ភ្នំពេញ៖ ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី៧ខែមិថុនាឆ្នាំ២០១៨នេះ បានចេញសេចក្តីប្រកាសព័ត៌មាន ដោយបានបញ្ជាក់ថា ព្រះរាជាណាចក្រកម្ពុជា និងប្រទេសចំនួន១៥ផ្សេងទៀត មកពីក្រុមប្រទេសតំបន់ផ្សេងៗ ត្រូវបានជ្រើសតាំងឱ្យធ្វើជាអនុប្រធាន រួមជាមួយប្រទេសសមាជិកអចិន្ត្រៃយ៍ទាំង៥ នៃក្រុមប្រឹក្សាសន្តិសុខអង្គការសហប្រជាជាតិ នៃសម័យប្រជុំលើកទី៧៣ របស់មហាសន្និបាតអង្គការសហប្រជាជាតិ សម្រាប់អាណត្តិពីខែកញ្ញា ឆ្នាំ២០១៨ ដល់ខែកញ្ញា ឆ្នាំ២០១៩ នៅសាលមហាសន្និបាត នៃទីស្នាក់ការអង្គការសហប្រជាជាតិ នាទីក្រុងញូវយ៉ក នៅថ្ងៃទី៥ ខែមិថុនា ឆ្នាំ២០១៨។
លោកផៃ ស៊ីផាន រដ្ឋលេខាធិការ និងជាអ្នកនាំពាក្យទីស្តីការគណៈរដ្ឋមន្ត្រី បានសរសេរក្នុងផេកហ្វេសប៊ុកថា “កម្ពុជា ក្រោមការដឹកនាំ របស់សម្តេចតេជោ បានដើរតួសំខាន់ នៅក្នុងការងារអង្គការសហប្រជាជាតិ ដែលជាអង្គការកំពូលពិភពលោក។ មុខមាត់ថ្មី ជាប្រត្តិសាស្ត្រ របស់កម្ពុជា គឺជាសមិទ្ធផល នៃការប្រឹងប្រែងដ៏មានប្រសិទ្ធភាព របស់សម្ដេចតេជោ ដែលនាំកម្ពុជា ចេញពីប្រជាជាតិ ដែលទទួលទណ្ឌកម្ម ពីអង្គការសហប្រជាជាតិ នៅក្នុងទសវត្សរ៍៨០ មកកាន់ជាប្រជាជាតិមួយ ដែលទទួលស្គាល់ពេញលេញ និងគោរពសមត្ថភាពរបស់កម្ពុជា អង្គុយនៅក្នុង ជួរថ្នាក់ដឹកនាំ របស់អង្គការកំពូលពិភពលោកនេះ។ កម្ពុជាសូមគោរព និងត្រូវការសម្ដេចតេជោ ជាថ្នាក់ដឹកនាំកំពូល បន្ដគ្រប់អាណត្តិទៅមុខទៀត”។
ក្រសួងការបរទេស បានលើកឡើងថា យោងតាមការណែនាំដ៏ខ្ពង់ខ្ពស់របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា រដ្ឋាភិបាលនៃព្រះរាជាណាចក្រកម្ពុជា នៅក្នុងស្មារតីលើកតម្កើងកិត្យានុភាព និងកិត្តិយសជាតិ នៅលើឆាកអន្តរជាតិ បានដាក់បេក្ខភាពកម្ពុជា ជាអនុប្រធាន នៃមហាសន្និបាត អង្គការសហប្រជាជាតិលើកទី៧៣ នៅខែមករា ឆ្នាំ២០១៧។
នៅក្នុងខែកុម្ភៈ ឆ្នាំ២០១៨ បេក្ខភាពរបស់ព្រះរាជាណាក្រកម្ពុជា និងប្រទេសចំនួនបួនផ្សេងទៀត ទទួលបានការគាំទ្រជាផ្លូវការ ដោយប្រទេសនៃក្រុមតំបន់អាស៊ីប៉ាស៊ីហ្វិក ដើម្បីធ្វើជាអនុប្រធាននៃមហា សន្និបាតអង្គការសហប្រជាជាតិលើកទី៧៣។
ក្នុងឋានៈជាអនុប្រធាននៃមហាសន្និបាត អង្គការសហប្រជាជាតិ កម្ពុជាអាចមានឱកាសដឹកនាំ កិច្ចប្រជុំរបស់មហាសន្និបាត ជំនួសមុខប្រធាន និងតាមសំណើរបស់ប្រធាន។ លើសពីនេះទៀត កម្ពុជាក៏នឹងក្លាយជាសមាជិក នៃគណៈកម្មាធិការទូទៅ ដែលមានមុខងារ ដូចជា ពិនិត្យរបៀបវារៈបណ្តោះអាសន្ន និងបញ្ជីបន្ថែមចំណុចពិភាក្សា ផ្តល់អនុសាសន៍ដល់មហាសន្និបាត និងជួយដល់ប្រធាន និងមហាសន្និបាត ក្នុងការរៀបចំរបៀបវារៈ សម្រាប់កិច្ចប្រជុំពេញអង្គនីមួយៗ ហើយ និងក្នុងការងារទូទៅ របស់មហាសន្និបាត។
គួរកត់សម្គាល់ដែរថា ព្រះរាជាណាចក្រកម្ពុជា ក៏ត្រូវបានជ្រើសតាំងលើកដំបូង ជាអនុប្រធាន នៃសម័យប្រជុំមហាសន្និបាត អង្គការសហប្រជាជាតិ លើកទី៥៦ អាណត្តិឆ្នាំ ២០០១-២០០២៕ ដោយ៖បញ្ញាស័ក្តិ
