រូបភាពមួយសន្លឹក បង្ហាញក្មេងតូចៗជិះទូកចាវកណ្តាលទន្លេដ៏ល្វឹងល្វើយ ដើម្បីទៅសាលារៀន បានកំពុងធ្វើឲ្យចាក់ដោតបេះដូង មនុស្សយ៉ាងច្រើន សម្តែងក្តីរំជួលចិត្ត ស្ទើរស្រក់ទឹកភ្នែក ព្រោះតែនឹកឃើញរឿងគ្រប់យ៉ាង…។
គួរបញ្ជាក់ថា រូបភាពដ៏គួរឲ្យសង្វេគនេះ ទើបត្រូវបានគេចែករំលែកនៅលើបណ្តាញសង្គមថ្មីៗនេះ ប៉ុន្តែ ប្រភពពុំបានបញ្ជាក់ពីពេលវេលា និងទីតាំងស្ថិតនៅក្នុងស្រុក/ខេត្តណានោះទេ ដោយបានត្រឹមដឹងថា ក្មេងៗទាំងនេះ គឺជាអ្នករស់នៅតាមដងទន្លេ។
តែយ៉ាងណាមិញ រូបភាពនេះផងដែរ គឺចង់បង្ហាញឲ្យឃើញជ្រុងមួយគួរពិចារណា នៃសោកនាដកម្មដ៏សែនសោកសង្រេងបំផុត សម្រាប់ហេតុការណ៍លិចទូកដរ បណ្តាលឲ្យក្មេងៗសិស្សសាលាចំនួន ១១ នាក់ ស្លាប់ ដែលបានកើតឡើងថ្មីៗនេះ នៅស្រុកលើកដែក ខេត្តកណ្តាល។
តែទន្ទឹមមនុស្សជាច្រើន បានសម្តែងក្តីអាណិតអាសូរ នោះអ្នកដែលមានការព្រួយបារម្ភ បានរិះគន់ឪពុកម្តាយថា មានការធ្វេសប្រហែស ដែលមិនគួរណាបណ្តែតបណ្តោយឲ្យកូនៗ នាំគ្នាជិះទូកទៅសាលារៀនទាំងស្ថានភាពគ្មានអាវពោងការពារបែបនេះសោះឡើយ ព្រោះថា បើមានហេតុការណ៍កើតឡើង សួរថាតើពួកគេនឹងទៅជាយ៉ាងណា?។ តែក្នុងនោះ អ្នកខ្លះក៏បាននិយាយថា «កុំបន្ទោសម្ដាយឪពុកគាត់..បើអ្នកមិនធ្លាប់ក្រ! ហើយអ្នកក៏មិនយល់ដែរថាអ្នកក្ររស់នៅយ៉ាងម៉េច!»៕ រក្សាសិទ្ធិដោយ៖ លឹម ហុង
