នៅថ្ងៃទី១១ ខែតុលា ឆ្នាំ ២០២២ គេហទំព័រ ETtoday បានបង្ហាញរឿងរ៉ាវដ៏ភ្ញាក់ផ្អើល របស់អតីតគូស្នេហ៍មួយគូនៅ Bozhou ខេត្ត Anhui ប្រទេសចិន ក្រោយឃ្លីបវីដេអូភាគីខាងប្រុស បានលាតត្រដាងថា អតីតភរិយាបានយកថ្លៃបណ្ណាការទាំងអស់មកវិញ ក្នុងនោះសូម្បីតែ «សាច់ជ្រូក» មួយដុំធំ។
យោងតាមរបាយការណ៍របស់ប្រព័ន្ធផ្សព្វផ្សាយក្នុងស្រុក បានឲ្យដឹងថា អតីតគូស្នេហ៍នេះ បានរៀបការមិនដល់កន្លះឆ្នាំទេ មុននឹងសម្រេចចិត្តលែងលះគ្នា ហើយភាគីខាងស្រីបានយកថ្លៃបណ្ណាការទាំងអស់ ដាក់ក្នុងប្រអប់យកមកប្រគល់ជូនប្តីវិញ នៅឯផ្ទះគ្រួសាររបស់គាត់។
តាមរយៈរបស់ដែលប្រគល់ជូនដោយអតីតប្រពន្ធរបស់គាត់ គឺមានប្រាក់បណ្ណាការត្រឡប់មកវិញចំនួន 188,000 យន់ (ប្រហែល ២៦០០០ ដុល្លារ) និងកាដូដ៏មានតម្លៃផ្សេងទៀត រួមទាំងរបស់របរស្រស់ៗដូចជាទឹកដោះគោ ផ្លែឈើ និងសូម្បីតែសាច់ជ្រូកមួយដុំធំផងដែរ។
បុរសរូបនេះបាននិយាយថា ជីវិតអាពាហ៍ពិពាហ៍របស់ពួកគាត់ ស្ថិតក្នុងដំណាក់កាលមិនអាចផ្សះផ្សារបាន ប៉ុន្តែមិនបានបញ្ជាក់ច្បាស់ថាផ្តើមចេញពីមូលហេតុអ្វីនោះទេ ទើបមិនអាចរក្សាចំណងអាពាហ៍ពិពាហ៍រួមរស់ជាមួយគ្នាតទៅទៀត។
អតីតស្វាមីបាននិយាយថា «នៅក្នុងជីវិតគូរបស់ពួកខ្ញុំៗ ដឹងច្បាស់ណាស់ គាត់ជាស្ត្រីម្នាក់ស្រលាញ់ក៏ខ្លាំង និងស្អប់ក៏ខ្លាំង នាងមានហេតុផលណាស់។ ប៉ុន្តែការយកសូម្បីសាច់ជ្រូកមកវិញ វាធ្វើឱ្យខ្ញុំមានអារម្មណ៍មិនស្រួលសោះ។ ខ្ញុំមិនគិតថា រឿងនេះនឹងកើតឡើងនៅក្នុងជីវិតពិតយ៉ាងដូច្នេះទេ”។ .
បន្ទាប់ឃ្លីបវីដេអូនៃរឿងរ៉ាវរបស់អតីតគូស្នេហ៍នេះ ត្រូវបានផ្សព្វផ្សាយតាមអ៊ីនធឺណិត ឃើញថាទទួលបានការចាប់អារម្មណ៍ពីមនុស្សយ៉ាងច្រើន។ ក្នុងនោះ មនុស្សមួយចំនួននាំគ្នាសង្ស័យពីមូលហេតុនៃបញ្ហា ហេតុអ្វីបានជាមនុស្សស្រីត្រូវសងអ្វីៗទាំងអស់បែបនេះ? ខណៈដែលអ្នកខ្លះបានកោតសរសើរដល់នាងថា៖ “ស្ត្រីម្នាក់នេះចាកចេញដោយសេចក្តីថ្លៃថ្នូរ ពិតជាមិនមានអ្វីត្រូវតោងជាប់ឡើយ» «នាងច្បាស់ជាចង់កាត់ផ្តាច់ គ្មានអ្វីត្រូវជាប់ជំពាក់គ្នាក្នុងជីវិតនេះ» «មនុស្សមានតម្លៃ គឺមិនលោភលន់ចង់បានទ្រព្យសម្បត្តិរបស់អ្នកដទៃសូម្បីបន្តិចឡើយ»៕ រក្សាសិទ្ធិដោយ៖ លឹម ហុង
