ប្រជាពលរដ្ឋជាអ្នកធ្វើដំណើរ ពិតជាមានការភ្ញាក់ផ្អើលយ៉ាងខ្លាំង នៅពេលប្រទះឃើញស្រីស្អាតម្នាក់ ស្ថិតនៅតាមចិញ្ចើមផ្លូវទាំងកណ្តាលយប់អាធ្រាត្រ ខណៈស្ថានភាពមិនដូចមនុស្សអនាថាទេ។ ប៉ុន្តែ គ្រប់គ្នាពិតជាមានការហួសចិត្ត នៅពេលដឹងការពិតថា ស្រ្តីរូបនេះជាគ្រូបង្រៀន បានកំពុងដេកតាមចិញ្ចើមផ្លូវអស់រយៈពេល២ខែ មកហើយ ក្នុងបំណងទៅដើររកការងារនៅទីក្រុង ប៉ុន្តែអ្វីដែលនាងទទួលបាន គឺការបំផ្លាញអនាគតខ្លួនឯងប៉ុណ្ណោះ។
នេះបើតាមគេហទំព័រ CTWANT នៅថ្ងៃទី១៧ ខែតុលា ឆ្នាំ ២០២២ បានចុះផ្សាយឲ្យដឹងថា ស្ត្រីវ័យក្មេងម្នាក់ គឺដើមឡើយ ធ្វើការជាគ្រូបង្រៀនគណិតវិទ្យានៅក្នុងខេត្ត Henan ប៉ុន្តែដោយសារនាងបានឮថា ទីក្រុង Shenzhen នឹងផ្តល់ឱកាសឱ្យជីវិតប្រសើរជាងមុន ដូច្នេះហើយ នាងក៏បានសម្រេចចិត្តលាឈប់ពីការងារ ហើយធ្វើដំណើរតាមក្តីស្រមៃរបស់ខ្លួន ប៉ុន្តែអ្វីៗមិនរលូនដូចការគិត…។
ជាក់ស្តែង នៅពេលដែលគ្មានការងារធ្វើ គ្មានប្រាក់ចំណូល និងគ្មានផ្ទះសម្បែង ទីបំផុតស្រីស្អាតរូបនេះ ត្រូវចេញមកដើរតាមផ្លូវ និងយកដងផ្លូវជាកន្លែងស្នាក់អាស្រ័យ។ អ្នកធ្វើដំណើរមានការភ្ញាក់ផ្អើល នៅពេលបានឃើញនារីវ័យក្មេងម្នាក់រូបនោះ ដែលស្ថិតក្នុងស្លៀកពាក់តុបតែងខ្លួនយ៉ាងស្រស់ស្អាត ប៉ុន្តែ ស្ថានភាពមិនស្រដៀងនឹងមនុស្សអនាថាជាទូទៅនោះទេ។
ទោះជាយ៉ាងណា ទីបំផុត មានមនុស្សចិត្តល្អមកជួយមើលថែ ទិញអាហារ និងទឹកឲ្យអ្នកគ្រូក្មេងហូប។ ហើយនៅពេលសួរនាំ ទើបដឹងពីស្រុកកំណើត និងប្រវត្តិរបស់នាង។
ច្បាស់ណាស់ថា បើទោះបីមានភាពរីកចម្រើននៃទីក្រុង Shenzhen ដែលរហូតក្លាយជាតំបន់សេដ្ឋកិច្ចដ៏សំខាន់បំផុតមួយក៏ដោយ ប៉ុន្តែនៅមានមនុស្សជាច្រើនទៀតដែលមិនអាចរកការងារធ្វើបាននោះទេ។ យ៉ាងណាមិញ ក្រោយពីប្រឈមមុខនឹងពិភពពិត គ្រូស្រីរូបនេះបានទទួលស្គាល់ថា នាងមិនមានទំនុកចិត្តក្នុងការរកការងារធ្វើទេ ហើយក៏លែងចង់ធ្វើអ្វីទៀតដែរ។
អ្នកគ្រូក្មេងរូបនេះ ក៏មិនបានគិតចង់ត្រឡប់ទៅស្រុកកំណើតវិញដែរ ហើយជម្រើស គឺចង់រស់នៅទីនេះ បើទោះបីក្លាយជាមនុស្សអនាថាក៏ដោយ។
ក្រោយរឿងរ៉ាវរបស់អ្នកគ្រូស្រីរូបនេះ ត្រូវបានគេផ្សព្វផ្សាយតាមប្រព័ន្ធផ្សព្វផ្សាយ មានមហាជនជាច្រើនចូលមករិះគន់ដោយលើកឡើងថា «ត្រូវហើយ ក្នុងការគិតពីការអភិវឌ្ឍន៍នៅ Shenzhen ប៉ុន្តែ អ្នកគួរតែមានផែនការបម្រុងទុក ព្រោះគ្មាននរណាម្នាក់នឹងស្គាល់អ្នកទេ, នេះជាគ្រូ ពិតជាមិនធម្មតាទេ ចុះហេតុអ្វីអ្នកមិនបានសិក្សាឲ្យច្បាស់ មុនពេលចេញទៅរកការងារធ្វើ?»៕ រក្សាសិទ្ធិដោយ៖ លឹម ហុង
