ពោធិ៍សាត់ ៖ មនុស្សម្នាក់ស្លាប់និងម្នាក់រងរបួសធ្ងន់ ដោយសាររថយន្តមិនស្គាល់ម៉ាក បើកបុកម៉ូតូអូសរ៉ឺម៉កដឹកត្រី កាលពីវេលាម៉ោងជិត៥ទៀបភ្លឺថ្ងៃទី៧ ខែមិថុនា ឆ្នាំ២០១៨ នៅចំណុចចន្លោះបង្គោលគីឡូម៉ែត្រ ១៨២-១៨៣ ស្ថិតក្នុងភូមិសាលាគំរូ សង្កាត់ព្រៃញី ក្រុងខេត្តពោធិ៍សាត់ ។
សមត្ថកិច្ចបានឲ្យដឹងថា ជនរងគ្រោះ ឈ្មោះ ចាន់ ធា ភេទប្រុស អាយុ២៤ឆ្នាំ រស់នៅភូមិទី៤ ឃុំកំពង់លួង ស្រុកក្រគរ ខេត្តពោធិ៍សាត់ ស្លាប់នៅនឹងកន្លែង និងឈ្មោះ សង ភេទប្រុស អាយុ២១ឆ្នាំ រស់នៅក្នុងភូមិឃុំជាមួយគ្នា រងរបួសធ្ងន់ ។
ប្រភពព័ត៌មានបានឲ្យដឹងថា បុរសពីរនាក់ជិះម៉ូតូម៉ាកហុងដា គ្មានស្លាកលេខ អូសរ៉ឺម៉កដឹកត្រី ក្នុងទិសដៅពីកើតទៅលិច មកដល់ចំណុចខាងលើ ស្រាប់តែមានរថយន្តមិនស្គាល់ម៉ាកមួយគ្រឿង បើកបរក្នុងទិសស្របគ្នា បានបុកម៉ូតូពីក្រោយយ៉ាងពេញទំហឹង បណ្តាលឲ្យឆេះម៉ូតូ និងស្លាប់អ្នកបើកបរម៉ូតូម្នាក់ ព្រមទាំងរងរបួសអ្នករួមដំណើរម្នាក់ ក្រោយពេលកើតហេតុ អ្នកបើកបររថយន្ត បានបន្ថែមល្បឿនបើករត់គេចខ្លួនបាត់ រីឯអ្នករងគ្រោះត្រូវបានបញ្ជូនមកសង្គ្រោះ នៅមន្ទីរពេទ្យខេត្តពោធិ៍សាត់ ។
ចំពោះករណីរឿងនេះសមត្ថកិច្ចនឹងស្រាវជ្រាវតាមរករថយន្តបង្ក មកកាន់អធិការដ្ឋាននគរបាលក្រុង ដើម្បីកសាងសំណុំរឿងតាមនីតិវិធី ៕ ដោយ៖បញ្ញាស័ក្តិ
