្រាប់តែនាងបានឆ្លើយភ្លាមៗថា “ខ្ញុំចង់ថតបទចម្រៀងសម្រាប់សង្សារចាស់”។
កូនកំលោះក៏មានការភ្ញាក់ផ្អើល នៅពេលឮដូច្នោះ។ អ្នកនៅក្នុងបន្ទប់ថតបានបន្តសួរទៅកូនក្រមុំថា អតីតសង្សារនាងឈ្មោះអ្វី? ប៉ុន្តែនាងមិនបានបញ្ចេញឈ្មោះទេ។ នៅពេលនោះ ស្ថានការណ៍មានភាពឆ្គាំឆ្គង ប៉ុន្តែអ្នកផ្សេងទៀតបានព្យាយាមធ្វើឱ្យបរិយាកាសស្ងប់ស្ងាត់ដោយការសើច។
ក្រោយមក កូនក្រមុំបានចាប់មីក្រូហ្វូនច្រៀង។ ប៉ុន្តែពេលច្រៀងបានត្រឹមតែវគ្គទី១ នាងក៏បង្ហាញនូវអារម្មណ៍ក្រៀមក្រំ សំឡេងញ័រ ហើយទឹកភ្នែកក៏ហូរតែម្តង។ នាងបានយកដៃជូតទឹកភ្នែក ខណៈកូនកំលោះឈរមើលទាំងតក់ស្លុត និងក៏ត្រូវបានឮនិយាយថា «ប្រពន្ធរបស់ខ្ញុំបាននាំខ្ញុំមកកាន់បន្ទប់ស្ទូឌីយោថតសំឡេង ច្រៀងបទផ្ញើជូនអតីត តើខ្ញុំគួរធ្វើអ្វី តើខ្ញុំកំពុងធ្វើអ្វីនៅទីនេះ?»។
អ្វីដែលធ្វើឲ្យកូនកំលោះរំជួលចិត្តកាន់តែខ្លាំងនោះ គឺបន្ទាប់ពីកូនក្រមុំបង្ហើបថា មនុស្សប្រុសដែលនាងប្រាថ្នារៀបការ និងស្រលាញ់ខ្លាំងបំផុតនោះ គឺជាបុរសដែលកំពុងមានស្នេហាជាមួយស្រីផ្សេង។ កូនក្រមុំបាននិយាយថា៖ «ខ្ញុំស្រលាញ់អតីតរបស់ខ្ញុំខ្លាំងណាស់ ប៉ុន្តែ គាត់ចង់រៀបការជាមួយស្រីផ្សេង ខ្ញុំនិយាយហើយទឹកភ្នែកហូរ។ ហើយសម្រាប់មូលហេតុដែលខ្ញុំរៀបការពេលនេះ គឺដោយសារតែខ្ញុំចង់បញ្ឈឺចិត្តអតីតប៉ុណ្ណោះ។ ប៉ុន្តែ មិននឹកស្មានថា គាត់មិនចាប់អារម្មណ៍ និងសូម្បីមកចូលរួមមង្គលការរបស់នាងនោះទេ។
កូនក្រមុំ បានប្រាប់ត្រង់ៗថា “ខ្ញុំមិនអាចប្រកែកបាន ក្នុងការរៀបការជាមួយកូនកំលោះ។ ហើយវាក៏ជាអាពាហ៍ពិពាហ៍ ដែលបានបានបំផ្លាញចំណងរបស់ខ្ញុំ»។
កូនក្រមុំក៏បានបញ្ជាក់ថា នាងចង់បានគូស្នេហ៍របស់នាងមកវិញ ហើយបាននិយាយថា ការរៀបការនេះគឺជាកំហុស ខណៈពេលដែលកូនកំលោះដែលអស់សង្ឃឹមបានសម្ដែងការព្រួយបារម្ភចំពោះខ្លួនឯងថា «ចុះខ្ញុំវិញ?»។ លើសពីនេះ គាត់ក៏បានសួរកូនក្រមុំទៀតថា៖ «ហេតុអ្វីបានជាអ្នកមិនប្រាប់ខ្ញុំឱ្យបានដឹង យ៉ាងហោចណាស់មុនពេលរៀបការអ៊ីចឹង?»។
ទោះជាយ៉ាងណា របាយការណ៍ក៏មិនដឹងច្បាស់ថា រឿងនេះនឹងបញ្ចប់ដោយរបៀបណានោះទេ។ ហើយស្ថានភាពអាពាហ៍ពិពាហ៍របស់អ្នកទាំងពីរនឹងបន្ត ឬបញ្ចប់ត្រឹមពេលនោះ?៕ រក្សាសិទ្ធិដោយ៖ លឹម ហុង
