ម្ចាស់ផ្ទះមួយនៅក្នុងប្រទេសថៃ បានបង្កការរិះគន់ និងគួរឲ្យស្អប់ជាខ្លាំង ពីសំណាក់មហាជននៅលើបណ្តាញសង្គម បន្ទាប់ពីបានឃើញទង្វើដ៏អាក្រក់ហួសហេតុរបស់ម្ចាស់ផ្ទះនេះ បានបង្កហិង្សាយកពងមាន់គប់កញ្ចក់រថយន្ត១គ្រឿង ដែលចតលើចិញ្ចើមផ្លូវសាធារណៈ ក្បែររបងផ្ទះរបស់ខ្លួនសោះ។
នេះបើតាមគណនីហ្វេសប៊ុកឈ្មោះ Krit Thanaphatdamrong កាលពីថ្ងៃទី១៨ ខែតុលា ឆ្នាំ២០២២ បានបង្ហោះវីដេអូបង្ហាញសកម្មភាពរបស់ម្ចាស់ផ្ទះមួយកន្លែង នៅតំបន់ Chaengwattana និងរៀបរាប់ឲ្យដឹងថា គាត់ និងគ្រួសារបានឈប់ចតរថយន្តក្បែររបងផ្ទះនោះ ដែលមានស្លាកសរសេរថា “សូមកុំចតតាមរបង! សំឡេងរោទិ៍ចោរកម្ម”, «អ្នកបំពាន ប្រយ័ត្នទទួលគ្រាប់ពងមាន់!»។
គាត់បន្តថា ក្រោយពេលចតរថយន្តបានប៉ុន្មានវិនាទីនោះ ស្រាប់ស្ត្រីម្នាក់បានដើរចេញពីផ្ទះ ដើរសំដៅចូលមក រួចគប់ពងមាន់ទៅលើកញ្ចក់រថយន្តភ្លាមៗតែម្តង។ លើសពីនេះ ម្ចាស់ផ្ទះនោះក៏ស្រែកបានជេរអ្នកនៅក្នុងរថយន្តថា «វាខុសច្បាប់ វាធ្វើឲ្យរំខាន តើពួកអ្នកឯងដឹងទេ!»។
មិនត្រឹមតែប៉ុណ្ណឹងទេ គឺនៅបើករម្ចាស់រថយន្តបើកចាកចេញ ស្រ្តីម្ចាស់ផ្ទះនោះ មិនដឹងជាយកវត្ថុរឹងអ្វីទេ គប់រថយន្ត រហូតដល់អ្នកជិះក្នុងរថយន្តនិយាយទាំងហួសចិត្តថា «ម៉េចទៅជាបែបហ្នឹង អីក៏អាក្រក់ខ្លាំងម្ល៉េះ!?»។
គេក៏បានបង្ហើបឱ្យដឹងថា ក្រៅពីនេះ ផ្ទះខាងលើក៏បានដាក់ផើងស៊ីម៉ងត៍នៅតាមរបង ជាមួយស្លាកសញ្ញាជាច្រើនផ្សេងទៀតដូចជា «ហាមចតមុខផ្ទះអ្នកដទៃ ជនល្មើសត្រូវផ្តន្ទាទោសដាក់ពន្ធនាគារ ១ ខែ និងពិន័យជាប្រាក់ ៥០០០ បាត ក្នុងករណីមានសំឡេងរោទិ៍ខ្លាំង», «ហាមចតទីនេះ ទទឹងទិស»។
ម្ចាស់ឃ្លីបបាននិយាយថា ម្ចាស់ផ្ទះក៏មានកាំភ្លើងដែរ និងមានករណីកើតឡើងជាប្រចាំ រហូតដល់សមត្ថកិច្ចក្នុងតំបន់ ចុះទៅកាន់ទីនោះ។
ជាមួយទង្វើដ៏អាក្រក់នេះ មហាជនជាច្រើនបានចោទជាសំណួរថា បើទោះឡានមិនចតមុខផ្ទះ តែចតក្បែររបង តើវាបំពានសីលធម៌ឬអត់?, តំបន់ចិញ្ចើមផ្លូវនៅជាប់របងផ្ទះតាមផ្លូវនៅទីនោះ តើជាកម្មសិទ្ធិរបស់ម្ចាស់ផ្ទះ ឬកម្មសិទ្ធិផ្លូវសាធារណៈ ដែលបែរជាម្ចាស់ផ្ទះនោះ បែរមកហាមថតរថយន្តបែបនេះ?។
មនុស្សជាច្រើនក៏បានឲ្យដឹងថា ផ្ទះនេះជាផ្ទះមានកេរ្តិ៍ឈ្មោះនៅតំបន់ Chaengwattana។ អ្នកណាដើរកាត់ទីនេះ ច្បាស់ជាបានឃើញ និងចងចាំគ្រប់គ្នា៕ រក្សាសិទ្ធិដោយ៖ លឹម ហុង
